“Mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie to Jelusalẹm, to Jude po Samalia lẹpo po, podọ kaka yì awà he dẹn hugan aigba tọn lẹ ji.”—Owalọ lẹ 1:8, Lẹdogbedevomẹ Aihọn Yọyọ Tọn.

 “Ṣigba mìwlẹ na mọ huhlọn yí whenuena Gbigbọ Wiwe wá mì ji: mìwlẹ nasọ yin kunnudetọ na mi to Jelusalẹm mẹ, to Jude lẹpo mẹ, po Samalia po, podọ jẹ opodo aigba tọn.”—Owalọ lẹ 1:8, Biblu Wiwe lọ—Gun Alada.

 Jesu dopà na hodotọ etọn lẹ dọ yé na mọ huhlọn yí gbọn gbigbọ wiwe Jiwheyẹwhe ton gblamẹ nado hẹn lizọnyizọn yetọn di to awà he dẹn hugan aigba tọn lẹ ji.

 “Mì na mọ huhlọn yí to whenue gbigbọ wiwe na wá mì ji.” Jesu vọ́ nùzindo opà he e do na devi etọn lẹ ji dọ to whenue e ko lẹkọyi olọn mẹ godo, yé na mọ alọgọ yí gbọn gbigbọ Jiwheyẹwhe tọn a gblamẹ. (Johanu 14:16, 26) Azán ao to whenue ko Jesu lẹkọyi olọn mẹ godo to owhe 33 W.M., hodotọ etọn lẹ mọ gbigbọ wiwe he e dopà etọn na yé lọ yí. (Owalọ lẹ 2:1-4) Gbọnvona dọ gbigbọ wiwe Jiwheyẹwhe tọn gọalọna yé nado dọho to ogbè voovo lẹ mẹ bo wà azọ́njiawu lẹ, e sọ hẹn yé penugo nado yí adọgbigbo do dekunnu gando yise yetọn to Jesu mẹ go.—Owalọ lẹ 3:1-8; 4:33; 6:8-10; 14:3, 8-10.

 “Mìwlẹ na yin kunnudetọ ṣie.” Hogbe he yin lilẹdo “kunnudetọ” zẹẹmẹdo “mẹhe nọ dekunnu” kavi “nọ yigbe nude tọn” sọgbe hẹ nuhe e yinukundomọ kavi numimọ he e tindo. Taidi kunnudetọ he yinukundomọ nuhe jọ to gbẹzan Jesu tọn mẹ lẹ, apọsteli lẹ sọgan yigbe dọ nujijọ he wá aimẹ to lizọnyizọn etọn, okú etọn po fọnsọnku etọn po whenu lẹ yin nugbo. (Owalọ lẹ 2:32; 3:15; 5:32; 10:39) Kunnudenu dolido he yé na lẹ hẹn mẹsusu kudeji dọ Jesu wẹ Klisti lọ, yèdọ Mẹsia dopagbe lọ. (Owalọ lẹ 2:32-36, 41) Mẹhe yí apọsteli lẹ sè lẹ lẹzun kunnudetọ Jesu tọn lẹ, bọ yelọsu wá jẹ zẹẹmẹ gbẹzan Jesu tọn, okú etọn, po fọnsọnku etọn po tọn lá ji.—Owalọ lẹ 17:2, 3; 18:5.

 “Kaka yì awà he dẹn hugan aigba tọn lẹ ji.” Hogbe ehelẹ gán sọ yin lilẹdo “kaka yì opodo aigba tọn lẹ” kavi “yì otò devo lẹ mẹ.” Hogbe Jesu tọn lẹ do obá he mẹ hodotọ etọn lẹ na dekunnu gando ewọ go jẹ hia. Yé na yì fie dẹn taun do Jude po Samalia po lẹ nado lá nuyise yetọn na mẹdevo lẹ. Na nugbo tọn, yé na dekunnu gbọn aigba-denamẹ he klo taun de ji bo nasọ jẹ mẹsusu dè hú lehe Jesu wà do. (Matiu 28:19; Johanu 14:12) To nuhe ma pé owhe 30 to whenue Jesu dọ ohó ehelẹ godo, apọsteli Paulu wlan dọ wẹndagbe he gando Jesu go lọ ko “yin didọna nudida he to olọn glọ lẹpo,” etlẹ yin to fihe to olá lẹ taidi Lomu, Paltia (hùwaji-whèzẹtẹn Ohù Caspienne tọn), gọna Agewaji Aflika tọn.—Kolosinu lẹ 1:23; Owalọ lẹ 2:5, 9-11.

 Owe Owalọ lẹ tọn bẹsọn fihe Wẹndagbe Luku tọn fó do. (Luku 24:44-49; Owalọ lẹ 1:4, 5) Devi Luku he kàn owe ehe, bẹ kandai etọn jẹeji gbọn zẹẹmẹ bibasi do lehe Jesu sọawuhia devi etọn lẹ to fọnsọnku etọn godo do ji. (Owalọ lẹ 1:1-3) Enẹgodo, e dọhodo lehe agun Klistiani tọn yin didoai do ji gọna lehe e jideji do bẹsọn owhe 33 W.M. jẹ nudi 61 W.M.—Owalọ lẹ 11:26.

 Nujijọ he lẹdo Owalọ lẹ 1:8 dohia dọ hodotọ Jesu tọn lẹ to kinkanse yede eyin Jesu na jẹ gandu ji taidi Ahọlu Ahọluduta Jiwheyẹwhe tọn to gbẹwhenu yetọn. (Owalọ lẹ 1:6) Jesu gblọnna yé ma nado hanú zẹjlẹgo gando whenue Ahọluduta lọ na yin didoai go. (Owalọ lẹ 1:7) Kakatimọ, hodotọ etọn lẹ dona na ayidonugo kunnudide gando ewọ go “kaka yì awà he dẹn hugan aigba tọn lẹ ji.” (Owalọ lẹ 1:8) To egbehe ga, Klistiani lẹ nọ wà nudopolọ bo nọ yí zohunhun do lá wẹndagbe he gando Ahọluduta Jiwheyẹwhe tọn go.—Matiu 24:14.

 Pọ́n video kleun ehe nado mọ nue to owe Owalọ lẹ tọn mẹ delẹ.