“To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:13, Lẹdogbedevomẹ Aihọn Yọyọ Tọn.

 “Yẹn sọgan wà onú popo gbọn Klisti he to huhlọnna mi mẹ.”—Filipinu lẹ 4:13, Biblu Wiwe lọ—Gun Alada.

 Hogbe enẹlẹ he yin kinkan gbọn apọsteli Paulu dali vọ́ jide na mẹhe nọ sẹ̀n Jiwheyẹwhe lẹ dọ yé na mọ huhlọn yí nado wà ojlo Etọn.

 Lẹdogbedevomẹ Biblu tọn delẹ dọ dọ Klisti wẹ mẹlọ he na huhlọn Paulu. Amọ́, hogbe lọ “Klisti” ma sọawuhia tofi to alọnuwe he dohó hugan Glẹkigbe tọn lẹ mẹ. Enẹwutu, lẹdogbedevomẹ egbezangbe tọn susu lẹ yí hogbe delẹ zan taidi “mẹlọ he nọ na mi huhlọn” (Lẹdogbedevomẹ Aihọn Yọyọ Tọn), “mẹhe nọ hẹn mi lodo” (New International Version) po “melọ he yin asisa huhlọn ṣie tọn” po (New American Bible). Eyin mọ wẹ, mẹnu wẹ Paulu do to ayiha mẹ?

 Lẹdo wefọ lọ tọn lẹ dohia dọ Jiwheyẹwhe wẹ Paulu to alọdlẹndo. (Filipinu lẹ 4:6, 7, 10) Paulu kannu hlan Filipinu lẹ jẹnukọn to wekanhlanmẹ ehe dopolọ mẹ dọmọ: “Jiwheyẹwhe wẹ yin mẹlọ he nọ dozolanmẹna mì . . . bosọ nọ na mì huhlọn nado yinuwa.” (Filipinu lẹ 2:13) Podọ to 2 Kọlintinu lẹ 4:7 mẹ, e wlan dọ Jiwheyẹwhe wẹ na emi huhlọn nado hẹn lizọnyizọn emitọn di. (Yijlẹdo 2 Timoti 1:8 go.) Enẹwutu, po whẹwhinwhẹ́n dagbe enẹlẹ po, mí sọgan wá tadona lọ kọ̀n dọ Jiwheyẹwhe wẹ Paulu to alọdlẹndo taidi “mẹlọ he nọ na mi huhlọn.”

 Etẹ na dọ wẹ Paulu te, to whenue e wlan dọ emi na mọ huhlọn yí “to nulẹpo mẹ”? E taidi dọ nuhe Paulu to alọdlẹndo wẹ ninọmẹ voovo he e pehẹ to whenue e to ojlo Jiwheyẹwhe tọn wà lẹ. Vlavo e tindo nususu to agbasa-liho kavi vude, e nọ ganjẹ Jiwheyẹwhe go nado mọ nukunpedomẹgo yí. Enẹwutu, Paulu plọn nado nọ do pekọ mahopọnna ninọmẹ etọn lẹ.—2 Kọlintinu lẹ 11:23-27; Filipinu lẹ 4:11.

 Hogbe Paulu tọn lẹ gán vọ́ jide na mẹhe nọ sẹ̀n Jiwheyẹwhe to egbehe lẹ. Jiwheyẹwhe na na yé huhlọn he yé do hudo etọn nado doakọnna whlepọn lẹ podọ nado wà ojlo etọn. Jiwheyẹwhe gán yí gbigbọ wiwe kavi huhlọn-yido-wazọ́n etọn do na huhlọn yé, podọ e sọ sọgan yí sinsẹ̀n-basitọ hatọ lẹ po Ohó etọn, Biblu po zan nado wàmọ.—Luku 11:13; Owalọ lẹ 14:21, 22; Heblu lẹ 4:12.

 Hogbe ehelẹ yin apadewhe hodidọ tadona tọn wekanhlanmẹ Paulu tọn hlan Klistiani he to Filipi lẹ. E kàn wekanhlanmẹ ehe to nudi owhe 60-61 W.M., enẹ wẹ ojlẹ he mẹ e yin wiwle sú whla tintan to Lomu. Na ojlẹ he tedidi etọn ma yin yọnẹn de, Klistiani he to Filipi lẹ ma penugo nado nọgodona apọsteli Paulu to agbasa-liho. Amọ́ todin, yé do nunina lẹ hlan Paulu nado súdo nuhudo etọn lẹ tọn.—Filipinu lẹ 4:10, 14.

 Paulu na pipà Klistiani Filipi tọn lẹ po zohunhun po na alọtútlú yetọn bosọ vọ́ jide na yé dọ emi tindo nuhe sin hudo emi do lẹ. (Filipinu lẹ 4:18) E sọ yí dotẹnmẹ hundote lọ zan nado dọ nugbo titengbe he gando gbẹzan Klistiani tọn zinzan go: Klistiani lẹpo, vlavo adọkunnọ kavi wamọnọ wẹ gán mọ pekọ nujọnu tọn eyin yé nọ ganjẹ Jiwheyẹwhe go nado mọ alọgọ.—Filipinu lẹ 4:12.