Etẹwẹ Biblu Dọ Gando Kanlin He Nọ Yin Dinosaure lẹ Go?
Gblọndo Biblu tọn
Biblu ma donù dinosaure lẹ go to fidepope. Amọ́, Biblu dohia dọ Jiwheyẹwhe wẹ mẹhe “dá nulẹpo,” enẹwutu e họnwun dọ kanlin enẹlẹ lọsu tin to nuhe e dá lẹ mẹ. a (Osọhia 4:11) Dile etlẹ yindọ Biblu ma donù dinosaure lẹ go tlọlọ, e dlẹnalọdo pipli nudida delẹ tọn he mẹ yé sọgan ko tin te:
“Nudida daho hùmẹ tọn lẹ,” kavi “nudazi daho lẹ.”—Jenẹsisi 1:21; Biblu Wiwe lọ—Gun Alada.
“Kanlin he nọ lìn to aigba ji lẹpo.”—Jenẹsisi 1:25.
“Gbekanlin aigba ji tọn lẹ.”—Jenẹsisi 1:25.
Be kanlin devo lẹ wẹ diọ zun dinosaure lẹ ya?
Kakati pipotọ ohú dinosaure lẹ tọn ni dohia dọ yé wá aimẹ vudevude dile nuplọnmẹ nulẹ wá aimẹ na yede tọn nọ dohia do, lehe yé te do pẹpẹ wẹ pipotọ ohú yetọn lẹ tọn dohia. Ehe sọgbe hẹ hodidọ Biblu tọn lọ he dohia dọ Jiwheyẹwhe wẹ dá kanlin lẹpo. Di apajlẹ, Salmu lẹ 146:6 do Jiwheyẹwhe hia taidi “Didatọ olọn po aigba po tọn, ohù, gọna nuhe tin to yé mẹ lẹpo tọn.”
Whetẹnu wẹ dinosaure lẹ nọgbẹ̀ te?
Biblu basi zẹẹmẹ dọ kanlin hùmẹ tọn po aigba ji tọn lẹ po yin didá to azán atọ́ntọ po ṣidopotọ po gbè, kavi to ojlẹ nudida tọn whenu. b (Jenẹsisi 1:20-25, 31) Gbọnmọ dali, Biblu to didohia dọ ojlẹ de tin, ehe mẹ dinosaure lẹ nọgbẹ̀ te na whenu dindẹn.
Be dinosaure lẹ wẹ Bẹhemọti po Leviatani po yin ya?
Lala. Dile etlẹ yindọ yè ma sọgan dọ kanlin wunmẹ he kanlin enẹlẹ he yin nùdego to owe Jobu tọn mẹ yin taun, Bẹhemọti nọ saba yin alọdlẹndo taidi dẹgbó bọ Leviatani nọ yin alọdlẹndo taidi oló. Aliho he mẹ yé yin alọdlẹndo te enẹ sọgbe hẹ zẹẹmẹ he yin bibasi gando yé go to Owe-wiwe lẹ mẹ. (Jobu 40:15-23; 41:1, 14-17, 31) Enẹwutu, “Bẹhemọti” po “Leviatani” po ma sọgan yin alọdlẹndo taidi dinosaure lẹ to aliho depope mẹ. Jiwheyẹwhe dọna Jobu dọ ni pọ́n kanlin enẹlẹ tlintlin, podọ Jobu nọgbẹ̀ to whenue dinosaure lẹ ko bu sọn aimẹ te.—Jobu 40:16; 41:8.
Bọ etẹwẹ jọ do dinosaure lẹ go?
Biblu ma dọhodo lehe dinosaure lẹ bu sọn aimẹ do ji. Ṣigba, e dọ dọ nulẹpo wẹ yin didá “to ojlo [Jiwheyẹwhe tọn] mẹ,” enẹwutu e họnwun dọ lẹndai de wutu wẹ Jiwheyẹwhe na ko dá dinosaure lẹ. (Osọhia 4:11) To whenue lẹndai lọ ko yin hinhẹndi godo, Jiwheyẹwhe dike bọ dinosaure lẹ bu sọn aimẹ.
a Ohú po ohia dinosaure lẹ tọn po he yin mimọ to dodinnanu dòkunkun tọn lẹ whenu dohia dọ yé ko tin pọ́n. Na nugbo tọn, pipotọ ohú yetọn lẹ tọn dohia dọ dinosaure wunmẹ voovo he kiklo yetọn gbọnvo susu wẹ ko nọgbẹ̀ pọ́n.
b Hogbe lọ “azán” he yin yiyizan to Biblu mẹ sọgan sọ dlẹnalọdo ojlẹ de he dite na owhe fọtọ́n susu lẹ.—Jenẹsisi 1:31; 2:1-4; Heblu lẹ 4:4, 11.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Be Nuhe Lẹnunnuyọnẹn Dọ Sọgbe hẹ Nuhe Biblu Dọ Ya?
Be nuhe ma sọgbe to lẹnunnuyọnẹn-liho lẹ tin to Biblu mẹ wẹ ya?
NUPLỌNMẸ TANGAN BIBLU TỌN LẸ
Be Wẹkẹ lọ Yin Didá Wẹ Ya?
Mẹlẹ nọ saba mọnukunnujẹ kandai Biblu tọn mẹ to aliho agọ̀ mẹ kavi tlẹ nọ pọ́n ẹn hlan di otàngblo de. Be mí gán dejido nue Biblu dọ go ya?
NUPLỌNMẸ TANGAN BIBLU TỌN LẸ
Naegbọn Jiwheyẹwhe Do Dá Aigba?
Nudida he yọnwhanpẹ lẹ kẹdẹ wẹ gọ́ aigba ji. E tin to fie e jẹ dọ ni nọ do owhè pẹpẹ, bo dẹ́ do lehe e jẹ do bosọ nọ lilẹ́ jẹ obá he sọgbe pẹpẹ mẹ. Naegbọn Jiwheyẹwhe do dovivẹnu sọmọ nado dá aigba?
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.