Ahàn sinsinyẹn nùnù do jlẹkaji ma yin ylando. Biblu dohia dọ ovẹn yin nunina de sọn Jiwheyẹwhe dè he sọgan hẹn awuvivi wá dogọ to gbẹ̀mẹ. (Psalm 104:14, 15; Yẹwhehodọtọ 3:​13; 9:7) Biblu sọ dohia dọ ovẹn sọgan yidogọna agbasalilo.​—1 Timoti 5:​23.

 Jesu nù ovẹn to whenue e tin to aigba ji. (Matiu 26:29; Luku 7:​34) Dopo to azọ́njiawu Jesu tọn he mẹsusu yọnẹn ganji lẹ mẹ wẹ whenue e gbọn alọtútlú dali diọ osin zun ovẹn to hùnwhẹ alọwle tọn de tẹnmẹ.​—Johanu 2:​1-​10.

Owù he ahàn sinsinyẹn nùnù zẹjlẹgo bẹhẹn lẹ

 Dile etlẹ yindọ Biblu donù dagbe he ovẹn nọ wà lẹ go, e gbẹ́ ahànnunu zẹjlẹgo po ahànnumu po. Enẹwutu, Klistiani he de nado nùahàn dona nù do jlẹkaji. (1 Timoti 3:8; Titu 2:​2, 3) Biblu na whẹwhinwhẹ́n susu he wutu mí dona dapana ahànnunu zẹjlẹgo.

•   E nọ zọ́n bọ yè ma nọ lẹnnupọn ganji kavi yinuwa to aliho he sọgbe mẹ. (Howhinwhẹn lẹ 23:29-35) Mẹhe nọ nùahànmú ma sọgan setonuna gbedide Biblu tọn nado nọ ‘yí agbasa mítọn do basi avọ́sinsan he togbẹ̀, wiwe, he yin alọkẹyi na Jiwheyẹwhe, yèdọ sinsẹ̀nzọn wiwe he yin bibasi po huhlọn nulẹnpọn tọn mítọn po.’​—Lomunu lẹ 12:1.

•   Ahànnunu zẹjlẹgo na zọ́n bọ a ma na dava dewe podọ e nọ “de mẹwhinwhàn nado wà nuhe sọgbe sẹ̀.”​—Hosea 4:11, NW; Efesunu lẹ 5:18.

•   E sọgan dọnmẹ biọ ohẹ́n mẹ kavi doazọ̀nmẹ.​—Howhinwhẹn lẹ 23:21, 31, 32.

•   Ahànnunu zẹjlẹgo po ahànnumu po ma nọ hẹn homẹ Jiwheyẹwhe tọn hùn.​—Howhinwhẹn lẹ 23:20; Galatianu lẹ 5:19-21.

Ahàn nẹmu wẹ mẹde na nù bọ e nado zẹjlẹgo?

 Eyin ahàn he mẹde nù zọ́n bọ e to ede kavi mẹdevo lẹ zedo owù mẹ, be e ko nùahàn zẹjlẹgo. Sọgbe hẹ nuhe Biblu dọ, e ma yin mẹhe nùahàn bo ba ede mẹ pò wẹ yè nọ pọnhlan di mẹhe nùahànmú dandan gba, amọ́ ahànnumu nọ sọawuhia to nuyiwa delẹ mẹ taidi whenue mẹlọ ma yọ́n fihe e jei, to zọnlinzin gọ̀-gọ̀-gọ̀, jẹ fifiẹ ji, kavi to ohó demẹ-demẹ dọ. (Job 12:25; Psalm 107:27; Howhinwhẹn lẹ 23:29, 30, 33) Mẹhe nọ dapana ahànnumu lẹ lọsu tlẹ sọgan wá yí “nùnù zẹjlẹgo . . . do doagban pinpẹn” na yede bo jiya kọdetọn sinsinyẹn he enẹ nọ hẹnwa lẹ tọn.​—Luku 21:34, 35.

Nọla na ẹn pete

 Biblu sọ dọ dọ ojlẹ delẹ tin he mẹ Klistiani lẹ ma dona nọ nùahàn paali:

•   Eyin e na hẹn mẹdevo lẹ dahli.​—Lomunu lẹ 14:21.

•   Eyin otò he mẹ a te dosẹ́n ahàn sinsinyẹn nùnù tọn.​—Lomunu lẹ 13:1.

•   Eyin a ma sọgan nù do jlẹkaji. Mẹhe nọ nùahànmú lẹ po mẹhe e nọ vẹawuna nado nù do jlẹkaji lẹ po dona ze afọdide nujikudo tọn lẹ.​—Matiu 5:29, 30.