Eyin a hùn Biblu towe, a na mọdọ hogbe susu lẹ wẹ e bẹhẹn. Ma dike enẹ ni dobuna we blo. Kakatimọ nọ pọ́n Biblu hlan di tafo he ji núdùdù voovo lẹ gọ́ de. A ma gán dù nuhe to e ji lẹpo. Amọ́, a gán de núdùdù he jlo we bo duvivi etọn ganji.

 Eyin a na mọaleyi sọn Biblu hihia mẹ to gigọ́ mẹ, a dona ze ayiha do nuhe hia a te ji whẹ́. Hosọ ehe na gọalọna we nado wàmọ.

To hosọ ehe mẹ, mí na dọhodo nuhe bọdego lẹ ji:

•  Naegbọn a dona nọ ze ayiha do nuhe hia a te to Biblu mẹ ji?

•  Nawẹ a gán mọaleyi to gigọ́ mẹ sọn Biblu hihia mẹ gbọn?

•  Nuhe ogbẹ́ towe lẹ dọ

 Lehe a nọ dovivẹnu nado hia Biblu sọ, mọ wẹ a na nọ mọaleyi sọn e mẹ to gigọ́ mẹ do niyẹn. Lẹnnupondo ehe ji: Eyin a ze tii-mà do osin miyọ́nawu mẹ na ojlẹ kleun de, otọ́n etọn vude poun wẹ na jo do osin lọ mẹ. Amọ́, eyin tii-mà lọ nọ osin lọ mẹ na ojlẹ susu, otọ́n etọn na jo ganji do e mẹ.

 Mọ wẹ e te na Biblu hihia lọsu. Kakati nado nọ yìnnukun gbọn kandai lẹ mẹ poun, nọ yiagbọji bo nọ lẹnnupọndo nudọnamẹ he yé bẹhẹn lẹ ji. Nuhe mẹhe kàn Salmu 119tọ wà pẹẹ niyẹn. E dọ gando osẹ́n Jiwheyẹwhe tọn go dọmọ: “Azán lọ pete wẹ n’nọ yí do to ayihamẹlẹnpọn do e ji.”—Salmu lẹ 119:97.

 Nugbo wẹ dọ e ma biọ dọ a ni yí azán dopo blebu do to Biblu hia bo to ayihamẹlẹnpọn deji. Amọ́, nuagokun lọ die: Salmu-kantọ lọ de whenu dovo nado lẹnnupọndo Ohó Jiwheyẹwhe tọn ji. Enẹ gọalọna ẹn bọ e bayi nudide dagbe lẹ.—Salmu lẹ 119:98-100.

 “Iya ṣie dọna mi pọ́n dọ, ‘Azán ṣinawe wẹ a do to osẹ dopo mẹ, podọ nususu wẹ a nọ wà na dewe to azán enẹlẹ ji. Naegbọn a ma nado na whenu pẹẹde Jehovah? Nue e jẹ dọ yè ni wà wẹ!’”—Melanie.

 Eyin a nọ lẹnnupọndo nunọwhinnusẹ́n Biblu tọn lẹ ji, a na penugo nado bayi nudide dagbe lẹ—di apajlẹ to whenue a jlo na de mẹhe a na jihọntọn hẹ lẹ, kavi whenue a yin whiwhlepọn nado wà nuhe ma sọgbe de.

•   Bayi tito de. Jọja aflanmẹ de he nọ yin Julia na ayinamẹ dọ, “Bayi tito Biblu hihia tọn de. Nọ yọ́n nuhe a na hia, whenue a na hia ẹ do po fihe a na hia po.”

•   De nọtẹn dagbe de. Jọja yọnnu de he nọ yin Gianna dọ dọ: “Nọ dín fihe to abọẹ de. Podọ dike hagbẹ whẹndo tọn lẹ ni yọ́n tito Biblu hihia tọn towe, enẹ na zọ́n bọ yé ma na dotukla we to ojlẹ enẹ mẹ.”

   Eyin nuyizan lẹtliki tọn de ji wẹ a to wehia te, hẹn ẹn diun dọ a ze e do ninọmẹ abọẹninọ tọn de mẹ. A tlẹ gán yí vọkan wema ji tọn Biblu tọn de zan. Na nugbo tọn, dodinnanu lẹ dohia dọ vọkan wema ji tọn de yiyizan nọ zọ́n bọ yè nọ yawu mọnukunnujẹnumẹ. To vogbingbọn mẹ, e gán vẹawu nado ze ayiha do fidopo eyin nuyizan lẹtliki tọn de ji wẹ a to wehia te.

   “Wehihia to nuyizan lẹtliki tọn de ji nọ fẹayihasẹna mi. Nudọnamẹ delẹ nọ to wiwá e ji kavi e gán jlo na ṣì kavi Intẹnẹt gán nọma wazọ́n ganji. Amọ́, eyin vọkan wema ji tọn wẹ, n’ma nọ do hudo nudevo de tọn hugan nado dín fihe hinhọ́n te.”—Elena.

•   Nọ hodẹ̀ whẹpo do bẹjẹeji. Biọ Jehovah dọ ni gọalọna we nado mọnukunnujẹ adà Biblu tọn he a jlo na hia lọ mẹ, flin nuhe e bẹhẹn lẹ bosọ mọaleyi sọn e mẹ.—Jakọbu 1:5.

   Dindonanu dogọ do kandai he hia a te lọ ji nado yinuwa sọgbe hẹ odẹ̀ towe. Nawẹ a gán wàmọ gbọn? Eyin aplikasiọn JW Library yizan wẹ a te kavi Biblu he to Intẹnẹt ji hia wẹ a te, a gán zín wefọ de nado bayi dodinnanu do nudọnamẹ po hosọ devo he gandego lẹ po ji.

•   Nọ kàn kanbiọ lẹ sè. Di apajlẹ: ‘Etẹwẹ kandai ehe plọn mi gando Jehovah go? Be e zinnudo jẹhẹnu etọn he n’dona wleawuna de ji wẹ ya?’ (Efesunu lẹ 5:1) ‘Etẹwẹ n’plọn sọn kandai ehe mẹ he n’gán yizan to gbẹzan ṣie mẹ?’ (Salmu lẹ 119:105) ‘Aliho tẹlẹ mẹ wẹ n’gán yí nuhe n’plọn lẹ do gọalọna mẹdevo lẹ te?’—Lomunu lẹ 1:11.

   Sọ kanse dewe dọ, ‘Nawẹ nuhe n’hia lọ gando hosọ Biblu tọn go gbọn?’ Kanbiọ titengbe de wẹ enẹ yin. Etẹwutu? Na nuhe Biblu bẹhẹn lẹpo—sọn Jenẹsisi jẹ Osọhia—to linlẹn de mẹ, sinai do hosọ tangan de ji, enẹ wẹ: Lehe Jehovah na yí Ahọluduta olọn mẹ tọn etọn zan do nado klan oyín etọn do wiwe bosọ dohia dọ ewọ wẹ tindo jlọjẹ lọ nado dugán podọ aliho gandudu tọn etọn wẹ yọ́n hugan.