Weyọnẹntọ lẹ tindo kunnudenu he dutomẹji lẹ nado yise dọ Jesu nọgbẹ̀ pọ́n. Gando nuhe whenuho-kantọ owhe kanweko tintan po awetọ po tọn lẹ wlan dogbọn Jesu po Klistiani dowhenu tọn lẹ po go dali, otànwe de dọmọ: “Kandai voovo enẹlẹ dohia dọ mẹhe tlẹ jẹagọdo sinsẹ̀n Klistiani tọn to hohowhenu lẹ ma tindo ayihaawe gbede dọ Jesu nọgbẹ̀ pọ́n, podọ whla tintan he nudindọn yin finfọndote gando whẹho enẹ go matin whẹwhinwhẹ́n dolido de wẹ vivọnu owhe kanweko 18tọ tọn biọ owhe kanweko 19tọ mẹ kakajẹ bẹjẹeji owhe kanweko 20tọ tọn.” (Encyclopædia Britannica, zinjẹgbonu 2002 tọn.)

 To 2006, owe de dọmọ: “To egbehe, weyọnẹntọ azọ́nyọnẹntọ depope ma gán sọ tindo ayihaawe dọ Juvi de he nọ yin Jesu visunnu Josẹfu tọn ma nọgbẹ̀ pọ́n; suhugan yetọn wẹ yigbe dọ yé ko wá yọ́n nususu todin gando nuyiwa po nuplọnmẹ dodonu tọn etọn lẹ po go.” (Jesus and Archaeology)

 Biblu do Jesu hia taidi omẹ nujọnu tọn de. E donù oyín tọgbo etọn lẹ po hagbẹ whédo etọn tọn lẹ po tọn go. (Matiu 1:1; 13:55) E sọ donù oyín gandutọ nukundeji he nọgbẹ̀ to ojlẹ dopolọ mẹ hẹ Jesu lẹ tọn go. (Luku 3:1, 2) Nudọnamẹ gigọ́ enẹlẹ ko gọalọna dodinnanutọ lẹ nado mọdọ kandai Biblu tọn lẹ sọgbe.