Biblu ma donù alavọ Turin tọn go to fidepope. Alavọ de wẹ, ehe mẹ mẹsusu nọ lẹndọ oṣiọ Jesu Klisti tọn yin biblá do nado yin dìdì. Sọgbe hẹ nuyise ehe, mẹdelẹ nọ pọ́n avọ̀ enẹ hlan taidi dopo to onú wiwe hugan he pò to aimẹ na mẹylọhodotọklisti tọn lẹ mẹ. Sinsẹ̀nhọ daho Katoliki tọn de to Turin, to Italie, ko yí nuyizan lẹnunnuyọnẹn tọn he yinukọn taun lẹ zan nado wleawuna nọtẹn de ehe mẹ alavọ lọ yin zizedo, na e nido pò to ninọmẹ dagbe mẹ.

 Be kandai Biblu tọn lẹ nọgodona linlẹn lọ dọ Alavọ Turin tọn lọ janwẹ yin yiyizan na Jesu ya? Lala.

 Lẹnnupọndo adà alavọ lọ tọn atọ̀n he gbọnvona nuhe Biblu dọ lẹ ji.

1.   Alavọ lọ yin avọ̀ de he dite na mẹtlu 4,42 bo gblo sọ mẹtlu 1,13 ehe go avọ̀ tlẹ́lẹ de he dite na centimètres 8 yin titọ̀ do.

    Nuhe Biblu dọ: Oṣiọ Jesu tọn ma yin biblá do alavọ dopo gee mẹ, kakatimọ do alavọ tlẹ́lẹ susu mẹ. Alavọ tlẹ́lẹ devo mẹ wẹ yè blá ota etọn do. To fọnsọnku Jesu tọn godo, dopo to apọsteli etọn lẹ mẹ wá yọwhé he ko jẹvọ́ lọ kọ̀n bo “mọ alavọ lọ lẹ to kọmẹ finẹ.” Biblu sọ yidogọ dọ: “Avọ̀ he to ota na ẹn dai lọ ma topọ hẹ avọ̀ biblá diẹ lẹ to kọmẹ, ṣigba yin hihá dovo do fidopo.”—Johanu 20:6, 7.

2.   Alavọ lọ bẹ ohia ohùn he kọ̀n do avọ̀ mẹ tọn delẹ hẹn, ehe taidi ohia he oṣiọ he yè ma lawu na nọ jó do avọ̀ mẹ lẹ.

    Nuhe Biblu dọ: To whenue Jesu kú, devi etọn lẹ wleawuna oṣiọ etọn “sọgbe hẹ aṣa ṣiọdidi Ju lẹ tọn.” (Johanu 19:39-42) Aṣa enẹ bẹ awulilẹ̀ na oṣiọ lọ po amisisa na ẹn po, gọna nuwhẹ́nkun lẹ sisá do e go whẹpo e nado yin dìdì hẹn. (Matiu 26:12; Owalọ lẹ 9:37) Enẹwutu, devi Jesu tọn lẹ na ko lawu na oṣiọ etọn whẹpo do yí avọ̀ lẹ do blá ẹ.

3.   Alavọ lọ tindo ohia dawe de he “yin titẹ́ do e ji jẹ odaa avọ̀ lọ tọn bọ odaa avọ̀ lọ tọn he pò wá yin yinyẹ́n do ṣinyọ́n ota na ẹn kaka wá afọkọ,” sọgbe hẹ nuhe otànwe lọ Encyclopædia Britannica dọ.

    Nuhe Biblu dọ: Devi Jesu tọn lẹ dọhodo okú etọn, yọwhé etọn he jẹvọ́, po kunnudide yọnnu he yinukundomọ “numimọ jiawu angẹli . . . he dọ dọ ewọ to ogbẹ̀” lẹ tọn po ji. (Luku 24:15-24) Eyin alavọ Turin tọn lọ ko tin to yọdò Jesu tọn mẹ wẹ, ayihaawe matin dọ devi etọn lẹ na ko dọhodeji podọ do yẹdide he to e ji lẹ ji. Ṣigba, Biblu ma dọ nudepope gando hodọdopọ mọnkọ de go.

 Lala. Eyin alavọ enẹ tlẹ ko yin yiyizan to hohowhenu wẹ, e ma sọgbe nado pọ́n ẹn hlan taidi numẹsẹ̀n de. Lẹnnupọndo nunọwhinnusẹ́n Biblu tọn he do nuhewutu e do yinmọ hia lẹ ji.

1.   E ma yin dandan. Jesu basi zẹẹmẹ dọ: “Gbigbọ wẹ Jiwheyẹwhe, podọ mẹhe to sinsẹ̀n ẹn lẹ dona nọ basi sinsẹ̀n hlan ẹn to gbigbọ mẹ podọ to nugbo mẹ.” (Johanu 4:24) Yẹdide kavi nuyizan hohowhenu tọn lẹ ma dona yin yiyizan to sinsẹ̀n-bibasi nugbo mẹ.

2.   Biblu ko dosẹ́n gando mọwiwà go. Gbedide Ao lẹ jẹagọdo boṣiọ-sinsẹ̀n. (Deutelonomi 5:6-10) Mọdopolọ, Biblu degbena Klistiani lẹ dọmọ: “Mì họ́ mìde sọta boṣiọ lẹ.” (1 Johanu 5:21) Mẹdelẹ sọgan na whẹwhinwhẹ́n lọ dọ alavọ lọ ma yin boṣiọ de, ṣigba dọ nuyizan kavi ohia de wẹ he gando yise yetọn go. Amọ́, nuyizan de nọ wá lẹzun boṣiọ na mẹde, eyin e yí i do mọ numẹsẹ̀n de. a Enẹwutu, mẹdepope he jlo na hẹn homẹ Jiwheyẹwhe tọn hùn ma dona ze ede jo kavi sẹ̀n nuyizan devo depope kakajẹ alavọ lọ ji.