Etẹwẹ Whlẹngán Yin?
Gblọndo Biblu tọn
Biblu-kantọ lẹ nọ yí hogbe lọ lẹ “whlẹn” po “whlẹngán” po zan to whedelẹnu nado do linlẹn lọ hia dọ mẹde yin whinwhlẹn sọn owù kavi vasudo mẹ. (Eksọdusi 14:13, 14; Owalọ lẹ 27:20) Ṣigba, hogbe ehelẹ nọ saba dlẹnalọdo whlẹngán sọn ylando mẹ. (Matiu 1:21) To whenuena e yindọ ylando wẹ nọ hẹn okú wá, mẹhe yin whinwhlẹn sọn ylando mẹ tindo todido lọ nado nọgbẹ̀ kakadoi.—Johanu 3:16, 17. a
Etẹwẹ mí sọgan wà nado mọ whlẹngán?
Nado mọ whlẹngán, mí dona tindo yise to Jesu mẹ bo do yise enẹ hia gbọn tonusisena gbedide etọn lẹ dali.—Owalọ lẹ 4:10, 12; Lomunu lẹ 10:9, 10; Heblu lẹ 5:9.
Biblu dohia dọ yise mítọn dona tindo azọ́n kavi mí dona nọ setonu nado dohia dọ yise mítọn to ogbẹ̀. (Jakọbu 2:24, 26) Ṣigba, ehe poun ma ko dohia dọ mí jẹna whlẹngán gba. “Nunina Jiwheyẹwhe tọn” wẹ e yin, na “nukundagbe majẹhẹ” kavi “ojọmiọn” etọn wutu.—Efesunu lẹ 2:8, 9; Biblu Wiwe lọ—Gun Alada.
Be whlẹngán sọgan gbọ mí go ya?
Mọwẹ. Dile mẹhe to tọ̀kú bo yin whinwhlẹngán de sọgan vọ́ jẹ kavi lọ́n biọ tọ̀mẹ do, mọ wẹ mẹhe yin whinwhlẹn sọn ylando mẹ ṣigba bo wá gboawupo nado do yise hia sọgan ba whlẹngán pò do. Ehe wutu wẹ Biblu na tuli Klistiani he ko mọ whlẹngán yí lẹ “nado hoavùn sinsinyẹn na yise lọ.” (Juda 3) E sọ na avase mẹhe ko yin whinwhlẹngán lẹ dọmọ: “Mì nọ yí obu po sisọsisọ po do to azọ́nwa na whlẹngán mìtọn titi.”—Filipinu lẹ 2:12.
Mẹnu wẹ yin Mẹwhlẹngántọ—Jiwheyẹwhe kavi Jesu?
Biblu do Jiwheyẹwhe hia taidi asisa tangan whlẹngán tọn bo nọ saba dlẹnalọdo e taidi “Whlẹngántọ” kavi “Mẹwhlẹngántọ.” (1 Samuẹli 10:19; Isaia 43:11; Titu 2:10; Juda 25) Humọ, Jiwheyẹwhe yí sunnu voovo lẹ zan nado whlẹn akọta Islaeli hohowhenu tọn bọ Biblu ylọ yé dọ “mẹwhlẹngántọ lẹ.” (Nẹhemia 9:27; Whẹdatọ lẹ 3:9, 15; 2 Ahọlu lẹ 13:5) b Mọdopolọ, to whenuena e yindọ gbọn Jesu Klisti gblamẹ wẹ Jiwheyẹwhe wleawuna whlẹngán sọn ylando mẹ, Biblu dlẹnalọdo Jesu taidi “Mẹwhlẹngántọ.”—Owalọ lẹ 5:31; Titu 1:4. c
Be mẹlẹpo wẹ na yin whinwhlẹngán ya?
Lala, mẹdelẹ ma na yin whinwhlẹngán. (2 Tẹsalonikanu lẹ 1:9) To whenue yè kanse Jesu dọ, “Be omẹ vude wẹ na yin whinwhlẹngán ya?” e gblọn dọmọ: “Mì vánkan vẹkuvẹku nado gbọn ohọ̀n bibó lọ nù biọ e mẹ, na yẹn dọna mì dọ, mẹsusu wẹ na dín nado biọ e mẹ ṣigba bo ma na penugo.”—Luku 13:23, 24.
Pọndohlan agọ̀ lẹ gando whlẹngán pọmẹ tọn go
Pọndohlan agọ̀: Gbọn didọ dali dọ “mẹlẹpo na yin hinhẹnwa ogbẹ̀ to Klisti mẹ,” 1 Kọlintinu lẹ 15:22 to pinplọnmẹ dọ whlẹngán pọmẹ tọn tin.
Nugbo lọ: Fọnsọnku ji wẹ lẹdo wefọ ehe tọn to hodọ do. (1 Kọlintinu lẹ 15:12, 13, 20, 21, 35) Enẹwutu, nuhe hodidọ lọ “mẹlẹpo na yin hinhẹnwa ogbẹ̀ to Klisti mẹ” zẹẹmẹdo poun wẹ yindọ mẹhe yin finfọnsọnku lẹpo na mọ dona ehe yí gbọn Jesu Klisti gblamẹ.—Johanu 11:25.
