“Yẹn dọ onú ehelẹ na mì, na gbọn yẹn gblamẹ, mì nido sọgan tindo jijọho. To aihọn mẹ, mì na nọ tindo nukunbibia, ṣigba mì gboadọ! N’ko gbawhàn aihọn tọn.”—Johanu 16:33, Lẹdogbedevomẹ Aihọn Yọyọ Tọn.

 “Onú helẹ wẹ yẹn ko nọ dọ hlan mì, na mì nido tindo jijọhọ to yẹn mẹ. To aihọn mẹ mì na tindo tukla: ṣigba mì deji; yẹn ko gbawhàn aihọn tọn.”—Johanu 16:33, Biblu Wiwe lọ—Gun Alada.

 Jesu yí hogbe ehelẹ do vọ́ jide na hodotọ etọn lẹ dọ, yelọsu gán hẹn homẹ Jiwheyẹwhe tọn hùn po kọdetọn dagbe po, eyin yé tlẹ pehẹ whlepọn po nukundiọsọmẹ lẹ po.

 “Yẹn dọ onú ehelẹ na mì, na gbọn yẹn gblamẹ a, mì nido sọgan tindo jijọho.” Pipotọ wefọ lọ tọn dohia dọ jijọho ehe ma zẹẹmẹdo dọ nuhahun na hán to gbẹzan mẹde tọn mẹ. Kakatimọ, jijọho de wẹ he nọ zọ́n bọ yè nọ vò sọn ahun po ayiha po mẹ. Yè nọ mọ jijọho ahun mẹ tọn ehe “gbọn” Jesu gblamẹ, mẹhe dopà nado do gbigbọ wiwe hlan hodotọ etọn lẹ. “Alọgọtọ” huhlọnnọ ehe na zọ́n bọ devi Jesu tọn lẹ na duto nuhahun depope he yé na pehẹ ji.—Johanu 14:16, 26, 27.

 “To aihọn mẹ, mì na nọ tindo nukunbibia, ṣigba mì gboadọ!” Jesu dọ hójọhó na devi etọn lẹ dọ yé na pehẹ whlepọn lẹ taidi, whẹdida mawadodo po homẹkẹn po. (Matiu 24:9; 2 Timoti 3:12) Mahopọnna enẹ, yé gán “gboadọ” kavi “deji.”—Johanu 16:33, Biblu Wiwe lọ—Gun Alada.

 “N’ko gbawhàn aihọn tọn.” Hogbe lọ “aihọn” tofi to alọdlẹndo ogbẹ́ gbẹtọvi mawadodonọ lẹ tọn he jẹla sọn Jiwheyẹwhe dè. b 1 Johanu 5:19 dọ dọ: “Aihọn lọ pete tin to huhlọn mẹylankan lọ,” kavi Satani tọn glọ. Enẹwutu, mẹhe to “aihọn” ehe mẹ lẹ ma nọ lẹnnupọn sọgbe hẹ ojlo Jiwheyẹwhe tọn, mọ wẹ yé sọ nọ yinuwa jẹagọdo ojlo etọn do niyẹn.—1 Johanu 2:15-17.

 Satani po aihọn etọn po tẹnpọn nado glọnalina Jesu nado wà ojlo Jiwheyẹwhe tọn he yindọ Jesu ni plọnnu mẹdevo lẹ gando Jiwheyẹwhe go bo ze ogbẹ̀ pipé etọn jo taidi ofligọ de. (Matiu 20:28; Luku 4:13; Johanu 18:37) Amọ́, Jesu ma dike aihọn ehe ni yinuwado nulẹnpọn etọn ji bo sisẹ́ ẹ nado gbẹ́ ojlo Jiwheyẹwhe tọn wiwà dai. E yin nugbonọ etlẹ yin kakajẹ okú. Enẹ wẹ zọ́n bọ Jesu gán dọ dọ emi ko gbawhàn aihọn tọn, podọ Satani he yin “ogán aihọn tọn” matindo “huhlọn do” e ji.—Johanu 14:30.

 Jesu yí apajlẹ ede tọn zan nado dohia hodotọ etọn lẹ dọ yelọsu gán yin nugbonọ na Jiwheyẹwhe etlẹ yin to whenue tenọgligo-hinhẹn yetọn yin whiwhlepọn. Jesu to didọ na yé to aliho de mẹ dọ: “Eyin yẹn gán gbawhàn aihọn tọn, mìlọsu gán wàmọ.”

 Jesu dọ ohó ehelẹ to ozán he jẹnukọnna okú etọn mẹ. Na e yọnẹn dọ emi na kú to madẹnmẹ wutu, e yí dotẹnmẹ lọ zan nado na ayinamẹ godo tọn apọsteli nugbonọ etọn lẹ. E dọ nugbo titengbe delẹ he ji yé dona lẹnnupọndo: Yé ma nasọ mọ ẹn ba, podọ yè na do homẹkẹn yé bọ yé na tlẹ yin hùhù. (Johanu 15:20; 16:2, 10) Na ohó ehe gán dobuna apọsteli etọn lẹ wutu, Jesu yí hodidọ tadona tọn he to Johanu 16:33 do na tuli yé bosọ vọ́ jide na yé.

 Hodidọ Jesu tọn po apajlẹ etọn po gán na tuli hodotọ etọn lẹ to egbehe ga. Klistiani lẹpo wẹ gán yin nugbonọ na Jiwheyẹwhe mahopọnna nukunbibia lẹ.