Mẹnu Kavi Etẹ Wẹ Yin “Alfa Podọ Omega”?

MÌ HÒ (video kavi hoyidokanji lọ)

Gblọndo Biblu tọn

Hogbe lọ “Alfa podọ Omega” nọ dlẹnalọdo Jehovah Jiwheyẹwhe, Ganhunupotọ lọ. E sọawuhia whla atọ̀n to Biblu mẹ.—Osọhia 1:8; 21:6; 22:13. a

Naegbọn Jiwheyẹwhe do ylọ ede dọ “Alfa podọ Omega”?

Alfa po omega po wẹ wekun tintan po godo tọn po to wekun Glẹkigbe tọn lẹ mẹ, yèdọ ogbè he mẹ adà Biblu tọn he bẹ owe Osọhia tọn hẹn bo nọ saba yin yiylọdọ Alẹnu Yọyọ yin kinkan do. Otẹn he mẹ wekun ehelẹ te to wekun Glẹkigbe tọn lẹ mẹ nọ yin yiyizan to yẹhiadonu-liho nado dohia dọ Jehovah kẹdẹ wẹ yin bẹjẹeji po opodo po. (Osọhia 21:6) Ewọ wẹ ko yin Jiwheyẹwhe Ganhunupotọ lọ sọn ojlẹ madosọha lẹ die bo nasọ to Jiwheyẹwhe Ganhunupotọ lọ yin kakadoi. Ewọ kẹdẹ wẹ mẹlọ he tin “sọn madopodo jẹ madopodo.”—Salmu lẹ 90:2.

Mẹnu wẹ omẹ “tintan podọ godo tọn” lọ?

Biblu yí hogbe enẹlẹ zan na Jehovah Jiwheyẹwhe po Visunnu etọn Jesu po, ṣigba sọgbe hẹ zẹẹmẹ voovo lẹ. Apajlẹ awe die.

To Isaia 44:6 mẹ, Jehovah dọmọ: “Yẹn wẹ omẹ tintan podọ yẹn wẹ omẹ godo tọn. Jiwheyẹwhe devo de ma tin gbọnvona mi.” Tofi, Jehovah to nùzindeji dọ ewọ wẹ Jiwheyẹwhe nugbo madopodo lọ; gbọnvona ewọ, devo depope ma tin. (Deutelonomi 4:35, 39) Enẹwutu to whẹho ehe mẹ, zẹẹmẹ dopolọ wẹ hogbe lọ “tintan podọ godo tọn” tindo hẹ “Alfa podọ Omega.”
Humọ, hogbe lọ “Tintan [pro’tos, e ma yin alfa] podọ Godo tọn [e’skha·tos, e ma yin omega]” yin yiyizan to Osọhia 1:17, 18 gọna 2:8 mẹ. Sọgbe hẹ lẹdo hodidọ lọ tọn, mẹhe wefọ ehelẹ to alọdlẹndo lọ kú bo gọwá ogbẹ̀ to nukọn mẹ. Enẹwutu, e ma gán yin Jiwheyẹwhe wẹ wefọ ehelẹ to alọdlẹndo, na ewọ ma kú pọ́n gbede. (Habakuku 1:12) Amọ́, Jesu kú bo wá yin finfọnsọnku. (Owalọ lẹ 3:13-15) Ewọ wẹ gbẹtọvi tintan he yin finfọnsọnku taidi nudida gbigbọnọ jọmaku de do olọn mẹ, yèdọ fie e togbẹ̀ te todin “kakadoi podọ doidoi.” (Osọhia 1:18; Kolosinu lẹ 1:18) Sọn whenẹnu, fọnsọnku he ko wá aimẹ lẹpo wẹ yin bibasi gbọn Jesu gblamẹ. (Johanu 6:40, 44) Enẹwutu, ewọ wẹ omẹ godo tọn he yin finfọnsọnku tlọlọ gbọn Jehovah dali. (Owalọ lẹ 10:40) Abajọ e do sọgbe to ninọmẹ ehe mẹ nado ylọ Jesu dọ omẹ “Tintan podọ Godo tọn” lọ.

Be Osọhia 22:13 dohia dọ Jesu yin “Alfa Podọ Omega” wẹ ya?

Lala. Mẹhe dọho to Osọhia 22:13 mẹ ma yin nùdego, podọ mẹsusu wẹ dọho to weta enẹ mẹ. Mẹplọntọ wehọmẹ alavọ tọn de he nọ yin William Barclay wlan gando adà Osọhia tọn enẹ go dọmọ: “Nuhe to finẹ lẹ ma yin kinkan to aliho debọdo-dego tọn mẹ; . . . podọ e nọ saba vẹawu nado yọ́n mẹhe to hodọ taun.” (The Revelation of John, Bladopọ 2tọ, Zinjẹgbonu He Yin Vivọjlado, weda 223) Enẹwutu, mí sọgan dọ dọ Mẹdopolọ he ko nọ yin yiylọdọ “Alfa podọ Omega” to wefọ Osọhia tọn devo lẹ mẹ wẹ na ko yin alọdlẹndo to Osọhia 22:13 mẹ ga—yèdọ Jehovah Jiwheyẹwhe.

a To Biblu Wiwe lọ—Gun Alada mẹ, hogbe lọ sọ sọawuhia whla ẹnẹtọ devo to Osọhia 1:11 mẹ. Ṣigba, suhugan lẹdogbedevomẹ agọe tọn lẹ tọn ma yí i zan to wefọ enẹ mẹ, na e ma tin to alọnuwe Glẹkigbe tọn he ko dohó hugan lẹ mẹ wutu, podọ na e họnwun dọ vọkan Owe-wiwe lẹ tọn he wá yin bibasi to nukọn mẹ lẹ mẹ wẹ e na ko yin yiyidogọ te.