Biblu plọnmẹ dọ, to nudida he to aigba ji lẹpo mẹ, gbẹtọ kleun de poun wẹ na yì olọn mẹ. (Osọhia 14:1, 3) Yé na yì dọ́n nado dugán hẹ Jesu taidi ahọlu lẹ podọ yẹwhenọ lẹ. (Luku 22:28-30; Osọhia 5:9, 10) Suhugan gbẹtọ lẹ tọn wẹ na yin finfọnsọnku nado nọgbẹ̀ kakadoi to paladisi mẹ to aigba ji.—Salmu lẹ 37:11, 29.

 Biblu ma dọ to fide dọ kanlin-yìnyìn lẹ kavi avún lẹ na yì olọn mẹ—na whẹwhinwhẹ́n dagbe de wutu. Kanlin lẹ ma gán wà nue mẹde dona wà nado jẹna “oylọ olọn tọn.” (Heblu lẹ 3:1) Delẹ to nue mẹde dona wà lẹ mẹ wẹ nado do oyọnẹn, tindo yise bosọ nọ setonuna nue Jiwheyẹwhe dọ lẹ. (Matiu 19:17; Johanu 3:16; 17:3) Gbẹtọ lẹ kẹdẹ wẹ Jiwheyẹwhe dá po linlẹn lọ po nado nọgbẹ̀ kakadoi.—Jenẹsisi 2:16, 17; 3:22, 23.

 Whẹpo nudida he to aigba ji de nado yì olọn mẹ, e dona yin finfọnsọnku whẹ́. (1 Kọlintinu lẹ 15:42) Biblu dọho gando fọnsọnku susu go. (1 Ahọlu lẹ 17:17-24; 2 Ahọlu lẹ 4:32-37; 13:20, 21; Luku 7:11-15; 8:41, 42, 49-56; Johanu 11:38-44; Owalọ lẹ 9:36-42; 20:7-12) Ṣigba gbẹtọ lẹ kẹdẹ wẹ yè fọnsọnku, e ma yin kanlin lẹ.

•  Be kanlin lẹ do alindọn ya?

•  Be alindọn gán kú ya?

•  Be kanlin lẹ nọ waylando ya?

•  Be e sọgbe nado ylanhùn do kanlin lẹ go ya?

 Paali. Biblu dọ dọ gbẹtọ po kanlin po bi wẹ yin alindọn. (Sọha lẹ 31:28) Whenue Adam he yin gbẹtọ tintan lọ yin didá, yè ma na ẹn alindọn de, amọ́ e “lẹzun alindọn gbẹ̀te.” (Jenẹsisi 2:7, Odò) Onú awe delẹ wẹ alindọn bẹhẹn: “kọ́gudu aigba tọn” po “gbọfufu ogbẹ̀ tọn” po.

 Gbau, Biblu plọnmẹ dọ alindọn gán kú. (Levitiku 21:11, Odò; Ezekiẹli 18:20) Eyin gbẹtọ po kanlin po kú, yé nọ gọ̀ do kọ́gudu aigba tọn mẹ. (Yẹwhehodọtọ 3:19, 20) Mí gán dọ dọ, yé masọ tin ba. a

 Paali. Nado waylando nọ biọ dọ mẹde ni lẹnnupọn kavi gbà osẹ́n Jiwheyẹwhe tọn. Eyin nudida de na waylando, e dona penugo bo lẹnnupọn nado bayi nudide he sọgbe, kanlin lẹ ma ka gán wà enẹ. Jọwamọ-liho wẹ yé nọ saba yinuwa te na ojlẹ he yé nọ nọgbẹ̀ na lẹpo. (2 Pita 2:12) Eyin ojlẹ he yé na nọgbẹ̀ na pé, yé nọ kú dile etlẹ yindọ yé ma waylando.

 Paali. Jiwheyẹwhe na gbẹtọ lẹ aṣẹ do kanlin lẹ ji, amọ́ e ma na yé aṣẹ nado nọ ṣì okà do yé. (Jenẹsisi 1:28; Salmu lẹ 8:6-8) Jiwheyẹwhe nọ hò kanlin dopodopo tọn pọ́n—kakajẹ ohẹ̀ flinflin lẹ lọsu ji. (Jona 4:11; Matiu 10:29) E degbena mẹhe nọ sẹ̀n ẹn lẹ ma nado nọ ylanhùn do kanlin lẹ go.—Eksọdusi 23:12; Deutelonomi 25:4; Howhinwhẹn lẹ 12:10.