To Biblu mẹ, hogbe he yin lilẹdo “fọnsọnku” wá sọn hogbe Glẹkigbe tọn lọ a·naʹsta·sis mẹ, ehe zẹẹmẹdo “finfọn” kavi “finfọnṣite whladopo dogọ.” Mẹhe yin finfọnsọnku de nọ yin finfọn sọn oṣiọ lẹ mẹ gọwá ogbẹ̀ taidi mẹhe nkọ e yin whẹpo do kú.—1 Kọlintinu lẹ 15:12, 13.

 Dile e tlẹ yindọ hogbe lọ “fọnsọnku” ma sọawuhia to Owe-wiwe Heblu tọn lẹ mẹ, ehe nọ saba yin yiylọdọ Alẹnu Hoho, nuplọnmẹ fọnsọnku tọn sọawuhia to e mẹ. Di apajlẹ, Jiwheyẹwhe dopagbe gbọn yẹwhegán Hosea gblamẹ dọmọ: “Yẹn na fli yé gọ̀ sọn huhlọn Yọdò tọn si; yẹn na hò yé yí sọn okú si.”—Hosea 13:14; Jobu 14:13-15; Isaia 26:19; Daniẹli 12:2, 13.

 Fie wẹ gbẹtọ lẹ na yin finfọn do? Mẹdelẹ na yin hinhẹngọwa ogbẹ̀ do olọn mẹ nado dugán hẹ Klisti taidi ahọlu. (2 Kọlintinu lẹ 5:1; Osọhia 5:9, 10) Biblu ylọ ehe dọ “fọnsọnku tintan,” ehe dohia dọ fọnsọnku awetọ de na bọdego. (Osọhia 20:6; Filipinu lẹ 3:11) Fọnsọnku he na jọ to nukọn mẹ ehe na wá aimẹ to aigba ji, bọ suhugan mẹhe na gọwá ogbẹ̀ lẹ tọn na duvivi aigba tọn.—Salmu lẹ 37:29.

 Nawẹ gbẹtọ lẹ na yin finfọnsọnku gbọn? Jiwheyẹwhe ko na aṣẹ Jesu nado fọ́n oṣiọ lẹ sọnku. (Johanu 11:25) Jesu na hẹn “mẹhe to yọdò oflin tọn lẹ mẹ lẹpo” gọwá ogbẹ̀, yèdọ mẹdopodopo sọgbe hẹ ninọmẹ etọn, gbẹtọ-yinyin etọn po nugopipe nufinflin tọn etọn lẹ po. (Johanu 5: 28, 29) Mẹhe na yin finfọn do olọn mẹ lẹ na tindo agbasa gbigbọnọ bọ mẹhe na yin finfọn do ogbẹ̀ to aigba ji lẹ na tindo agbasa paa de, bo na tindo agbasalilo pipé de.—Isaia 33:24; 35:5, 6; 1 Kọlintinu lẹ 15:42-44, 50.

 Mẹnu lẹ wẹ na yin finfọnsọnku? Biblu dọ dọ “fọnsọnku dodonọ lẹ po mawadodonọ lẹ po tọn de na tin.” (Owalọ lẹ 24:15) Dodonọ lẹ bẹ omẹ nugbonọ lẹ, taidi Noa, Sala po Ablaham po hẹn. (Jenẹsisi 6:9; Heblu lẹ 11:11; Jakọbu 2:21) Mawadodonọ lẹ bẹ mẹhe ma setonuna osẹ́n Jiwheyẹwhe tọn lẹ na yé ma tindo dotẹnmẹ hundote lọ nado plọn bosọ setonuna yé wutu.

 Amọ́, mẹhe ko peve to ylanwiwa mẹ sọmọ bo ma gán lẹnvọjọ ba lẹ ma na yin finfọnsọnku. Eyin omẹ mọnkọ lẹ kú, yé ma nọ tindo todido nado gọwá nọgbẹ̀.—Matiu 23:33; Heblu lẹ 10:26, 27.

 Whetẹnu wẹ fọnsọnku na wá aimẹ? Biblu dọ dọdai dọ fọnsọnku do olọn mẹ na jọ to tintin tofi Klisti tọn whenu, ehe bẹjẹeji to 1914. (1 Kọlintinu lẹ 15:21-23) Fọnsọnku do ogbẹ̀ to aigba ji na wá aimẹ to Gandudu Owhe Fọtọ́n tọn Jesu Klisti tọn whenu, yèdọ to whenue aigba na yin didiọ zun paladisi de.—Luku 23:43; Osọhia 20:6, 12, 13.

