“To popolẹpo mẹ, mẹmẹsunnu lẹ emi, nudepope he yin nugbo, nudepope he jẹna yẹyi, nudepope he yin dodo, nudepope he yin wiwe, nudepope he jẹna owanyi, nudepope he yè nọ dọho etọn dagbe, nudepope he yin jijọ dagbe, podọ nudepope he jẹna pipà, mì nọ to onú ehelẹ lẹnpọn zọnmii.”—Filipinu lẹ 4:8, Lẹdogbedevomẹ Aihọn Yọyọ Tọn.

 “To popolẹpo mẹ, mì mẹmẹsunnu emì nudepope he yin nugbo, nudepope he yin yẹyi, nudepope he yin jijlọ, nudepope he yin wiwe, nudepope he yin owanyi, nudepope he do wẹndagbe; eyin jijọ dagbe de tin, eyin pipà de tin, mì nọ yí onú helẹ lẹnpọn.”—Filipinu lẹ 4:8, Biblu Wiwe lọ—Gun Alada.

 Jiwheyẹwhe nọ tindo ojlo to nuhe ji gbẹtọvi lẹ nọ lẹnnupọndo mẹ, na nuhe mí nọ lẹn lẹ wẹ nọ sisẹ́ mí nado yinuwa wutu. (Salmu lẹ 19:14; Malku 7:20-23) Enẹ wẹ zọ́n bọ mẹhe nọ jlo na hẹn homẹ Jiwheyẹwhe tọn hùn lẹ nọ gbẹ́ linlẹn he ylan to nukun etọn mẹ lẹ dai bo nọ lẹnnupọndo nuhe ewọ kẹalọyi lẹ ji.

 Wefọ ehe dọ nudagbe ṣinatọ̀n delẹ he ji Klistiani lẹ dona ‘nọ lẹnnupọndo,’ yèdọ nado nọ ze ayiha do yé ji whẹwhẹ.

•   “Nugbo.” Hogbe ehe to hodọ gando nuhe sọgbe bọ yè sọgan dejidego lẹ go, taidi nudọnamẹ he mí nọ mọ to Ohó Jiwheyẹwhe tọn, Biblu mẹ lẹ.—1 Timoti 6:20.

•   “He jẹna yẹyi.” Ehe to alọdlẹndo whẹho titengbe lẹ. E ma gando numadinu kavi nutata lẹ go. Kakatimọ, yé nọ gọalọna Klistiani lẹ bọ yé nọ magbe dogọ nado wà nuhe sọgbe.—Titu 2:6-8.

•   “Dodo.” Hogbe ehe to alọdlẹndo tito po nuyiwa he sọgbe hẹ nuhe Jiwheyẹwhe mọdọ e yin dagbe lẹ po go, e ma sinai do nuyọnẹn gbẹtọvi tọn he tindo dogbó ji.—Howhinwhẹn lẹ 3:5, 6; 14:12.

•   “Wiwe.” Hogbe ehe bẹ linlẹn po nuhe nọ sisẹ́ mẹ nado wà nuhe wé lẹ po hẹn, e ma yin to whẹho zanhẹmẹ tọn kẹdẹ mẹ, amọ́ to nulẹpo mẹ.—2 Kọlintinu lẹ 11:3.

•   “He jẹna owanyi.” Ehe to alọdlẹndo nuhe nọ hẹn awuvivi wá, he nọ zọ́n bọ mí nọ yiwannamẹ, e ma yin linlẹn wangbẹna, homẹgble kavi wiwọ́ tọn.—1 Pita 4:8.

•   “Dọho etọn dagbe.” Ehe to alọdlẹndo nuhe nọ zọ́n bọ mẹdevo lẹ nọ dọho dagbe gando oyín dagbe mẹde tọn go, ehe mẹhe nọ setonuna Jiwheyẹwhe lẹ gán kẹalọyi.—Howhinwhẹn lẹ 22:1.

•   “Jijọ dagbe.” Ehe to alọdlẹndo nuhe yin walọ dagbe bo sọgbe hẹ nuhe Jiwheyẹwhe mọdọ e yin dagbe lẹpo, bosọ nọ yin pinpọnhlan di nudagbe to aliho lẹpo mẹ.—2 Pita 1:5, 9.

•   “He jẹna pipà.” Ehe to alọdlẹndo nuhe jẹna pipà, titengbe to nukun Jiwheyẹwhe tọn mẹ lẹ. E sọ nọ gando azọ́n Jiwheyẹwhe tọn he jẹna pipà lẹ go, ehe ji gbẹtọvi lẹ dona nọ lẹnnupọndo.—Salmu lẹ 78:4.

 Owhé de gbè wẹ apọsteli Paulu yin ginglọndo to Lomu whenue e kàn owe ehe hlan Klistiani Filipi tọn lẹ. Etomọṣo, mẹhe nọ bayi zẹẹmẹ do Biblu ji delẹ ylọ owe lọ dọ “wekanhlanmẹ ayajẹ tọn de,” na ayajẹ tọ́n to owe lọ mẹ, bọ nuhe e bẹhẹn lẹ whànmẹ bosọ gọ́ na owanyi.—Filipinu lẹ 1:3, 4, 7, 8, 18; 3:1; 4:1, 4, 10.

 Paulu yiwanna mẹmẹsunnu po mẹmẹyọnnu etọn he to Filipi lẹ po, podọ e jlo dọ yé ni tindo ayajẹ po jijọho he ewọ lọsu do po. (Filipinu lẹ 2:17, 18) Enẹwutu, to adà godo tọn owe he e kàn hlan yé lọ tọn mẹ, e dọna yé nado nọ wleawuna jijọ he na zọ́n bọ yé na do ayajẹ bo yin lẹnpọn dagbenọ lẹ. E sọ dọna yé nado nọ ganjẹ Jiwheyẹwhe go whẹwhẹ to odẹ̀ mẹ, dọ yé ni nọ ze ayiha do nuhe na zọ́n bọ yé na vò sọn ahun mẹ bo nọ nọ̀ jijọho mẹ hẹ Jiwheyẹwhe lẹ ji.—Filipinu lẹ 4:4-9.

 Pọ́n video kleun ehe nado mọ nue to owe Filipinu lẹ tọn mẹ delẹ.