“Gbẹtọ E, ewọ ko dọ nuhe yin dagbe na we. Podọ etẹwẹ Jehovah to bibiọ sọn asi we? Kiki nado nọ yí whẹdida dodo zan, nado yiwanna nugbodidọ, podọ nado nọ yí whiwhẹ do zinzọnlin hẹ Jiwheyẹwhe towe!”—Mika 6:8, Lẹdogbedevomẹ Aihọn Yọyọ Tọn.

 “Hiẹ dawe, ewọ ko do nuhe yin dagbe hia we; podọ etẹwẹ OKLUNỌ to kinkanbiọ sọn dè we, adavo nado nọ yí nugbo do wà, podọ nado yiwanna lẹblanu, podọ nado nọ yí whiwhẹ do zinzọnlin po Jiwheyẹwhe towe po.”—Mika 6:8, Biblu Wiwe lọ—Gun Alada.

 Yẹwhegán Mika dohia dọ e ma vẹawu gbau na gbẹtọvi de nido hẹn homẹ Jehovah a Jiwheyẹwhe tọn hùn. (1 Johanu 5:3) Wefọ ehe bẹ hodidọ atọ̀n delẹ hẹn he bayi bladopọ nuhe Jiwheyẹwhe nọ donukun sọn mí si lẹ tọn. Hodidọ awe he jẹnukọn lẹ zinnudo lehe mẹde gán yinuwa hẹ gbẹtọ hatọ etọn do ji bọ atọ̀ntọ lọ uwọ dọho gando họntọnjiji hẹ Jiwheyẹwhe go.

 “Nọ yí whẹdida dodo zan.” Jiwheyẹwhe biọ to mẹhe nọ sẹ̀n ẹn lẹ si nado nọ yinuwa po dodo po. Mọwiwa nọ biọ dọ mí ni nọ lẹnnupọn bosọ nọ wànu sọgbe hẹ nue Jiwheyẹwhe dọ gando dagbe po oylan po go lẹ. (Deutelonomi 32:4) Di apajlẹ, mẹhe nọ setonuna nue Jiwheyẹwhe dọ lẹ nọ wà nue go yé pé bo nọ dọ nugbo bo masọ nọ homẹnukuntapọn, mahopọnna fie mẹde wá sọn kavi omẹ nankọ he mẹlọ yin.—Levitiku 19:15; Isaia 1:17; Heblu lẹ 13:18.

 “Yiwanna nugbodidọ.” Yè gán sọ lilẹ́ hodidọ lọ do “yiwanna owanyi nugbo.” (Mika 6:8, nudọnamẹ odò tọn) To Heblugbe dowhenu tọn mẹ, hogbe he yin didiọ do “nugbodidọ” ma nọ na linlẹn nugbodidọ tọn kẹdẹ, amọ́ e sọ nọ zẹẹmẹdo nado nọ do homẹdagbe po lẹblanu po hia mẹde, enẹ wẹ nado wànu zẹ̀ nue mí to dandannu glọ nado wà go. Nue Jiwheyẹwhe biọ to mẹhe jlo na hẹn homẹ etọn hùn lẹ si ma yin nado nọ do homẹdagbe po lẹblanu po hia poun gba, amọ́ nado nọ yiwanna jẹhẹnu ehelẹ ga. Ehe dohia dọ mẹhe nọ sẹ̀n Jiwheyẹwhe lẹ dona nọ mọ ayajẹ to alọgigọna mẹdevo lẹ mẹ, titengbe eyin yé nọ gọalọna mẹhe to hudo mẹ lẹ. Mí na do ayajẹ eyin mí nọ nanúmẹ.—Owalọ lẹ 20:35.

 “Nọ yí whiwhẹ do zinzọnlin hẹ Jiwheyẹwhe towe.” To Biblu mẹ, hodido lọ “nado zinzọnlin” gán zẹẹmẹdo “nado hodo aliho nuyiwa tọn tangan de.” Mẹde nọ zinzọnlin hẹ Jiwheyẹwhe eyin e nọ wà nue nọ hẹn homẹ Jiwheyẹwhe tọn hùn lẹ. Noa ze apajle dagbe de dai. E “zinzọnlin hẹ Jiwheyẹwhe nugbo lọ” na e yin dodonọ to nukun Jiwheyẹwhe tọn mẹ bosọ “yin madoblọnọ to mẹhe nọgbẹ̀ to ojlẹ dopolọ mẹ hẹ ẹ lẹ ṣẹnṣẹn.” (Jenẹsisi 6:9) To egbé, mí nọ “zinzọnlin hẹ Jiwheyẹwhe” eyin mí nọ yinuwa sọgbe hẹ nuplọnmẹ he to Ohó etọn Biblu mẹ lẹ. Ehe nọ biọ dọ mí ni yí whiwhẹ do kẹalọyi dogbó mítọn lẹ bosọ yọnẹn dọ Jiwheyẹwhe go wẹ mí dona ganjẹ to ninọmẹ lẹpo mẹ.—Johanu 17:3; Owalọ lẹ 17:28; Osọhia 4:11.

 Yẹwhegán de wẹ Mika yin to Islaeli hohowhenu tọn to owhe kanweko ṣinatọ̀n J.W.M. To ojlẹ lọ mẹ boṣiọ-sinsẹ̀n, mẹhodu po kogbidinamẹ po gbọn kámẹ-gòmẹ to otò lọ mẹ. (Mika 1:7; 3:1-3, 9-11; 6:10-12) Suhugan Islaelivi lẹ tọn wẹ nọ gbẹkọ nue Jiwheyẹwhe dọ to Osẹ́n lọ mẹ lẹ go, enẹ wẹ Osẹ́n Mose tọn. To ojlẹ dopolọ mẹ, mẹsusu wẹ do yise agọ̀ lọ dọ Jiwheyẹwhe na kẹalọyi emi eyin emi saa to avọ́sinsan lẹ po hùnwhẹ sinsẹ̀n tọn lẹ po bayi.—Howhinwhẹn lẹ 21:3; Hosea 6:6; Mika 6:6, 7.

 To owhe kanweko lẹ to ojlẹ Mika tọn godo, Jesu vọ́ zinnudeji dọ homẹ Otọ́ emitọn tọn nọ hùn do mẹhe nọ do owanyi, whẹdida dodo po lẹblunu po hia lẹ go bo nọ gblehomẹ do mẹhe nọ wànu nado dohia mẹdevo lẹ poun dọ emi to Jiwheyẹwhe sẹ̀n lẹ go. (Matiu 9:13; 22:37-39; 23:23) Nue Jesu dọ lẹ gọalọna mí nado yọ́n nue Jiwheyẹwhe nọ donukun sọn mẹhe nọ sẹ̀n Ẹn to egbehe lẹ si.

 Pọ́n video kleun ehe nado yọ́n nue owe Mika tọn bẹhẹn.