“Nukundagbe majẹhẹ ṣie ko pé we, na huhlọn ṣie to yinyin hinhẹn zun pipé to madogán towe mẹ.”—2 Kọlintinu lẹ 12:9, Lẹdogbedevomẹ Aihọn Yọyọ Tọn.

 “Ojọmiọn ṣie ko pé we, na madogán mẹ wẹ yè hẹn huhlọn ṣie sọgbe te.”—2 Kọlintinu lẹ 12:9, Biblu Wiwe lọ—Gun Alada.

 Jiwheyẹwhe dopà na apọsteli Paulu dọ, emi na na ẹn huhlọn he sin hudo e do nado doakọnna whlepọn po awugbopo etọn lẹ po.

 “Nukundagbe majẹhẹ ṣie ko pé we.” Gblọndo he Jiwheyẹwhe na odẹ̀ he Paulu hò pludopludo lẹ sọgan yin lilẹdo nukundagbe ṣie kẹdẹ sin hudo wẹ a do. To hogbe devo mẹ, nukundagbe majẹhẹ Jiwheyẹwhe tọn ko pé nado gọalọna Paulu na e nido doakọnna whlepọn etọn lẹ. Gbọnna? Hogbe lọ he yin lilẹdo “nukundagbe majẹhẹ,” kavi “ojọmiọn,” nọ zẹẹmẹdo nunina madonukun de he Jiwheyẹwhe nọ gbọn alọtútlú dali namẹ. Kandai Paulu tọn lẹ dohia dọ nukundagbe majẹhẹ Jiwheyẹwhe tọn hẹn ale susu wá na ẹn. Dile etlẹ yindọ homẹkẹndomẹtọ de wẹ Paulu yin dai, Jiwheyẹwhe na ẹn huhlọn he sin hudo e do nado diọ walọyizan etọn bọ e gọalọna mẹdevo lẹ nado lẹzun Klistiani. (1 Kọlintinu lẹ 15:9, 10; 1 Timoti 1:12-14) Paulu gán yí adọgbigbo do ganjẹ alọgọ Jiwheyẹwhe tọn go kavi nado duto to avùnnukundiọsọmẹnu etọn lẹ ji.

 “Na huhlọn ṣie to yinyin hinhẹn zun pipé to madogán towe mẹ.” Oklunọ Jehovah a flinnu Paulu dọ huhlọn Emitọn nọ họnwun hezeheze na gbẹtọvi mapenọ podọ madogannọ lẹ whenue emi yí i do gọalọna yé. (2 Kọlintinu lẹ 4:7; 12:8) Eyin Klistiani lẹ yọ́n dogbó yetọn bosọ biọ alọgọ Jehovah tọn, yé nọ na dotẹnmẹ huhlọn Jiwheyẹwhe tọn to gbẹzan yetọn mẹ to gigọ́ mẹ. (Efesunu lẹ 3:16; Filipinu lẹ 4:13) Gbọnmọ dali, Jiwheyẹwhe nọ do huhlọn etọn hia to madogán mítọn mẹ.

 Paulu kàn wekanhlanmẹ he yin gbigbọdo de hlan Klistiani he to Kọlinti lẹ to nudi 55 W.M. To wekanhlanmẹ etọn devo mẹ, e basi zẹẹmẹ dọ emi tindo aṣẹ lọ nado yin apọsteli de. E yin whinwhàn nado wàmọ na mẹdelẹ he ylọ yede dọ mẹplọntọ lẹ jẹ homọdọdego ji, vlavo na awusọhia etọn kavi na nugopipe hodidọ tọn etọn wutu.—2 Kọlintinu lẹ 10:7-10; 11:5, 6, 13; 12:11.

 Nado yíavunlọna ede, Paulu dohia dọ emi ma na ko penugo nado hẹn lizọnyizọn emitọn di bosọ doakọnna whlepọn voovo lẹ po huhlọn emitọn kẹdẹ po. (2 Kọlintinu lẹ 6:4; 11:23-27; 12:12) To weta 12​tọ mẹ, e dọ to yẹhiadonu-liho dọ ‘owùn de to agbasalan mẹ,’ bo nọ to awufiẹsa hẹn wá na emi to numọtolanmẹ-liho podọ to agbasa-liho mapote. (2 Kọlintinu lẹ 12:7) Nugbo wẹ dọ Paulu ma basi zẹẹmẹ nuhahun lọ tọn, amọ́, e magbe nado doakọnna ẹn po alọgọ Jiwheyẹwhe tọn po.

 To egbehe, Klistiani lẹ lọsu gán pehẹ awusinyẹnnamẹnu lẹ po homẹkẹn po. Yé nọ mọ homẹmiọnnamẹ yí to yinyọnẹn mẹ dọ huhlọn Jiwheyẹwhe tọn gán gọalọna yé nado duto avùnnukundiọsọmẹnu depope ji. Taidi Paulu, yé gán dọ po nujikudo po dọ: “whenue yẹn yin madogánnọ, whenẹnu wẹ yẹn yin huhlọnnọ.”—2 Kọlintinu lẹ 12:10.

 Pọ́n video kleun ehe nado mọ nue to owe 2 Kọlintinu lẹ tọn mẹ delẹ.