“Hiẹ na nọ basi hihọ́na mẹhe nọ ganjẹ gowe mlẹnmlẹn lẹ; hiẹ na na yé jijọho tẹgbẹ tọn, na hiẹ go wẹ yé dejido wutu.”—Isaia 26:3, Lẹdogbedevomẹ Aihọn Yọyọ Tọn.

 “Hiẹ na yí i whla to jijọho pipé mẹ, ayiha mẹhe tọn nọte do gowe: na e dotudo gowe wutu.”—Isaia 26:3, Biblu Wiwe lọ—Gun Alada.

 Po hogbe jidevọnamẹ tọn ehelẹ po, yẹwhegán Isaia dohia dọ Jiwheyẹwhe nọ basi hihọ́na mẹhe dejido Ewọ go mlẹnmlẹn lẹpo. E nọ wàmọ gbọn alọgigọna omẹ mọnkọ lẹ nado tin to jijọho po hihọ́ po mẹ dali.

 “Hiẹ na nọ basi hihọ́na mẹhe nọ ganjẹ gowe mlẹnmlẹn lẹ.” Adà wefọ lọ tọn ehe to hodọ gando mẹhe magbe mlẹnmlẹn to ahun yetọn mẹ nado dejido Jehovah a Jiwheyẹwhe go to whelẹponu lẹ go. Mẹhe nọ dejido Jiwheyẹwhe go lẹ yọnẹn dọ emi dona nọ ganjẹ ewọ go. Di apajlẹ, yé ma nọ ganjẹ linlẹn yetọn titi go whenue yé to nudide titengbe lẹ basi. Kakatimọ, yé nọ ze nuhe wà yé te lẹpo sinai do alihọ nulẹnpọn tọn Jiwheyẹwhe tọn lẹ ji. (Howhinwhẹn lẹ 3:5, 6) Yé nọ gbadopọnna pọndohlan Jiwheyẹwhe tọn gando whẹho de go, gbọn sọwhiwhe yíyí do hia Ohó etọn Biblu dali, bọsọ nọ lẹnayihamẹpọn sisosiso do nuhe yé hia lẹ ji. (Salmu lẹ 1:2; 119:15) Whenue yé to pipehẹ ninọmẹ sinsinyẹn lẹ, yé nọ hodẹ̀ ahundopo hlan Jehovah bosọ nọ biọ alọgọ etọn. (Salmu lẹ 37:5; 55:22) Gbọnmọ dali, yé nọ do jidide yetọn to Jiwheyẹwhe mẹ hia podọ taidi kọdetọn de ewọ nọ na yé jijọho.

 “Hiẹ na na yé jijọho tẹgbẹ tọn.” To Heblugbe dowhenu tọn lọ mẹ, hogbe lọ “jijọho” sọawuhia whla awe na nùzindonuji wutu; enẹwutu nado do nùzindonuji lọ hia, hogbe ehe sọgan yin lilẹdo “jijọho tẹgbẹ tọn,” “jijọho nujọnu tọn,” kavi “jijọho pipé.” To hogbe devo mẹ, mẹhe dejido Jehovah go mlẹnmlẹn lẹ nọ duvivi jijọho nujọnu tọn, yèdọ jijọho ahun mẹ tọn mahopọnna ninọmẹ yetọn lẹ. (Salmu lẹ 112:7; 119:165) Haṣinṣan pẹkipẹki de tintindo hẹ Jehovah gọna vivẹnudido nado wà nuhe sọgbe to nukun etọn mẹ wẹ nọ hẹnmẹ tindo jijọho mọnkọ.—Howhinwhẹn lẹ 3:32; Isaia 48:18.

 “Jijọho tẹgbẹ tọn” ehe ma dohia dọ Jiwheyẹwhe nọ de sinsẹ̀n-basitọ etọn lẹ sọn nuhahun lẹpo mẹ, bosọ nọ de yé sọn magbọjẹ wunmẹ lẹpo mẹ wẹ gba. (1 Samuẹli 1:6, 7; Jobu 6:1, 2; Salmu lẹ 31:9) Kakatimọ, e nọ gọalọna yé nado doakọnna nuhahun yetọn lẹ. (Isaia 41:10, 13) E nọ na gblọndo odẹ̀ yetọn lẹ, bo nọ na yé nuyọnẹn, huhlọn bosọ nọ miọnhomẹna yé. (Salmu lẹ 94:19; Howhinwhẹn lẹ 2:6; Isaia 40:29) Taidi kọdetọn de, yé gán ze ayiha do fidopo etlẹ yin to ninọmẹ sinsinyẹn lẹ mẹ.—Filipinu lẹ 4:6, 7.

 Yẹwhegán Isaia nọgbẹ̀ to gblagbla owhe Kanweko ṣinatọntọ J.W.M. To owhe enẹlẹ po dehe bọdego lẹ po gblamẹ, mẹsusu to Juda wẹ ma sẹ̀n Jehovah Jiwheyẹwhe po nugbonọ-yinyin po. Taidi kọdetọn de, Jehovah dike bọ Jelusalẹm he yin tatọ́-tònọ yetọn yin vivasudo to 607 J.W.M.

 Etomọṣo, hugan owhe kanweko jẹnukọnna vasudo lọ, Isaia kàn ohàn pipà tọn dọdai tọn de hlan Jehovah to weta 26​tọ mẹ. (Isaia 26:1-6) Ohàn enẹ dlẹnalọdo sọgodo de he whenu tòdaho de to aigba Juda tọn ji, he sọgan ko yin Jelusalẹm, na yin vivọgbá tọn.

 Jelusalẹm yin vivọgbá to owhe he bọdo 537 J.W.M lẹ go. Na tòdaho lọ yin vivọgbá wutu, Ju nugbonọ he lẹkọ sọn kanlinmọgbenu lẹ sọgan ko tindo numọtolanmẹ hihọ́ tọn sọmọ bo dọmọ: “Mí tindo tòdaho huhlọnnọ de.” (Isaia 26:1) Ṣigba, e ma yin adó gángán tòdaho lọ tọn lẹ wẹ hẹn ẹn yin huhlọnnọ gba. Kakatimọ, dona po hihọ́-basinamẹ Jehovah tọn po ji wẹ tòdaho lọ sinai do.—Isaia 26:2.

 Mọ wẹ e te to egbehe lọsu ga. Mẹhe nọ dejido Jehovah go mlẹnmlẹn lẹ nọ do numọtolanmẹ hihọ́ tọn na yé nọ pọ́n ẹn hlan di “Osé,” kavi fibẹtado yetọn wutu.—Isaia 26:4.

 Pọ́n video kleun ehe nado mọ nue to owe Isaia tọn mẹ delẹ.