Nukunbibia daho lọ na hẹn ojlẹ hunyanhunyan tọn daho hugan he gbẹtọvi lẹ ma ko tindo numimọ etọn pọ́n lọ wá yé ji. Sọgbe hẹ dọdai Biblu tọn, e na wá aimẹ to “azán godo tọn lẹ mẹ” kavi to “ojlẹ opodo tọn mẹ.” (2 Timoti 3:1; Daniẹli 12:4) E na yin ‘nukunbibia daho de ehe nkọ ma ko jọ pọ́n sọn bẹjẹeji aihọn tọn gbọ́n kakajẹ din, lala, e ma nasọ jọ gbede ba.’—Malku 13:19; Daniẹli 12:1; Matiu 24:21, 22.

Nujijọ he na wá aimẹ to nukunbibia daho lọ whenu lẹ

•   Vasudo sinsẹ̀n lalo tọn. Sinsẹ̀n lalo na yin vivasudo po awuyiya he hẹnmẹ jọsi de po. (Osọhia 17:1, 5; 18:9, 10, 21) Huhlọn tonudidọ tọn lẹ he Plidopọ Akọta lẹ tọn nọtena wẹ na hẹn ojlo Jiwheyẹwhe tọn di gbọn afọdide ehe zize dali.—Osọhia 17:3, 15-18. a

•   Mẹgbeyinyan sọta sinsẹ̀n-bibasi nugbo. Bẹplidopọ akọta lẹ tọn de he yin alọdlẹndo to numimọ Ezekiẹli tọn de mẹ taidi “Gọgi aigba Magọgi tọn,” na tẹnpọn nado và mẹhe nọ basi sinsẹ̀n nugbo lẹ sudo. Amọ́, Jiwheyẹwhe na basi hihọ́na sinsẹ̀n-basitọ etọn lẹ bọ yé ma na yin vivasudo.—Ezekiẹli 38:1, 2, 9-12, 18-23.

•   Whẹdida na mẹhe nọ nọ̀ aigba ji lẹ. Jesu na dawhẹna gbẹtọvi lẹpo bo “na klan gbẹtọ lẹ dovo, yèdọ ode sọn awetọ go, kẹdẹdile lẹngbọhọtọ de nọ klan lẹngbọ lẹ sọn gbọgbọẹ lẹ go do.” (Matiu 25:31-33) Whẹdida etọn na sinai do nudide mẹdopodopo tọn nado nọgodona kavi gbigbẹ́ nado nọgodona “mẹmẹsunnu” Jesu tọn lẹ ji, enẹ wẹ mẹhe na dugán hẹ ewọ to olọn mẹ lẹ.—Matiu 25:34-46.

•   Gandutọ Ahọluduta lọ tọn lẹ bibẹpli. Nugbonọ he yin dide nado duahọlu hẹ Klisti lẹ na dotana gbẹzan aigba ji tọn yetọn bo na yin finfọn nado nọgbẹ̀ to olọn mẹ.—Matiu 24:31; 1 Kọlintinu lẹ 15:50-53; 1 Tẹsalonikanu lẹ 4:15-17.

•   Amagẹdọni. “Awhàn azán daho Jiwheyẹwhe Ganhunupotọ lọ tọn” ehe sọ nọ yin yiylọdọ “azán Jehovah tọn.” (Osọhia 16:14, 16; Isaia 13:9; 2 Pita 3:12) Mẹhe Klisti gblewhẹdo lẹ na yin vivasudo. (Zefania 1:18; 2 Tẹsalonikanu lẹ 1:6-10) Ehe na bẹ vasudo titonu tonudidọ tọn lẹdo aihọn pé tọn hẹn, ehe Biblu yijlẹdo gbekanlin he tindo ota ṣinawe de go.—Osọhia 19:19-21.

Nujijọ he na wá aimẹ to nukunbibia daho lọ godo lẹ

•   Satani po aovi etọn lẹ po na yin ginglọn. Angẹli huhlọnnọ de na dlan Satani po aovi lẹ po do “odò mapote” lọ mẹ, ehe nọtena ninọmẹ nude ma yiwà tọn de he taidi okú. (Osọhia 20:1-3) Ninọmẹ Satani tọn to odò mapote lọ mẹ gán yin yiyijlẹdo gànpamẹninọ go; e ma na penugo nado yinuwado ninọmẹ nulẹ tọn ji to fidevo depope ji.—Osọhia 20:7.

•   Owhe Fọtọ́n lọ bẹjẹeji. Ahọluduta Jiwheyẹwhe tọn na bẹ gandudu 1 000 tọn etọn jẹeji, ehe na hẹn dona mayọnjlẹ lẹ wá na gbẹtọvi lẹ. (Osọhia 5:9, 10; 20:4, 6) “Gbẹtọ susugege” de he sọha yetọn ma yin yinyọnẹn na “jugbọn nukunbibia daho lọ mẹ” luntọ́n, bo na mọ bẹjẹeji gandudu owhe fọtọ́n lọ tọn to aigba ji.—Osọhia 7:9, 14; Salmu lẹ 37:9-11.