“Nọ ze nudepope he wà a te do alọmẹ na Jehovah, to whenẹnu, tito towe lẹ na nọ tindo kọdetọn dagbe.”—Howhinwhẹn lẹ 16:3, Lẹdogbedevomẹ Aihọn Yọyọ Tọn.

 “Yí azọ́n towe jo na OKLUNỌ, yè nasọ hẹn linlẹn towe lẹpo lodo.”—Howhinwhẹn lẹ 16:3, Biblu Wiwe lọ—Gun Alada.

 Howhinwhẹn ehe na jide mẹhe nọ sẹ̀n Jiwheyẹwhe nugbo lọ lẹ dọ tito yetọn lẹ na tindo kọdetọn dagbe eyin yé dejido ewọ go, gbọn anademẹ etọn lẹ dindin po hihodo yé po dali.

 “Nọ ze nudepope he wà a te do alọmẹ na Jehovah.” Sinsẹ̀n-basitọ Jehovah a tọn lẹ nọ gbọn whiwhẹ dali dín anademẹ etọn whẹpo do basi nudide depope. (Jakọbu 1:5) Etẹwutu? Whẹwhinwhẹ́n dopo wẹ yindọ, gbẹtọvi lẹ ma nọ saba penugo nado deanana nujijọ he nọ gando gbẹzan yetọn go lẹ to whepoponu. (Yẹwhehodọtọ 9:11; Jakọbu 4:13-15) Humọ, yé gán nọma do nuyọnẹn nado wà nuhe yé jlo lẹ. Na whẹwhinwhẹ́n ehelẹ wutu, mẹsusu nọ gbọn nuyọnẹn dali dejido Jiwheyẹwhe go kavi ze tito yetọn lẹ do alọmẹ na ẹn. Yé nọ wàmọ gbọn dẹ̀hiho hlan ẹn nado biọ anademẹ etọn dali, bosọ nọ yinuwa sọgbe hẹ ojlo etọn dile e te do to Ohó etọn Biblu mẹ.—Howhinwhẹn lẹ 3:5, 6; 2 Timoti 3:16, 17.

 To paa mẹ, hogbe lọ “yí azọ́n towe jo na OKLUNỌ b” nọ zẹẹmẹdo “ze azọ́n towe lẹ dlan OKLUNỌ ji.” Sọgbe hẹ owe alọdlẹndonu tọn de, hogbe ehelẹ nọ bẹ linlẹn “dawe de he bli agbàn pinpẹn he e hẹn do nẹgbé dlan do nẹgbé mẹdevo he dohuhlọn bosọ penugo nado hẹn agbàn lọ hugan ewọ tọn de ji” tọn hẹn. Mẹhe nọ gbọn whiwhẹ dali ganjẹ Jiwheyẹwhe go lẹ gán kudeji dọ ewọ na gọalọna yé bosọ penukundo yé go.—Salmu lẹ 37:5; 55:22.

 Hogbe lọ “azọ́n towe” ma zẹẹmẹdo dọ Jiwheyẹwhe na kẹalọyi nuhe gbẹtọ lẹ nọ wà lẹpo kavi dona tito yetọn lẹpo. Eyin Jehovah na dona yé, tito yetọn lẹ dona sọgbe hẹ nujinọtedo etọn lẹ bosọ sọgbe hẹ ojlo etọn. (Salmu lẹ 127:1; 1 Johanu 5:14) Jiwheyẹwhe ma nọ dona tito tolivẹtọ lẹ tọn. Nado dọ hójọhó, “e nọ hẹn tito mẹylankan lẹ tọn gble.” (Salmu lẹ 146:9) To ojlẹ dopolọ mẹ, e nọ nọgodona mẹhe nọ litaina ẹn bo nọ nọgbẹ̀ sọgbe hẹ nujinọtedo he e ko zedai to Biblu mẹ lẹ.—Salmu lẹ 37:23.

 “To whenẹnu, tito towe lẹ na nọ tindo kọdetọn dagbe.” Lẹdogbedevomẹ delẹ lilẹ́ hogbe ehelẹ do “yè na sọ hẹn linlẹn towe lẹpo lodo.” To Owe-wiwe Heblu tọn kavi nuhe mẹsusu nọ ylọdọ Alẹnu Hoho lọ mẹ, hogbe he yin lilẹdo “lodo” to Gungbe mẹ nọ bẹ linlẹn lọ nado do dodonu de ai hẹn, podọ e nọ saba dlẹnalọdo lehe nuhe Jehovah dá lẹ lodo do. (Howhinwhẹn lẹ 3:19; Jelemia 10:12) Mọdopolọ, Jiwheyẹwhe na hẹn tito mẹhe nọ wà nuhe sọgbe to nukun etọn mẹ lẹ tọn lodo gligli, gbọn alọgigọna yé nado zan gbẹzan he tindo hihọ́, vivomẹninọ po ayajẹ po dali.—Salmu lẹ 20:4; Howhinwhẹn lẹ 12:3.

 Ahọlu Sọlomọni wẹ kàn Howhinwhẹn ehe, yèdọ mẹhe kàn suhugan nuhe to owe Howhinwhẹn lẹ tọn mẹ lẹ tọn. E penugo nado pà Howhinwhẹn fọtọ́n susu lẹ na nuyọnẹn he Jiwheyẹwhe na ẹn wutu.—1 Ahọlu lẹ 4:29, 32; 10:23, 24.

 To weta 16​tọ lọ mẹ, nado bẹjẹeji Sọlomọni do obá he mẹ nuyọnẹn Jiwheyẹwhe tọn họakuẹ jẹ hia, bosọ dohia dọ emi gbẹwanna goyiyi. (Howhinwhẹn lẹ 16:1-5) Enẹgodo, weta lọ gọalọna wehiatọ lẹ nado mọnukunnujẹ nuplọnmẹ titengbe he sọawuhia to owe Howhinwhẹn lẹ tọn mẹ whlasusu de mẹ, enẹ wẹ yindọ: Gbẹtọvi lẹ gán yin nuyọnẹntọ nugbonugbo bosọ tindo kọdetọn dagbe eyin yé yin whiwhẹnọ bo dike Jiwheyẹwhe ni deanana afọdide yetọn lẹ. (Howhinwhẹn lẹ 16:3, 6-8, 18-23) Nugbo dodonu tọn ehe sọawuhia whlasusu to Biblu mẹ.—Salmu lẹ 1:1-3; Isaia 26:3; Jelemia 17:7, 8; 1 Johanu 3:22.

 Pọ́n video kleun ehe nado mọ nue to owe Howhinwhẹn lẹ tọn mẹ delẹ.