Etẹwẹ E Zẹẹmẹdo Nado Yin Wiwe?
Gblọndo Biblu tọn
Nado yin wiwe zẹẹmẹdo nado yin didedovo sọn nuhe nọ hẹnmẹ flu lẹ mẹ. Hogbe Heblugbe tọn lọ “wiwe” wá sọn hogbe dowhenu tọn de mẹ he zẹẹmẹdo “klandovo.” Enẹwutu, nuhe yin wiwe nọ yin kinklandovo bo ma nọ yin yiyizan dile e nọ yin do to paa mẹ, kavi nọ yin pinpọnhlan di wiwe, titengbe na e madodiho kavi wé ṣeke wutu.
Wiwe-yinyin Jiwheyẹwhe tọn madodogbó. Biblu dọ dọ: “Mẹdepope ma tin he yin wiwe di Jehovah.” a (1 Samuẹli 2:2) Enẹwutu, jlọjẹ Jiwheyẹwhe tọn wẹ nado ze nujinọtedo wiwe-yinyin tọn lẹ dai.
Hogbe lọ “wiwe” gán yin yiyizan na nudepope he tindo kanṣiṣa hẹ Jiwheyẹwhe tlọlọ, titengbe nuhe yin didedovo mlẹnmlẹn nado yin yiyizan to sinsẹ̀n-bibasi etọn mẹ lẹ. Di apajlẹ, Biblu dọhodo nudelẹ ji taidi:
Fihe wé lẹ: Jiwheyẹwhe dọna Mose sẹpọ wùnkan he to jiji lọ dọmọ: “Aigba wiwe de ji wẹ hiẹ ṣite te.”—Eksọdusi 3:2-5.
Nujijọ wiwe lẹ: Islaelivi hohowhenu tọn lẹ nọ basi-sinsẹ̀n hlan Jehovah sọn ojlẹ de mẹ jẹ devo mẹ to hùnwhẹ sinsẹ̀n-bibasi tọn he nọ yin yiylọdọ “plidopọ wiwe lẹ” whenu.—Levitiku 23:37.
Nuyizan wiwe lẹ: Nuhe nọ yin yiyizan na sinsẹ̀n-bibasi Jiwheyẹwhe tọn to tẹmpli hohowhenu tọn Jelusalẹm tọn mẹ lẹ nọ yin yiylọdọ “nuyizan wiwe” lẹ. (1 Ahọlu lẹ 8:4) Nuyizan wiwe enẹlẹ dona nọ yin yiyizan po sisi po, dile etlẹ yindọ yè ma dona basi-sinsẹ̀n na yé gbede. b
Be gbẹtọvi mapenọ de sọgan yin wiwe ya?
Mọwẹ. Jiwheyẹwhe degbena Klistiani lẹ dọmọ: “Mì dona yin wiwe, na wiwe wẹ yẹn.” (1 Pita 1:16) Nugbo wẹ dọ gbẹtọvi mapenọ lẹ ma gán jẹ nujinọtedo pipé Jiwheyẹwhe tọn gando wiwe-yinyin go kọ̀n pọ́n gbede. Etomọṣo, gbẹtọvi he nọ setonuna osẹ́n dodo Jiwheyẹwhe tọn lẹ gán yin pinpọnhlan di “wiwe, [bo] yin alọkẹyi na Jiwheyẹwhe.” (Lomunu lẹ 12:1) Mẹhe to vivẹnudo nado yin wiwe nọ do ehe hia to ohó po walọ po mẹ. Di apajlẹ, e nọ hodo ayinamẹ Biblu tọn nado “yin wiwe bo nọla na fẹnnuwiwa zanhẹmẹ tọn” podọ nado “lẹzun wiwe to walọyizan [mẹtọn] lẹpo mẹ.”—1 Tẹsalonikanu lẹ 4:3; 1 Pita 1:15.
Be mẹde gán hẹn teninọ wiwe-yinyin tọn etọn to Jiwheyẹwhe dè bu ya?
