Awusọhia Nankọ Wẹ Jesu Tindo?

MÌ HÒ (video kavi hoyidokanji lọ)

Gblọndo Biblu tọn

Mẹde ma gán dọ lehe awusọhia Jesu tọn te taun, na Biblu ma na zẹẹmẹ enẹ tọn. Ehe dohia dọ awusọhia Jesu tọn ma wẹ yin nujọnu lọ. Etomọṣo, Biblu dọ nudelẹ he gọalọna mí nado do linlẹn de gando nue gán ko yin awusọhia Jesu tọn go.

Ohia agbasa go tọn lẹ: Jesu yin Juvi de, bo gán ko dugu ohia agbasa go tọn he yè do nọ yọ́n mẹhe wá sọn akọ̀ Ṣẹmi tọn mẹ lẹ tọn sọn onọ̀ etọn dè. (Heblu 7:14) E yọnbasi dọ e ma do awusọhia tangan de he nọ hẹn ẹn gbọnvo. To gbèdopo, e zingbejizọnlin sọn Galili yì Jelusalẹm bọ mẹhe dukosọna ẹn lẹ depope ma tlẹ yọnẹn dọ ewọ wẹ. (Johanu 7:10, 11) Podọ, e taidi dọ yè ma nọ doayi ewọ go dovo eyin e tlẹ to devi etọn he po e po vẹ́ taun lẹ ṣẹnṣẹn. Flindọ whẹpo gbẹtọgun he hẹn adánwanu lẹ do penugo bo wle Jesu, Juda Iskaliọti to dandannu glọ nado do mẹhe yinmọ lọ hia yé whẹ́.—Matiu 26:47-49.
Tedidi oda tọn: E yọnbasi taun dọ Jesu ma do oda gaa gblẹlẹ to ota, na Biblu dọ dọ “winyan wẹ e yin na sunnu nado tindo oda gaa.”—1 Kọlintinu lẹ 11:14.
Ogbì: Jesu do ogbì. E setonuna osẹ́n Ju lẹ tọn he dọ dọ sunnu he ko whẹ́n lẹ ‘ma dona whlẹ́ tónu ogbì yetọn lẹ tọn.’ (Levitiku 19:27; Galatianu lẹ 4:4) Biblu sọ donù ogbì Jesu tọn go to dọdai he gando yajiji etọn go de mẹ.—Isaia 50:6.
Agbasa: Kunnudenu susu wẹ dohia dọ sunnu glegbenu de wẹ Jesu yin. To lizọnyizọn etọn whenu, e zingbejizọnlin na kilomẹtlu susu lẹ. (Matiu 9:35) Whla awe wẹ e klọ tẹmpli Ju lẹ tọn wé bo takitina tafo akuẹdiọtọ lẹ tọn, bọ to gbèdopo, e tlẹ yí okàn lẹ zan di obá nado yàn kanlin nusàtọ lẹ tọn jẹgbonu sọn tẹmpli lọ mẹ. (Luku 19:45, 46; Johanu 2:14, 15) Wezẹhomẹ de dọmọ: “Kandai wẹndagbe tọn lọ blebu dohia dọ [Jesu] tindo agbasalilo dagbe de bosọ to jogún-jogún.”—Sọgbe hẹ owe lọ McClintock and Strong’s Cyclopedia Bladopọ 4tọ, weda 884.
Nukunmẹ: Jesu nọ jọmẹ bo nọ vẹawumẹ, podọ ayihaawe matin dọ ehe nọ sọawuhia to nukunta etọn. (Matiu 11:28, 29) Gbẹtọ wunmẹ lẹpo wẹ nọ lẹhlan ewọ nado mọ homẹmimiọn po alọgọ po yí. (Luku 5:12, 13; 7:37, 38) Yọpọvu lẹ lọsu nọ voawu eyin yé topọ hẹ ẹ.—Matiu 19:13-15; Malku 9:35-37.

Linlẹn agọ̀ he mẹlẹ do gando awusọhia Jesu tọn go lẹ

Linlẹn agọ̀: Mẹdelẹ nọ tẹkudeji dọ Aflikanu de wẹ Jesu yin, na owe Osọhia tọn yí oda etọn lẹ jlẹdo lẹngbọ-fún go, bo yí afọ etọn lẹ jlẹdo ‘gànvẹẹ he yè kọ̀n to zòhọ mẹ’ de go wutu.—Osọhia 1:14, 15, Biblu Wiwe lọ—Gun Alada.

