“Be yẹn ma ko degbena we ya? Yin adọgbotọ bo yin huhlọnnọ. Ahun towe gbàdo kavi a dibu blo, na Jehovah Jiwheyẹwhe towe tin hẹ we to fidepope he hiẹ na yì.”—Jọṣua 1:9, Lẹdogbedevomẹ Aihọn Yọyọ Tọn.

 “Yẹn ma ko degbena we? Yin huhlọnnọ po tudotọ dagbe de tọn po; a yin avosatọ blo, a sọ yin butọnọ blo: na OKLUNỌ Jiwheyẹwhe towe tin po hiẹ po to ofi hiẹ yìyì depope.”—Jọṣua 1:9, Biblu Wiwe lọ—Gun Alada.

 Po hogbe ehelẹ po, Jehovah a Jiwheyẹwhe hẹn Jọṣua he nọ sẹ̀n ẹn po nugbonọ-yinyin po deji dọ e gán “yin adọgbotọ bo yin huhlọnnọ” eyin e pannukọn ninọmẹ sinsinyẹn lẹ he taidi aliglọnnamẹnu he húagbọ́ mẹ lẹ. Jọṣua ma do whẹwhinwhẹ́n depope nado dibu na nue na jọ to sọgodo eyin e setonuna gbedide Jiwheyẹwhe tọn lẹ, na e na taidi dọ Jehovah to apá na ẹn bo to alọgọna ẹn nido pà ẹ wẹ nkọ. Jiwheyẹwhe tin po Jọṣua po bo to anademẹ lẹ na ẹn bosọ na ẹn huhlọn nado gbawhàn kẹntọ etọn lẹ tọn.

 Nawẹ Jọṣua gán “yin adọgbotọ bo yin huhlọnnọ” gbọn? E sọgan mọ adọgbigbo po huhlọn po yí sọn owe gbọdo he Jehovah ko wleawuna to ojlẹ enẹ mẹ lẹ mẹ. Ehe bẹ “Osẹ́n he Mose devizọnwatọ [Jehovah tọn] ko degbe etọn na [Jọṣua] lẹpo” hẹn. b (Jọṣua 1:7) Jehovah dọna Jọṣua nado nọ “yí ogbè dẹẹdẹ do hia ẹ [“lẹnayihamẹpọn to e mẹ”, Biblu Wiwe lọ—Gun Alada] to okle po ozán po.” (Jọṣua 1:8) Wehihia po ayihamẹlinlẹnpọn mọnkọ po na huhlọn ayiha po ahun Jọṣua tọn po nado wà ojlo Jiwheyẹwhe tọn. Enẹwutu, Jọṣua dona yinuwa do nuhe e ko plọn to Ohó Jiwheyẹwhe tọn mẹ lẹ ji, nado “yí sọwhiwhe do yìn nuhe yin kinkan do e mẹ lẹpo.” Eyin e wàmọ, whenẹnu wẹ e na yinuwa po nuyọnẹn po bọ e na pà ẹ. Podọ mọ wẹ e ka sọ yì do pẹpẹ. Dile etlẹ yindọ Jọṣua pehẹ whlepọn lẹ, e nọgbẹ̀ dẹn bo zan gbẹzan dagbe de, na e sẹ̀n Jehovah po nugbonọ-yinyin po wutu.—Jọṣua 23:14; 24:15.

 Ohó he Jehovah dọna Jọṣua lẹ gbẹ́ nọ na mí tuli to egbehe. Yé do obá he mẹ Jehovah nọ hò mẹhe nọ sẹ̀n ẹn lẹpo tọn jẹ hia, titengbe eyin yé to pipehẹ ninọmẹ he kàn dẹpẹ biọ lẹ. E jlo dọ ni pà yé kẹdẹdile e yin na Jọṣua do! Podọ taidi Jọṣua, yé gán “yin adọgbotọ bo yin huhlọnnọ” eyin yé nọ hia Ohó Jiwheyẹwhe tọn, Biblu bo nọ lẹnayihamẹpọn do e ji whẹwhẹ bosọ nọ yinuwa to kọndopọ mẹ hẹ anademẹ etọn lẹ.

 To okú Mose tọn godo, Jehovah na anademẹ dọ Jọṣua ni yin nukọntọ na akọta Islaeli tọn. To ojlẹ enẹ mẹ, Islaelivi lẹ ko wleawufo nado yì Aigba Pagbe tọn lọ ji, enẹ wẹ aigba Kenani tọn. Ṣigba, yé dona hoavùn hẹ kẹntọ huhlọnnọ lẹ. Di apajlẹ, Jọṣua dona tọ́nawhàn Kenaninu lẹ, yèdọ akọta he ylan taun lẹ. c (Deutelonomi 9:5; 20:17, 18) Kenaninu lẹ sù taun bosọ yọ́n awhànfun ganji hú Islaelivi lẹ. (Jọṣua 9:1, 2; 17:18) Amọ́, Jọṣua yí adọgbigbo do hodo anademẹ he Jehovah na ẹn lẹ. Podọ Jiwheyẹwhe dohia nugbo dọ emi tin po e po, na Islaelivi lẹ gbawhàn suhugan kẹntọ yetọn lẹ tọn to owhe ṣidopo poun gblamẹ.—Jọṣua 21:43, 44.