 Naegbọn yise to fọnsọnku mẹ do sọgbe hẹ lẹnpọn dagbe? Kandai Biblu tọn dọhodo fọnsọnku omẹ ṣinẹnẹ delẹ tọn ji, ehe mẹhe mọ nujijọ lọ lẹ dopodopo dekunnu etọn. (1 Ahọlu lẹ 17:17-24; 2 Ahọlu lẹ 4:32-37; 13:20, 21; Luku 7:11-17; 8:40-56; Johanu 11:38-44; Owalọ lẹ 9:36-42; Owalọ lẹ 20:7-12; 1 Kọlintinu lẹ 15:3-6) Lazalọsi he Jesu fọnsọnku jẹna ayidego taun, na Lazalọsi ko kú na azán ẹnẹ podọ Jesu wà azọ́njiawu ehe to mẹsusu nukọn. (Johanu 11:39, 42) Kẹntọ Jesu tọn lẹ ma tlẹ gán gbẹ́ dọ ehe jọ, enẹwutu yé gbọ bo blasé nado hù Jesu po Lazalọsi po.—Johanu 11:47, 53; 12:9-11.

 Biblu dohia dọ Jiwheyẹwhe tindo nugopipe po ojlo lọ po nado hẹn oṣiọ lẹ gọwá ogbẹ̀. E tindo nugopipe madodogbó nado flin nulẹpo gando mẹhe e na fọnsọnku lẹ go bo na yí huhlọn ganhunupotọ tọn etọn do fọ́n yé. (Jobu 37:23; Matiu 10:30; Luku 20:37, 38) Jiwheyẹwhe penugo nado fọ́n oṣiọ lẹ gọwá ogbẹ̀, podọ e jlo nado wàmọ! To whenue Biblu to hodọdo fọnsọnku he ja to nukọn mẹ lọ ji, e dọ gando Jiwheyẹwhe go dọmọ: “Hiẹ na tindo ojlo vẹkuvẹku nado mọ azọ́n alọ towe lẹ tọn.”—Jobu 14:15.

Linlẹn agọ̀ delẹ gando fọnsọnku go

 Otàngblo: Fọnsọnku zẹẹmẹdo alindọn po agbasa po hinhẹngọwa nọpọ́

 Nugbo: Biblu plọnmẹ dọ alindọn yin gbẹtọ blebu, e ma yin nude to gbẹtọ mẹ bo nọ luntọ́n to okú godo. (Jenẹsisi 2:7, nudọnamẹ odò tọn; Ezekiẹli 18:4) Mẹhe yin finfọnsọnku ma nọ gọwá nọpọ́ po alindọn etọn po; e nọ yin vivọ́ dá taidi alindọn gbẹ̀te wẹ.

 Otàngblo: Mẹdelẹ na yin finfọnsọnku bo nasọ yin vivasudo to afọdopolọji.

 Nugbo: Biblu plọnmẹ dọ “mẹhe wà nuylankan lẹ” na mọ “fọnsọnku whẹdida tọn” de yí. (Johanu 5:29) Amọ́, whẹdida ehe na sinai do nuhe yé wà to whenue yé yin finfọnsọnku godo ji, e ma yin do nuhe yé wà whẹpo do kú ji. Jesu dọmọ: “Oṣiọ lẹ na sè ogbè Visunnu Jiwheyẹwhe tọn lọ tọn bọ mẹhe ko dotoai lẹ na nọgbẹ̀.” (Johanu 5:25) Mẹhe ko ‘dotoai lẹ,’ kavi setonu na nuhe yé plọn to whenue yé yin finfọnsọnku godo lẹ sin oyín na yin kinkando “owe-hihá ogbẹ̀ tọn” mẹ.—Osọhia 20:12, 13.

 Otàngblo: Eyin mẹde fọnsọnku, mẹlọ na tindo agbasa dopolọ he e tindo dai pẹẹ whẹpo do kú.

 Nugbo: To whenue mẹde kú godo, e yọnbasi dọ agbasa mẹlọ tọn ni gble kavi yọ̀n.—Yẹwhehodọtọ 3:19, 20.