“Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:4, Lẹdogbedevomẹ Aihọn Yọyọ Tọn.

 “Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko Juwayi.”—Osọhia 21:4, Biblu Wiwe lọ—Gun Alada.

 Jiwheyẹwhe dopà nado de awufiẹsa gọna oyà he ji gbẹtọvi lẹ te to egbehe lẹ sẹ̀, podọ nado sukúndona nuhe yin adọ̀ nuhahun ehe lẹpo tọn.

 “Ewọ nasọ súnsún dasin lẹpo sẹ̀ sọn nukun yetọn mẹ.” Hogbe ehelẹ to nùzindo opagbe Jehovah a tọn he yẹwhegán Isaia kandai lọ ji dọ Ewọ na “súnsún dasin sẹ̀ sọn nukun lẹpo mẹ.” (Isaia 25:8; Osọhia 7:17) Hogbe ehelẹ dohia dọ Jiwheyẹwhe nọ vẹawu mẹhe to avivi na okú mẹyiwanna de tọn wutu lẹpo, kavi mẹhe to yaji na ninọmẹ devo depope wutu lẹ.

 “Okú ma nasọ tin ba.” Hogbe ehelẹ gán sọ yin lilẹdo “mẹdepope ma nasọ kú ba.” Jiwheyẹwhe dopà nado de okú po awufiẹsa he e nọ hẹnwa lẹ po sẹ̀. Humọ, oṣiọ lẹ nasọ yin finfọnsọnku. (1 Kọlintinu lẹ 15:21, 22) Enẹgodo, “okú na yin hinhẹn zun ovọ́.”—1 Kọlintinu lẹ 15:26.

 “Mọjanwẹ aluẹmẹninọ kavi avi kavi awufiẹsa ma nasọ tin ba.” Opagbe Jiwheyẹwhe tọn ehe ma zẹẹmẹdo dọ gbẹtọvi lẹ ma nasọ tindo numọtolanmẹ awufiẹsa tọn depope ba, taidi numọtolanmẹ he nọ zọ́n bọ mí nọ doayi owùnu lẹ go to jọwamọ-liho bo ma nọ gbleawu. Kakatimọ, nuhe dọ opagbe ehe te wẹ yindọ awufiẹsa he ylando b po mape po ko hẹnwa na mí to apọ̀nmẹ, to numọtolanmẹ-liho, podọ to agbasa-liho lẹpo ma nasọ tin ba.—Lomunu lẹ 8:21, 22.

 “Onú hoho lẹ ko juwayi.” Hogbe tadona tọn ehelẹ basi bladopọ diọdo ayidego tọn he gbẹtọvi lẹ na tindo numimọ etọn tọn. Owe alọdlẹndonu tọn de dọmọ: “Aliho gbẹninọ tọn yọyọ devo pete wẹ na diọtẹnna aliho gbẹninọ tọn gbẹtọvi lẹ tọn hoho lọ he mẹ yé ma sọgan dapana okú, aluẹmẹninọ, avi po awufiẹsa po te.” Gbẹtọvi lẹ na penugo nado duvivi ogbẹ̀ tọn kakadoi to ninọmẹ dagbe lẹ mẹ, dile Jiwheyẹwhe ko lẹn do to dowhenu.—Jenẹsisi 1:27, 28.

 To bẹjẹeji weta 21​tọ tọn, apọsteli Johanu basi zẹẹmẹ numimọ he e mọ tọn dole: “Yẹn sọ mọ olọn yọyọ de po aigba yọyọ de po.” (Osọhia 21:1) E yí hogbe yẹhiadonu tọn lẹ zan nado basi zẹẹmẹ diọdo ayidego tọn de tọn he sọ yin didọdai to wefọ Biblu tọn devo lẹ mẹ. (Isaia 65:17; 66:22; 2 Pita 3:13) Gandudu olọn mẹ tọn Jiwheyẹwhe tọn, kavi “olọn yọyọ” lọ, na diọtẹnna gandudu gbẹtọvi tọn lẹpo bo nasọ dugán do “aigba yọyọ” de ji, enẹ wẹ pipli gbẹtọvi tọn yọyọ de he na nọgbẹ̀ to aigba ji.—Isaia 65:21-23.

 Etẹwẹ dohia dọ numimọ lọ to alọdlẹndo gbẹninọ to aigba ji? Tintan, opagbe Jiwheyẹwhe tọn lọ bẹjẹeji dole: “Gòhọ Jiwheyẹwhe tọn tin to gbẹtọvi lẹ dè.” (Osọhia 21:3) Enẹwutu, opagbe ehe ma yin dido na angẹli he to olọn mẹ lẹ, amọ́ na gbẹtọvi lẹ to aigba ji. Awetọ, numimọ lọ basi zẹẹmẹ aihọn de tọn fihe ‘okú ma nasọ tin te ba.’ (Osọhia 21:4) Okú ma tin to olọn mẹ, mẹhe to aigba ji lẹ kẹdẹ ji wẹ e nọ yinuwado. (Lomunu lẹ 5:14) Enẹwutu, e sọgbe hẹ lẹnpọn dagbe nado wá tadona lọ kọ̀n dọ wefọ ehe to zẹẹmẹ basi do lehe nulẹ na te do to aigba ji to sọgodo ji.

 Pọ́n video kleun ehe nado mọ nue to owe Osọhia tọn mẹ delẹ.