Pọndohlan agọ̀: Gbọn didọ dali dọ Jiwheyẹwhe ‘hẹn whlẹngán wá na gbẹtọ lẹpo,’ Titu 2:11 to pinplọnmẹ dọ whlẹngán pọmẹ tọn tin.
Nugbo lọ: Hogbe Glẹki tọn lọ he yin lilẹdo “lẹpo” to wefọ ehe mẹ sọgan sọ zẹẹmẹdo “wunmẹ lẹpo.” d Enẹwutu, nukunnumọjẹnumẹ he sọgbe gando Titu 2:11 go wẹ yindọ, Jiwheyẹwhe hẹn whlẹngán yọnbasi na gbẹtọ wunmẹ lẹpo, ehe bẹ gbẹtọ lẹ “sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ podọ sọn ogbè lẹpo mẹ” hẹn.—Osọhia 7:9, 10.
Pọndohlan agọ̀: Gbọn didọ dali dọ Jiwheyẹwhe “ma jlo dọ mẹdepope ni yin vivasudo,” 2 Pita 3:9 to pinplọnmẹ dọ whlẹngán pọmẹ tọn tin.
Nugbo lọ: Jiwheyẹwhe jlo dọ gbẹtọ lẹ ni yin whinwhlẹngán, amọ́ e ma nọ hẹn yé gánnu-gánnu nado kẹalọyi whlẹngán ehe. “Azán whẹdida tọn” etọn na bẹ “vasudo omẹ jijọ-madi-Jiwheyẹwhe tọn lẹ tọn” hẹn.—2 Pita 3:7.
a Biblu nọ dọ dọ mẹde “ko yin whinwhlẹngán” eyin mẹlọ ma tlẹ ko yin whinwhlẹngán sọn ylando po okú po si.—Efesunu lẹ 2:5; Lomunu lẹ 13:11.
b To wefọ he yin sislẹ lẹ mẹ, lẹdogbedevomẹ delẹ yí hogbe lọ lẹ “awhànfuntọ-gán,” “whlẹngántọ,” “asuka,” “nukọntọ,” kavi etlẹ yin “mẹde” zan kakati nido yin “mẹwhlẹngántọ.” Ṣigba, to Biblu Heblugbe dowhenu tọn mẹ, hogbe dopolọ wẹ yin yiyizan na gbẹtọvi whlẹngántọ kavi mẹwhlẹngántọ enẹlẹ dile e yin yiyizan do to fidevo lẹ to Biblu mẹ nado dlẹnalọdo Jehovah Jiwheyẹwhe taidi Whlẹngántọ kavi Mẹwhlẹngántọ.—Salmu lẹ 7:10.
c Yinkọ lọ Jesu wá sọn yinkọ Heblugbe tọn lọ Yehoh·shuʹaʽ mẹ, ehe zẹẹmẹdo “Jehovah Wẹ Whlẹngán.”
d Pọ́n Vine’s Complete Expository Dictionary of Old and New Testament Words. Hogbe Glẹkigbe tọn dopolọ wẹ sọawuhia to Matiu 5:11 mẹ, ehe bẹ hodidọ Jesu tọn lẹ hẹn dọ gbẹtọ lẹ na dọ nuylankan “hunkọhunkọ lẹ” do hodotọ etọn lẹ go.—Biblu Wiwe lọ—Gun Alada.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Nawẹ Avọ́sinsan Jesu Tọn Yin “Ofligọ de Do Ota Mẹsusu Tọn mẹ” Gbọn?
Nawẹ ofligọ lọ tún gbẹtọvi lẹ dote sọn ylando si gbọn?
GBLỌNDO NA KANBIỌ SINAI DO BIBLU JI LẸ
Be Nuplọnmẹ ‘Whlẹngán Whladopo, Whlẹngán Kakadoi’ Tọn Sọgbe hẹ Biblu Ya?
Jesu yí apajlẹ de zan he na gblọndo kanbiọ enẹ tọn.
GBLỌNDO NA KANBIỌ SINAI DO BIBLU JI LẸ
Be Yise to Jesu mẹ Ko Pé Nado Mọ Whlẹngán Wẹ Ya?
Biblu dọho gando mẹdelẹ he tindo yise to Jesu mẹ go, amọ́ yé ma na mọ whlẹngán. Etẹwutu e do yinmọ?
NUPLỌNMẸ TANGAN BIBLU TỌN LẸ
Naegbọn Jesu Do Kú?
To Biblu mẹ, okú Jesu tọn yin nujọnu taun. Be okú etọn tindo lẹndai de ya?
ZẸẸMẸ WEFỌ BIBLU TỌN LẸ TỌN
Zẹẹmẹ Lomunu lẹ 10:13 Tọn —“Ylọ Oyín Oklunọ Tọn”
Jiwheyẹwhe hùn dotẹnmẹ dote na gbẹtọ lẹpo nado yin whinwhlẹngán bo mọ ogbẹ̀ madopodo, mahopọnna otò he mẹ yé wá sọn, sinmẹ agbasa tọn yetọn kavi otẹn he mẹ yé tin te.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.