Eyin mẹde tlẹ mọdọ emi tindo jlọjẹ nado yiahọsu, mọwiwà jẹagọdo ayinamẹ Biblu tọn he dọmọ: “A dọ blo dọ: “N’na wà na ẹn kẹdẹdile e ko wà na mi do; N’na yiahọsu to e go.” (Howhinwhẹn lẹ 24:29, nudọnamẹ odò tọn) Biblu bẹ ayinamẹ he ko gọalọna mẹsusu nado duto ojlo lọ nado yiahọsu ji hẹn.

To hosọ ehe mẹ

•  Be e ylan nado yiahọsu wẹ ya?

•  Nawẹ Jiwheyẹwhe nọ sayana mẹhe ṣinuwa de gbọn?

•  Nawẹ n’gán duto ojlo lọ nado yiahọsu ji gbọn?

•  Linlẹn agọ̀ delẹ gando ahọsuyiyi go

 Eyin mẹde hẹn homẹgble we kavi gbleawuna we, jọwamọ-nu wẹ nado gblehomẹ bo jlo dọ mẹlọ ni yin yasana na nuhe e wà. Amọ́, ahọsuyiyi na míde jẹagọdo nuhe Biblu dọ. Gbọnna?

 Jiwheyẹwhe nọ gblehomẹ eyin gbẹtọ lẹ yiahọsu na yede. To Biblu mẹ, Jehovah a Jiwheyẹwhe dọmọ: “Ṣie wẹ ahọsuyi; yẹn na suahọ etọn.” (Lomunu lẹ 12:19) Biblu na tuli mẹhe yè ṣinuwa do de nado yí jijọho do didẹ whẹho lọ eyin e yọnbasi kakati nado to afọdona ahọsuyiyi. (Lomunu lẹ 12:18) Amọ́, etẹwẹ mẹde sọgan wà eyin aliho de matin nado didẹ whẹho lọ to jijọho mẹ kavi e ko wà nue go e pé lẹpo bọ e glo? Owe-wiwe lẹ na tuli mí nado dejido Jehovah go, na e na jla nuṣiwa lẹpo do.—Salmu lẹ 42:10, 11.

 Todin whẹ́, Jiwheyẹwhe na dotẹnmẹ aṣẹpatọ lẹ nado nọ sayana mẹhe wà nuylankan lẹ. (Lomunu lẹ 13:1-4) To nukọn mẹ, e na dawhẹna mẹhe ko hùwhẹ kanyinylan tọn lẹpo bo na de yajiji sẹ̀ kakadoi.—Isaia 11:4.

•   Nọ lẹnnupọn whẹpo do yinuwa. (Howhinwhẹn lẹ 17:27) E nọ saba wá vẹna mẹhe yinuwa to whenue yé to homẹgble ji lẹ to godo mẹ. Amọ́, mẹhe nọ yiagbọji bo nọ lẹnnupọn whẹpo do yinuwa lẹ nọ saba bayi dide dagbe lẹ.—Howhinwhẹn lẹ 29:11.

•   Nọ dindona whẹho lọ ganji. (Howhinwhẹn lẹ 18:13) E na yọ́n dọ mẹhe yè ṣinuwa do de ni kanse ede dọ, ‘Be nudelẹ tin he mẹ n’ma mọnukunnujẹ he na ko zọ́n bọ mẹlọ do yinuwa domọ ya? Be e to nuhahun sinsinyẹn de mẹ wẹ zọ́n ya? Kavi mayọnẹn mẹ wẹ e wàmọ te?’ Whedelẹnu, mí gán lẹndọ mẹde yọnẹn fẹẹ bo ṣinuwa do mí, amọ́ mayọnẹn mẹ wẹ e wàmọ te poun.

 Linlẹn agọ̀: Na Biblu ma dọ dọ mẹde sọgan yiahọsu na ede, enẹ dohia dọ mí ma gán yiavùnlọna míde eyin adán gbò mí.

 Nugbo lọ: Eyin adán gbò mẹde, e gán yiavùnlọna ede kavi dín alọgọ aṣẹpatọ lẹ tọn. Etomọṣo, Biblu dọ dọ eyin e yọnbasi, mí ni ma nọ tọ́navùn mẹ blo.—Howhinwhẹn lẹ 17:14.