“Ṣigba, mẹhe ze todido yetọn do Jehovah mẹ lẹ na vọ́ huhlọn mọyi. Yé na yí awà lẹ do zlọn taidi akùn lẹ. Yé na họ̀nwezun bọ onú ma na ṣikọna yé; Yé na zinzọnlin bọ agbọ́ ma na pé yé.”—Isaia 40:31, Lẹdogbedevomẹ Aihọn Yọyọ Tọn.

 “Ṣigba mẹhe nọtepọn OKLUNỌ lẹ na vọ́ huhlọn yetọn jlado; yé na yí awà do hẹ́ aga di akùn; yé na dowezun, onú ma na dikọna yé; yé na zinzọnlin, bo ma na yọ́n nudikọ.”—Isaia 40:31, Biblu Wiwe lọ—Gun Alada.

 Jehovah a Jiwheyẹwhe dopà na mẹhe nọ sẹ̀n ẹn lẹ dọ emi na na yé huhlọn he sin hudo yé do nado doakọnna nuhahun depope bosọ duto e ji.

 “Mẹhe ze todido yetọn do Jehovah mẹ lẹ na vọ́ huhlọn mọyi.” Mẹhe do todido kavi yọnẹn dọ Jiwheyẹwhe dohuhlọn bosọ jlo na gọalọna omẹ etọn lẹ gán deji dọ e na nọgodona yé. (Howhinwhẹn lẹ 3:5, 6) Dopo to nuhe Jiwheyẹwhe gán zan nado na huhlọn mẹhe nọ sẹ̀n ẹn lẹ mẹ wẹ gbigbọ wiwe kavi huhlọn-yido-wazọ́n etọn.—Luku 11:13.

 “Yé na yí awà lẹ do zlọn taidi akùn lẹ.” Nuyijlẹdonugo ehe do lehe huhlọn Jiwheyẹwhe tọn gán yinuwado mẹde ji do hia. Akùn nọ ganjẹ jẹhọn gbigblọ de he nọ yin thermiques go nado zlọn ganji. Eyin akùn mọ jẹhọn gbigblọ ehe, e nọ kẹ̀ awà etọn lẹ bo nọ lilẹ́ gbọn jẹhọn lọ mẹ bosọ nọ to aga yì. Eyin akùn to tintọ́n sọn jẹhọn gbigblọ ehe mẹ bosọ to devo mẹ biọ, e gán zlọn gbọn jẹhọn mẹ na gànhiho susu bọ agbọ́ ma na pé e gbau.

 “Yé na họ̀nwezun bọ onú ma na ṣikọna yé.” Nuhahun he mí nọ pehẹ to gbẹ̀mẹ lẹ gán zọ́n bọ onú na ṣikọna mí, amọ́ huhlọn he Jiwheyẹwhe nọ na mí gán gọalọna mí nado to akọndonanu zọnmii. E gán na mí huhlọn nado wà nue sọgbe mahopọnna lehe nuhahun he pehẹ mí te lẹ sinyẹn sọ. Apọsteli Paulu pehẹ whlepọn sinsinyẹn lẹ, ṣogan e wlan dọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:13.

 Jiwheyẹwhe gbọdo yẹwhegán Isaia nado kàn hogbe ehelẹ to owhe kanweko ṣinatọ̀ntọ J.W.M. Nugbo wẹ dọ wefọ ehe gando nugbonọ he nọ sẹ̀n Jiwheyẹwhe lẹpo go, amọ́ Jehovah gán ko yí hogbe he to wefọ lọ mẹ lẹ zan nado na tuli Juvi he yè na wle yì Babilọni na owhe 70 lẹ. Whenue Juvi lọ lẹ lẹkọ sọn kanlinmọgbenu, yé mọdọ ohó Jiwheyẹwhe tọn lẹ mọ hẹndi. (Isaia 40:1-3) Zọnlinzinzin sọn Babilọni yì Jelusalẹm ma bọawu paali, ṣigba Jiwheyẹwhe na yé huhlọn nado zinzọnlin b gbọn ali gaa enẹ ji to 537 J.W.M.—Isaia 40:29.