KANBIỌ HE JỌJA LẸ NỌ KANSE
Etẹ N’gán Wà Eyin N’Ma Yiwanna Wehọmẹ?
Mẹplọntọ hẹnsinyẹnnọ lẹ. Kọgbidinamẹ hagbẹ lẹ tọn. Tẹnpọn wehọmẹ tọn he sinyẹn taun lẹ, po azọ́ndenamẹ wehọmẹ tọn lẹ po magbokọ. Eyin a dọ dọ emi ma yiwanna wehọmẹ, enẹ ma yin nupaṣamẹ. Jọja aflanmẹ de he nọ yin Rachel a dọ dọ:
“E na ko jlo mi nado to fidevo depope adavo wehọmẹ. N’na ko jlo nado to huto kavi topọ hẹ họntọn lẹ kavi etlẹ yin nado gọalọna mẹjitọ ṣie lẹ nado dànú kavi sẹ̀ nulẹ do!”
Eyin a do numọtolanmẹ Rachel tọn nkọ, owhe he a na yizan to wehọmẹ lẹ gán taidi owhe gànpamẹ ninọ tọn lẹ, ehe a dona doakọnna kakajẹ whenue a na yin tuntundote to gbedewema yíyí whenu. Be a gán nọ pọ́n ojlẹ he a yizan to wehọmẹ lẹ hlan to aliho he pọnte de mẹ ya?
Be a yọnẹn ya? Eyin a wleawuna pọndohlan he pọnte gando wehọmẹ go, ninọmẹ lọ ma na vẹawu nawe ba, podọ a ma nasọ nọ pọ́n wehọmẹ yìyì hlan taidi nude he a dona doakọnna ba. To aliho de mẹ, wehọmẹ na taidi azọ́nwanu de he a na zan nado gàn nugopipe he a na do hudo etọn lẹ whenue a na whẹ́n mẹho.
Nado wleawuna pọndohlan he pọnte gando wehọmẹ go, tẹnpọn bo ze ayiha do nuhe bọdego ehelẹ ji:
Wepinplọn. Lehe a to nuplọn sọ, mọwẹ a na penugo dogọ nado didẹ nuhahun he a na wá pehẹ to azọ́nmẹ, podọ to adà gbẹzan towe tọn devo lẹ mẹ do niyẹn, kakati nado nọ ganjẹ mẹdevo lẹ go to whelẹponu. Nọ kanse dewe dọ, ‘Eyin nudelẹ tlẹ tin he n’ma yiwanna gando wehọmẹ go, ale tẹlẹ wẹ wepinplọn ko to hinhẹnwa na mi?’
Nunọwhinnusẹ́n Biblu tọn: “Whlá nuyọnẹn yọ́n-na-yizan po nugopipe nulẹnpọn tọn po.”—Howhinwhẹn lẹ 3:21.
Nado mọ nudọnamẹ dogọ, pọ́n hosọ lọ “Etẹ N’Gán Wà Eyin N’Ma to Azọ́nwa Ganji to Wehọmẹ?”
Awuwiwlena aṣa dagbe lẹ. Nuhe a nọ wà to wehọmẹ lẹ gán plọnwe lehe a na nọ yí whenu towe zan do, nado nọ domẹplọnlọ dewe go, bosọ plọn nado yiwanna azọ́n sinsinyẹn wiwà, yèdọ jijọ dagbe delẹ he a na do hudo etọn whenue a na whẹ́n mẹho. Nọ kanse dewe dọ: ‘Nawẹ nuhe n’nọ wà to wehọmẹ lẹ to alọgọna mi nado nọ domẹplọnlọ dee go bosọ yin azọ́nwatọ dagbe gbọn? Nawẹ n’gàn hẹn nulẹ pọnte to adà ehelẹ mẹ gbọn?’
Nunọwhinnusẹ́n Biblu tọn: “Ale tin to azọ́n sinsinyẹn wunmẹ lẹpo mẹ.”—Howhinwhẹn lẹ 14:23.
Nado mọ nudọnamẹ dogọ, pọ́n hosọ lọ “Nawẹ N’Gán Nọ Yí Whenu Ṣie Zan Gbọn?”
Haṣinṣan towe hẹ mẹdevo lẹ. Eyin a nọ wanu dopọ hẹ klasigbẹ́ towe lẹ to wehọmẹ, enẹ gán gọalọna we nado nọ do awuvẹmẹ po sisi po hia mẹdevo lẹ. Dẹpẹ de he nọ yin Joshua dọmọ: “Kẹdẹdile whenuho po lẹnunnuyọnẹn po pinplọn yin nujọnu do, mọ wẹ pinplọn nado nọ dọhodopọ hẹ mẹdevo lẹ yin nujọnu do niyẹn. Nugopipe de wẹ he a na do hudo etọn to gbẹzan towe blebu mẹ.” Nọ kanse dewe dọ, ‘Etẹlẹ wẹ n’ko plọn to wehọmẹ gando gbekinkọndopọ hẹ mẹdevo lẹ, etlẹ yin mẹhe ninọmẹ kavi nuyise yetọn lẹ gbọnvona ṣie lẹ go?’
Nunọwhinnusẹ́n Biblu tọn: “Mì nọ doafọna jijọho mẹ ninọ hẹ mẹlẹpo.”—Heblu lẹ 12:14.
Nado mọ nudọnamẹ dogọ, pọ́n hosọ lọ “Comment avoir des conversations avec les autres?”
Sọgodo towe. Wehọmẹ gán gọalọna we nado doayi nugopipe towe lẹ go bosọ diọadana yanwle towe lẹ sọgbe hẹ yé. Jọja de he nọ yin Brooke dọ dọ: “A tlẹ sọgan plọn onú tangan de dile n’wà do, bọ whenue a na yí gbedewema, a na do nugopipe he e biọ nado mọ azọ́n.” Nọ kanse dewe dọ: ‘Nawẹ n’na penukundo dee go gbọn whenue n’na fó wehọmẹ? Nawẹ n’gán diọadana wepinplọn ṣie sọgbe hẹ azọ́n wunmẹ enẹ gbọn?’
Nunọwhinnusẹ́n Biblu tọn: “Nọ yí sọwhiwhe do lẹnnupọndo aliho he ji afọ towe lẹ nọ gbọn.”—Howhinwhẹn lẹ 4:26, nudọnamẹ odò tọn.
a Yinkọ delẹ ko yin didiọ.