Nugbo lọ: Nuhe to owe Osọhia tọn mẹ lẹ yin zizedonukọnnamẹ “gbọn ohia lẹ yiyizan dali.” (Osọhia 1:1) Hogbe yẹhiadonu tọn lẹ yin yiyizan gando oda po afọ Jesu tọn lẹ po go nado do jẹhẹnu he Jesu tindo to fọnsọnku etọn godo lẹ hia wẹ, e ma yin nado do awusọhia he e tindo whenue e to aigba ji hia. Nuhe Osọhia 1:14 dọ gando Jesu go, dọ “ota etọn po oda etọn po wé taidi lẹngbọ-fún wewe, yèdọ taidi osin-agó,” ma yin nudọnamẹ de gando awusọhia Jesu tọn go, kakatimọ e to alọdlẹndo sinmẹ wunmẹ de nado bayi nuyijlẹdonugo wẹ. Sinmẹ ehe nọtena nuyọnẹn he Jesu tindo na owhe he to ota na ẹn wutu. (Osọhia 3:14) Wefọ ehe ma to lehe oda Jesu tọn lẹ te yijlẹdo lehe ofún lẹngbọ de tọn lẹ nọ nọ̀ kavi lehe osin-agó de nọ nọ̀ go gba.

Afọ Jesu tọn lẹ “taidi gànvẹẹ dagbedagbe he to sisẹ́ to zòhọ de mẹ.” (Osọhia 1:15) Mọdopolọ, nukunmẹ etọn “taidi owhè he to sisẹ́ mlanmlan.” (Osọhia 1:16) To whenuena e yindọ akọ̀ de ma tin he do sinmẹ agbasa tọn he sọgbe hẹ zẹẹmẹ ehelẹ, e dohia dọ nuyijlẹdonugo de wẹ yin yiyizan to numimọ lọ mẹ nado do Jesu he yin finfọnsọnku lọ hia di “mẹhe nọ nọ̀ hinhọ́n he ma yọ́n dọnsẹpọ mẹ.”—1 Timoti 6:16.

Linlẹn agọ̀: Jesu ma dohuhlọn de bo masọ nọ bikan.

Nugbo lọ: Jesu nọ wanu di sunnu glegbenu. Di apajlẹ, e yí adọgbigbo do dó ede hia gbẹtọgun he hẹn adánwanu bo jlo na wle e lẹ. (Johanu 18:4-8) Jesu na ko yin mẹhe ló sọn agbasa mẹ taun de, na taidi whlẹpatọ de, e dona ko nọ zan azọ́nwanu pinpẹn lẹ.—Malku 6:3.

Eyin mọ wẹ, bọ naegbọn e biọ dọ mẹde ni gọalọna Jesu nado hẹn yatin etọn? Podọ naegbọn e do kú jẹnukọnna mẹdevo he po e po yin whiwhè do pòtin go lẹ? (Luku 23:26; Johanu 19:31-33) Onú ko ṣikọna Jesu pete whẹpo e do yin whiwhè do pòtin go. Nukle wẹ e nọ to ozán lọ blebu mẹ, titengbe na e to awubla sinsinyẹn wutu. (Luku 22:42-44) Ozán enẹ mẹ wẹ Ju lẹ do okà e go te, bọ to wunkẹngbe Lomunu lẹ sọ sayana ẹn. (Matiu 26:67, 68; Johanu 19:1-3) Delẹ to whẹwhinwhẹ́n he wutu e na ko yawu kú lẹ mẹ niyẹn.

Linlẹn agọ̀: Jesu yin mẹde he nọ ylọ́n nukunmẹ, bọ nukunta etọn ma nọ họ́n gbede.

Nugbo lọ: Jesu nọ do jijọ Otọ́ olọn mẹ tọn etọn Jehovah tọn nkọ lẹ hia pẹẹ, mẹhe Biblu ylọdọ “Jiwheyẹwhe ayajẹnọ lọ.” (1 Timoti 1:11; Johanu 14:9) Nado dọ hójọhó, Jesu nọ plọn mẹdevo lẹ lehe yé gán yin ayajẹnọ do. (Matiu 5:3-9; Luku 11:28) Po kunnudenu ehelẹ po, e họnwun dọ nukunmẹ Jesu tọn nọ saba gọ́ na ayajẹ.