Owhe 2023 wẹ yin owhe 75​tọ he mẹ Kunnudetọ Jehovah tọn lẹ ko to azọ́n lẹdogbedevomẹ tọn wà to Papiamento-Gbè mẹ te. Papiamento yin ogbè flusọ́ de he sinai titengbe do Pays-Bas-Gbè, Portugal-Gbè, po Espagne-Gbè po ji. To egbehe, nudi gbẹtọ 350 000 he nọ nọ̀ lẹdo he yin yinyọnẹn taidi lopo ABC tọn lẹ ji, yèdọ Aruba, Bonaire, po Curaçao po lẹ wẹ nọ do Papiamento-Gbè.

Azọ́n yẹwhehodidọ tọn bẹjẹeji to lopo ehelẹ ji ojlẹ kleun de jẹnukọnna 1930. To whenue mẹdehlan he yin azọ́nplọn to Giliadi lẹ wá Curaçao to 1946, agun susu wẹ ko yin didoai to lopo lọ ji. Amọ́, owe depope ma ko yin lilẹdo Papiamento-Gbè mẹ to ojlẹ lọ mẹ. Opli agun tọn lẹ nọ yin bibasi to Glẹnsigbe po Papiamento-Gbè po mẹ bọ owe he to Pays-Bas-Gbè, Glẹnsigbe, po Espagne-Gbè po mẹ lẹ wẹ nọ yin yiyizan. Dile etlẹ yindọ mẹmẹsunnu lẹ doayi e go dọ yé do hudo owe he to Papiamento-Gbè mẹ lẹ tọn, aliglọnnamẹnu susu lẹ wẹ tin. Di apajlẹ, wezẹhomẹ depope ma tin to Papiamento-Gbè mẹ podọ nujinọtedo de ma tin gando lehe hogbe lẹ dona nọ yin kinkan do go. Mẹmẹsunnu Bill Yeatts yin dopo to mẹdehlan tintan he yin didohlan lopo lọ lẹ ji mẹ, podọ e gọalọ to azọ́n lẹdogbedevomẹ tọn lọ mẹ. Dile Annuaire Kunnudetọ Jehovah Tọn lẹ tọn na 2002 dohia do, mẹmẹsunnu lọ flin dọmọ: “Whenue mí to owẹ̀n Ahọluduta lọ tọn lá, mí dona nọ dọ kavi kàn nudelẹ he ma ko yin didọ kavi yin kinkan pọ́n to Papiamento-Gbè mẹ. E vẹawu taun nado ze nujinọtedo he yè dona hodo lẹ dai.” Mahopọnna nuhahun ehelẹ, mẹmẹsunnu lẹ zindonukọn to azọ́n lẹdogbedevomẹ tọn yetọn mẹ.

Owe tintan he yin lilẹdo Papiamento-Gbè mẹ wẹ owe pẹvi de he hosọ etọn yin La joie pour tous les hommes (Ayajẹ de Na Gbẹtọvi Lẹpo), ehe yin tadona to 1948. To godo mẹ, owe susu devo lẹ yin lilẹdogbedevomẹ, gọna linlinwe lọ lẹ Atọ̀họ̀-Nuhihọ́ lọ Tọn po Fọ́n! po. To alọnu, adà Lẹdogbedevomẹ Aihọn Yọyọ Tọn lọ tọn lẹ to yinyin didetọn debọdo-dego to Papiamento-Gbè mẹ. Owe Biblu tọn tintan he yin lilẹdogbedevomẹ wẹ owe Luti tọn, ehe yin didetọn to 1^er Octobre 2021.

Kọdetọn vivẹnudido ehelẹ tọn họnwun eyin yè mọ jideji sọha wẹnlatọ lẹ tọn he to nukọnzindo madoalọte to lopo ehelẹ ji. To 1956, whenue agun Papiamento-Gbè tọn tintan yin didoai, e tindo wẹnlatọ 16. To egbehe, wẹnlatọ 1 600 linlán wẹ to Jehovah sẹ̀n dopọ to agun Papiamento-Gbè tọn 25 he tin lẹ mẹ. To owhe 2023 gblamẹ, plọnmẹ Biblu 1 200 linlán wẹ yin anadena.

Mí deji dọ Jehovah na zindonukọn nado to didona vivẹnudido mẹmẹsunnu po mẹmẹyọnnu susu lẹ po tọn to aigba-denamẹ Papiamento-Gbè tọn ji, dile yé dike bọ hinhọ́n yetọn to wunhọ́n na gigo Jehovah tọn.—Matiu 5:16.