Mọwẹ. Eyin mẹde gbẹkọ nujinọtedo walọ dagbe tọn Jiwheyẹwhe tọn lẹ go, Jiwheyẹwhe ma nasọ pọ́n ẹn hlan di wiwe ba. Di apajlẹ, owe Heblu lẹ tọn he to Biblu mẹ yin kinkan hlan “mẹmẹsunnu mẹwiwe lẹ,” ṣogan e na avase dọ yé gán wá wleawuna “ahun ylankan yise matindo tọn . . . gbọn agọjijoyigodo sọn Jiwheyẹwhe ogbẹ̀nọ lọ dè dali.”—Heblu lẹ 3:1, 12.
Pọndohlan agọ̀ lẹ gando wiwe-yinyin go
Pọndohlan agọ̀: Mẹde sọgan yin wiwe gbọn mẹdetiti mimọ́n dali.
Nugbo lọ: Biblu dohia dọ “yasisana agbasa,” kavi mẹdetiti mimọ́n zẹjlẹgo, ma yin “nuhọakuẹ depope” na Jiwheyẹwhe. (Kolosinu lẹ 2:23) Kakatimọ, Jiwheyẹwhe jlo dọ mí ni duvivi nudagbe lẹ tọn. “Mẹdopodopo ni nọ dù bo nọ nù bosọ nọ mọ awuvivi sọn azọ́n sinsinyẹn etọn lẹpo mẹ. Nunina Jiwheyẹwhe tọn wẹ e yin.”—Yẹwhehodọtọ 3:13.
Pọndohlan agọ̀: Tlẹnnọ-yinyin nọ hẹnmẹ yin wiwe dogọ.
Nugbo lọ: Dile etlẹ yindọ Klistiani de sọgan de ma nado wlealọ, Tlẹnnọ-yinyin poun ma nọ hẹnmẹ tindo teninọ wiwe-yinyin tọn to Jiwheyẹwhe nukọn. Nugbo wẹ dọ mẹhe gbọṣi tlẹnmẹ lẹ gán na ayidonugo sinsẹ̀n-bibasi matin ayihafẹsẹnamẹnu lẹ. (1 Kọlintinu lẹ 7:32-34) Amọ́, Biblu sọ dohia dọ mẹhe wlealọ lẹ lọsu sọgan yin wiwe. Na nugbo tọn, e whè gbau dopo to apọsteli Jesu tọn lẹ mẹ—enẹ wẹ Pita—wlealọ.—Matiu 8:14; 1 Kọlintinu lẹ 9:5.
a Jehovah wẹ yinkọ mẹdetiti tọn Jiwheyẹwhe tọn. Wefọ Biblu tọn kanweko susu wẹ yí yinkọ ehe zan dopọ hẹ hogbe lọ lẹ “wiwe” po “wiwe-yinyin” po.
b Biblu jẹagọdo sinsẹ̀n-bibasi na nuyizan sinsẹ̀n-bibasi tọn hohowhenu tọn lẹ.—1 Kọlintinu lẹ 10:14.
A Gán Sọ Pọ́n Hosọ Ehelẹ
NUPLỌNMẸ TANGAN BIBLU TỌN LẸ
Be Jiwheyẹwhe Kẹalọyi Dọ Mí Ni Nọ Zan Boṣiọ lẹ Do Sẹ̀n Emi Ya?
Be yé gán gọalọna mí nado vẹ́ po Jiwheyẹwhe he mí ma nọ mọ nukun-sọ-nukun po ya?
GBLỌNDO NA KANBIỌ SINAI DO BIBLU JI LẸ
Be Nuplọnmẹ ‘Whlẹngán Whladopo, Whlẹngán Kakadoi’ Tọn Sọgbe hẹ Biblu Ya?
Jesu yí apajlẹ de zan he na gblọndo kanbiọ enẹ tọn.
ATỌ̀HỌ̀-NUHIHỌ́ LỌ TỌN
Be Klistiani Lizọnyizọnwatọ lẹ Dona Nọ Nọ̀ Tlẹnmẹ Wẹ Ya?
Sinsẹ̀n delẹ nọ biọ dọ sinsẹ̀ngán po nukọntọ sinsẹ̀n tọn yetọn lẹ po ni nọ nọ̀ tlẹnmẹ. Amọ́, etẹwẹ Owe-wiwe lẹ plọnmẹ?
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.