ZẸẸMẸ WEFỌ BIBLU TỌN LẸ TỌN
Jelemia 33:3—“Mì Ylọ Mi, Yẹn Nasọ Gblọnna Mì”
“Mì ylọ mi, yẹn nasọ gblọnna mì bo na dọ nujiawu po nuhe gẹdẹ he mìwlẹ ma ko yọnẹn lẹ po na mì sọn ojlo mẹ wá.”—Jelemia 33:3, Lẹdogbedevomẹ Aihọn Yọyọ Tọn.
“Dawha ylọ hlan dè e, yẹn nasọ siọ we, bosọ do onú dahodaho lẹ po sinsinawu lẹ po hia we, he hiẹ ma yọnẹn.”—Jelemia 33:3, Biblu Wiwe lọ—Gun Alada.
Zẹẹmẹ Jelemia 33:3 Tọn
Po hogbe ehelẹ po, Jiwheyẹwhe to oylọ-basina gbẹtọvi lẹ nado nọ hodẹ̀ hlan ewọ. Eyin mẹhe e to oylọ-basina lẹ kẹalọyi oylọ-basinamẹ lọ bo nọ hodẹ̀ hlan ẹn, ewọ na do nuhe na jọ to sọgodo lẹ hia yé.
“Mì ylọ mi, yẹn nasọ gblọnna mì.” Hodidọ lọ “mì ylọ mi” ma zẹẹmẹdo nado ylọ Jiweyẹwhe kavi dawha ylọ oyín etọn poun gba. Kakatimọ to linlẹn de mẹ, e zẹẹmẹdo nado biọ alọgọ po anademẹ Jiwheyẹwhe tọn po to odẹ̀ mẹ.—Salmu lẹ 4:1; Jelemia 29:12.
E yọnbasi dọ akọta Islaeli hohowhenu tọn wẹ mọ oylọ-basinamẹ ehe yí. Akọta enẹ masọ yin nugbonọ na Jiwheyẹwhe ba, podọ ehe zọ́n bọ awhànpa Babilọni tọn tọ́n awhàn yé. (Jelemia 32:1, 2) Jehovah a basi oylọna Islaelivi lẹ nado lẹkọwa ewọ dè gbọn dẹ̀hiho hlan ewọ dali.
“Yẹn nasọ . . . dọ nujiawu po nuhe gẹdẹ he mìwlẹ ma ko yọnẹn lẹ po na mì sọn ojlo mẹ wá.” Nuhe Jiwheyẹwhe dopà nado dehia lẹ “gẹdẹ” (kavi vẹawu nado mọnukunnujẹemẹ) to linlẹn lọ mẹ dọ, gbẹtọvi lẹ ma sọgan mọnukunnujẹ yé mẹ na yede. Hodidọ lọ “nuhe gẹdẹ” sọgan yin lilẹdo “nuhe whlá lẹ.”
“Nuhe whlá” tẹlẹ wẹ Jiwheyẹwhe na dehia? Nujijọ he na wá aimẹ to sọgodo lẹ wẹ, vasudo po vọjijẹ tòdaho Jelusalẹm hohowhenu tọn lọ tọn po, gọna hẹngọwa etọn to godo mẹ. (Jelemia 30:1-3; 33:4, 7, 8) Amọ́, Jiwheyẹwhe sọ dopà dọ sinsẹ̀n-basitọ emitọn lẹ taidi akọta de ma na dọ̀n.—Jelemia 32:36-38.
Nujijọ He Lẹdo Jelemia 33:3 Lẹ
Yẹwhegán Jelemia mọ owẹ̀n ehe yí sọn Jehovah dè to owhe 608 J.W.M., to owhe aotọ gandudu Ahọlu Zedekia tọn whenu. Jelemia ko dọ dọdai dọ Jelusalẹm na jai podọ zedekia na yin wiwle di kanlinmọ. Na ahọlu lọ ma yiwanna owẹ̀n lọ wutu, e degbe dọ Jelemia ni yin wiwle sú.—Jelemia 32:1-5; 33:1; 37:21.
Nujijọ ehelẹ whenu wẹ oylọ-basinamẹ he to Jelemia 33:3 mẹ yin bibasi. E blawu dọ, Ahọlu Zedekia po suhugan akọta lọ tọn po gbẹ́ zindonukọn to atẹṣiṣi yetọn mẹ. (Jelemia 7:26; 25:4) Yé ma hodẹ̀ hlan Jiwheyẹwhe nado biọ anademẹ etọn. To owhe dopo godo, gánzinpo yin yíyí sọn Zedekia si, Jelusalẹm yin vivasudo, podọ suhugan mẹhe luntọ́n lẹ tọn yin wiwle yì Babilọni.—Jelemia 39:1-7.
Hogbe he yin kinkandai to Jelemia 33:3 mẹ lẹ flinnu wehiatọ lẹ to egbehe dọ Jiwheyẹwhe nọ na “oyọnẹn he pegan ojlo etọn tọn” bosọ nọ de “onú sisosiso” lẹ hia mẹhe nọ hodẹ̀ hlan ẹn bo nọ plọn Ohó etọn Biblu lẹ. (Kolosinu lẹ 1:9; 1 Kọlintinu lẹ 2:10) Onú sisosiso ehelẹ bẹ nuhe Jiwheyẹwhe dopà nado wà to sọgodo lẹ hẹn.—Osọhia 21:3, 4.
Pọ́n video kleun ehe nado mọ nue to owe Jelemia tọn mẹ delẹ.
a Jehovah wẹ yinkọ Jiwheyẹwhe tọn. (Salmu lẹ 83:18) Hia hosọ lọ “Mẹnu Wẹ Yin Jehovah?”
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Be Jiwheyẹwhe Na Gọalọna Mi Eyin N’hodẹ̀ Ya?
Be onú mítọn nọ duahunmẹna Jiwheyẹwhe nugbonugbo ya?
NUPLỌNMẸ TANGAN BIBLU TỌN LẸ
Be Jiwheyẹwhe Nọ Sè Odẹ̀ Lẹpo Wẹ Ya?
Eyin ṣejannabi wẹ nọ sisẹ́ mẹde nado hodẹ̀ lo? Bọ eyin mẹde ylanhùn do asi ẹ go bo wá hodẹ̀ dọ Jiwheyẹwhe ni dona emi lo?
GBLỌNDO NA KANBIỌ SINAI DO BIBLU JI LẸ
Lehe Mí Na Nọ Hodẹ̀ Do—Be Odẹ̀ Oklunọ Tọn lọ Janwẹ Mí Dona Nọ Hò Ya?
Be odẹ̀ Otọ́ Mítọn tọn lọ wẹ yin odẹ̀ dopo gee he Jiwheyẹwhe nọ kẹalọyi ya?
NUHE BIBLU PLỌN MÍ
Azọ́nwanu Biblu Pinplọn Tọn Lẹ
De azọ́nwanu he a nado plọn Biblu po awuvivi po to aliho debọdo-dego tọn mẹ lẹ.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.
