Lala, planẹti mítọn he yin Aigba ma na yin vivasudo, yin mimẹ̀ po miyọ́n po kavi yin tẹndiọna gbede. Biblu plọnmẹ dọ Jiwheyẹwhe dá aigba na mí nido nọ nọ̀ e ji kakadoi.

•   “Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.”​—Salmu lẹ 37:29.

•   “[Jiwheyẹwhe] ko do aigba ai do dodonu etọn lẹ ji; e ma na yin tẹnsẹna pọ́n gbede.”​—Salmu lẹ 104:5.

•   “Aigba gbọṣi aimẹ kakadoi.”​—Yẹwhehodọtọ 1:4.

•   “Mẹhe basi aigba, podọ Didatọ etọn he do e ai gligli, . . . ma dá ẹ to ovọ́ mẹ, ṣigba . . . dá ẹ na yè nido nọ nọ̀ e ji.”​—Isaia 45:18.

 Jiwheyẹwhe ma na dike gbẹtọvi lẹ ni hù aigba sudo mlẹnmlẹn gbọn nuhẹnflu, awhàn kavi aliho devo lẹ gblamẹ. Kakatimọ, ewọ na “husudo mẹhe to aigba husudo lẹ.” (Osọhia 11:18) Nawẹ e na wàmọ gbọn?

 Jiwheyẹwhe na yí Ahọluduta olọn mẹ tọn pipé de do diọtẹnna gandudu gbẹtọvi tọn lẹ he ma ko penugo nado basi hihọ́ na aigba. (Daniẹli 2:44; Matiu 6:9, 10) Ahọluduta enẹ na yin anadena gbọn Visunnu Jiwheyẹwhe tọn Jesu Klisti dali. (Isaia 9:​6, 7) Whenue Jesu to aigba ji, e yí huhlọn jiawu etọn do deanana jọwamọnu voovo lẹ. (Malku 4:35-41) Taidi Ahọlu Ahọluduta Jiwheyẹwhe tọn, Jesu na deanana aigba po nuhe to e ji lẹ po to gigọ́ mẹ. E na hẹn ninọmẹ aigba tọn jẹ yọyọ kavi vọ́ ẹ jlado bọ e na taidi lehe e te do to jipa Edẹni tọn mẹ.​—Matiu 19:28; Luku 23:43.

 Paali. Mẹsusu nọ tindo pọndohlan agọ̀ enẹ, na yé ma mọnukunnujẹ wefọ 2 Pita 3:7 tọn mẹ, he dọmọ: “Olọn lẹ po aigba lọ po he tin todin yin whiwhla na miyọ́n.” Lẹnnupọndo nuagokun awe delẹ ji he gán gọalọna mí nado mọnukunnujẹ zẹẹmẹ hogbe enẹlẹ tọn mẹ:

1.   Biblu nọ yí hogbe lọ lẹ “olọn lẹ,” “aigba” po “miyọ́n” po zan nado dlẹnalọdo nususu. Di apajlẹ, lẹdogbedevomẹ Bible Segond tọn dọ to Jenẹsisi 11:1 mẹ dọmọ: “Aigba lẹpo nọ do ogbè dopolọ.” Tofi “aigba” to alọdlẹndo gbẹtọvi lẹpo to paa mẹ.

2.   Lẹdo hodidọ he to 2 Pita 3:7 mẹ lẹ tọn do nuhe olọn, aigba po miyọ́n he yin nùdego to wefọ lọ mẹ po zẹẹmẹdo hia. Wefọ 5 po 6 po basi nuyijlẹdonugo de gando Singigọ Azán Noa tọn gbè tọn go. To ojlẹ enẹ mẹ, aihọn whenẹnu tọn yin vivasudo, ṣogan planẹti mítọn ma busẹ. Kakatimọ, Singigọ lọ plọ́ pipli kavi “aigba” danuwatọ lẹ tọn sẹ̀. (Jenẹsisi 6:11) E sọ và “olọn” wunmẹ de sudo​—enẹ wẹ mẹhe to aṣẹpa do gbẹtọvi he to aigba ji to whenẹnu lẹ ji. Enẹwutu, mẹylankan lẹ wẹ yin vivasudo, e ma yin planẹti mítọn. Noa po whẹndo etọn po lùn vasudo aihọn enẹ tọn tọ́n bo nọgbẹ̀ to aigba ji to Singigọ lọ godo.​—Jenẹsisi 8:15-18.

 Kẹdẹdi osin Singigọ lọ tọn lẹ, vasudo kavi “miyọ́n,” he yin nùdego to 2 Pita 3:7 mẹ lọ na hẹn aihọn mẹylankan lẹ tọn wá opodo, e ma yin planẹti mítọn he yin Aigba. Jiwheyẹwhe dopà “ olọn yọyọ lẹ po aigba yọyọ de po” tọn ehe mẹ “dodowiwa na nọ nọ̀.” (2 Pita 3:​13) “Aigba yọyọ” kavi pipli gbẹtọvi lẹ tọn yọyọ de na yin anadena gbọn “olọn yọyọ lẹ,” kavi gandudu yọyọ de dali​—enẹ wẹ Ahọluduta Jiwheyẹwhe tọn. To anademẹ Ahọluduta enẹ tọn glọ, aigba na lẹzun paladisi jijọho tọn de.​—Osọhia 21:​1-4.