“Na Jehovah ni dona we bo basi hihọ́na we. Na Jehovah ni hẹn nukunmẹ etọn sẹ́ do ji we podọ ewọ ni do nukundagbe hia we. Na Jehovah ni ze nukunmẹ etọn daga hlan we bo na we jijọho.”—Sọha lẹ 6:24-26, Lẹdogbedevomẹ Aihọn Yọyọ Tọn.

 “OKLUNỌ lọ ni dona we, bo payi ogo we: OKLUNỌ lọ ni hẹn nukunmẹ etọn nado to sisẹ́ to oji we, bo yin homẹhunnọ hlan we: OKLUNỌ lọ ni ze nukunmẹ etọn lọ daga to oji we bosọ na jijọho we.”—Sọha lẹ 6:24-26, Biblu Wiwe lọ—Gun Alada.

 Hogbe enẹlẹ nọ yin yiylọdọ dona yẹwhenọ kavi Aalọn tọn, na ewọ wẹ yin yẹwhenọ daho tintan Islaeli tọn wutu. (Eksọdusi 28:1) Jiwheyẹwhe wẹ yí hogbe dona tọn ehelẹ zan. (Sọha lẹ 6:22, 23) E dọna Mose dọmọ: “Dọna Aalọn po visunnu etọn lẹ po dọ, ‘Lehe mì na nọ dona omẹ Islaeli tọn lẹ do die,’” podọ enẹgodo wẹ e zan hogbe he tin to Sọha lẹ 6:24-26 mẹ lẹ. Yẹwhenọ nugbonọ lẹ nọ setonuna gbedide Jiwheyẹwhe tọn enẹ. Yé sọ nọ gbògbéna yinkọ Jiwheyẹwhe tọn, Jehovah. a Mí hia to wefọ 27tọ mẹ dọ: “Yé [enẹ wẹ yẹwhenọ lẹ] sọ dona nọ ylọ oyín ṣie do omẹ Islaeli tọn lẹ ji na yẹn nido dona yé.”

 “Na Jehovah ni dona we bo basi hihọ́na we.” Jehovah nọ dona mẹhe nọ sẹ̀n ẹn lẹ gbọn hihọ́-bibasina yé, anadidena yé, gọna alọgigọna yé nado tindo kọdetọn dagbe dali. (Howhinwhẹn lẹ 10:22) To sọha lẹ 6:24-26 mẹ, hogbe lọ he yin lilẹdo “we” to alọdlẹndo mẹdopo to fihe e yin yiyizan te lẹpo. Ehe dohia dọ ojlo Jiwheyẹwhe tọn wẹ nado dona Islaelivi dopodopo e ma yin akọta lọ blebu poun.

 “Na Jehovah ni hẹn nukunmẹ etọn sẹ́ do ji we podọ ewọ ni do nukundagbe hia we.” Obiọ lọ dọ Jiwheyẹwhe “ni hẹn nukunmẹ etọn sẹ́ do” mẹde ji zẹẹmẹdo dọ Jiwheyẹwhe ni kẹalọyi mẹlọ bosọ do nukundagbe etọn hia ẹ. b Hogbe lọ lẹ gán sọ yin lilẹdo: “Na OKLUNỌ lọ ni konu do we.” (Sọha lẹ 6:25, New International Reader’s Version) Jehovah nọ do nukundagbe hia omẹ etọn lẹ gbọn homẹdagbe, awuvẹmẹ po lẹblanu po didohia yé dali.—Isaia 30:18.

 “Na Jehovah c ni ze nukunmẹ etọn daga hlan we bo na we jijọho.” Jehovah ‘nọ ze nukunmẹ etọn daga’ hlan mẹhe nọ sẹ̀n ẹn lẹ gbọn owanyi didohia yé podọ gbọn jijọho nina yé dali. Sọgbe hẹ nuhe owe alọdlẹndonu tọn de dọ, “hogbe Heblugbe tọn he yin yiyizan na jijọho (shalom) ma nọ dlẹnalọdo whenue gbemanọpọ lẹ hán poun, amọ́ e sọ nọ dlẹnalọdo vivomẹninọ gọna dagbemẹninọ to gbigbọ-liho podọ to agbasa-liho.”

 Whẹpo Islaelivi lẹ nado mọaleyi sọn dona he go wefọ ehe donù lẹ mẹ, yé dona setonuna Jehovah. (Levitiku 26:3-6, 9) Ewọ nọ hẹn opà etọn di to whenue yé wàmọ. Ehe yinmọ nugbo to gandudu ahọlu yetọn delẹ tọn whenu, taidi to ojlẹ Sọlomọni po Hẹzekia po tọn lẹ mẹ.—1 Ahọlu lẹ 4:20, 25; 2 Otànnugbo lẹ 31:9, 10.

 Dile etlẹ yindọ e ma yin bibiọ to Klistiani lẹ si nado nọ dọ dọvọdọ dona ehelẹ tọn, yé gán nọ do numọtolanmẹ dopolọ hia whenue yé to dẹ̀ho hlan Jiwheyẹwhe gando mẹdevo lẹ go kavi to whenue yé to tulina Klistiani hatọ lẹ. (1 Tẹsalonikanu lẹ 5:11, 25) Jehovah ma nọ diọ. E gbẹ́ nọ do ojlo lọ to whelẹponu nado dona mẹhe nọ sẹ̀n ẹn po nugbonọ-yinyin po lẹ bosọ basi hihọ́na yé. Enẹwutu, Klistiani nugbo lẹ gán tindo jijọho, to yinyọnẹn mẹ dọ “nukunmẹ” Jehovah tọn tin to yé ji nado do nukundagbe hia yé.

 Weta ao tintan owe Sọha lẹ tọn bẹ anademẹ he Jiwheyẹwhe na Islaelivi lẹ hẹn whenue yé dosla sẹpọ Osó Sinai bo jei Aigba Pagbe tọn ji. To osladido he dẹn na nudi owhe dopo enẹ whenu, Jehovah basi titona omẹ etọn lẹ taidi akọta de bo na yé todohukanji osẹ́n tọn de he nọ yin yiylọdọ Alẹnu Osẹ́n tọn lọ.

 Jehovah sọ dọ lehe Aalọn po visunnu etọn lẹ po—he yin dide taidi yẹwhenọ lẹ—dona nọ dona Islaelivi lẹ do. (Sọha lẹ 6:22, 23) Enẹgodo, Aalọn po kúnkan etọn po nọ yí hogbe he to Sọha lẹ 6:24-26 mẹ lẹ zan nado dona akọta lọ. To nukọn mẹ, e wá lẹzun aṣa yẹwhenọ lọ lẹ tọn nado nọ vọ́ dona lọ lẹ dọ to vivọnu avọ́sinsan he nọ yin bibasi egbesọegbesọ to tẹmpli mẹ lẹ tọn.

 Pọ́n video kleun ehe nado mọ nue to owe Sọha lẹ tọn mẹ delẹ.