Nude ma whèdo Madián po Marcela po he nọ nọ̀ Medellín, to Colombie. Agbasazọ́n Madián tọn pekuẹ taun, ehe zọ́n bọ yé nọ nọ̀ owhé dagbe de gbè. Amọ́, na yé yin Jehovah Jiwheyẹwhe sẹ̀ntọ lẹ wutu, nude whàn yé nado vọ́ nulẹnpọn do nuhe dona tin to otẹn tintan mẹ na yé lẹ ji. Yé basi zẹẹmẹ dọ: “To 2006, mí yì plidopọ vonọtaun he hosọ etọn yin ‘Hẹn Nukun Towe Yin Dopo.’ Susu to hodidọ lọ lẹ mẹ na tuli mí nado zan gbẹzan jlẹkajininọ tọn bo sẹ̀n Jiwheyẹwhe to gigọ́ mẹ dogọ. To whenue mí tọ́n sọn plidopọ lọ ji, mí wá mọdọ adà awetọ pete nuhe yin didọ lẹ tọn wà wẹ mí te. Mí tindo aṣa lọ nado nọ to nuhọ̀ mapote, etlẹ yin whenue mí ma tindo akuẹ he pé nado suahọ lọ lẹ, enẹ zọ́n bọ ahọ́ nọ to okọ̀ na mí.”

 To hodidọ he fọ́n mẹ sọn amlọn mẹ ehelẹ godo, Madián po Marcela po jẹ gbẹzan jlẹkajininọ tọn zan ji. Yé dọmọ: “Mí jẹ nue go mí nọ zan akuẹ do lẹ depò ji. Mí bẹ jẹ owhé pẹvi de gbè bo sà mọto mítọn bosọ họ̀ zokẹkẹ de.” Podọ, yé doalọtena nusatẹn daho lẹ mẹ yìyì na yé nikaa yin whiwhlepọn nado to nuhọ̀ mapote. Yé jẹ whenu susu yizan ji nado nọ dọho gando Biblu go na kọmẹnu yetọn lẹ. Podọ yé jihọntọn hẹ gbehosọnalitọ titengbe he to Jehovah Jiwheyẹwhe sẹ̀n po zohunhun po lẹ. a

 To ojlẹ kleun de godo, Madián po Marcela po magbe nado gbloada na lizọnyizọn yetọn gbọn tẹnsisẹ yì agun pẹvi de he do hudo mẹ dali. Nado sọgan sẹtẹn, Madián jo agbasazọ́n etọn do. Ogán etọn lẹndọ tadu wẹ e hùn do jo azọ́n lọ do. Enẹwutu, Madián yihojlẹdohogo hẹ ẹ bo kanse ogán etọn yọnnu lọ dọ: “Mì nọ dù akuẹ susu kai, amọ́ be mì do ayajẹ ya?” E yigbe dọ emi ma tindo ayajẹ na emi do nuhahun susu he emi ma gán didẹ. Enẹgodo, Madián dọna ẹn dọ: “Nuhe yin nujọnu to gbẹ̀mẹ ma yin lehe akuẹ he yè nọ dù sù sọ. Nujọnu hugan lọ wẹ nado mọ nuhe na namẹ ayajẹ nujọnu tọn. Nupinplọn gbẹtọ lẹ gando Jiwheyẹwhe go hẹn ayajẹ wá na yẹn po asi e po, podọ mí sọ jlo na yin ayajẹnọ humọ gbọn whenu yiyizan dogọ na azọ́n ehe dali.”

 Madián po Marcela po tindo pekọ nujọnu tọn po ayajẹ po to afọdidona yanwle gbigbọmẹ tọn lẹ mẹ. Na owhe 13 he wayi lẹ, yé sẹ̀n to fie nuhudo sù te to agun he to agewaji-whèyihọ Colombie tọn lẹ mẹ. Podọ todin, yé tindo lẹblanulọkẹyi lọ nado to sinsẹ̀n taidi gbehosọnalitọ titengbe lẹ.