Gbau! Biblu yin owe de he wá sọn “Jiwheyẹwhe he nọ miọnhomẹna mẹhe jẹflumẹ lẹ” dè. (2 Kọlintinu lẹ 7:6) Dile etlẹ yindọ Biblu ma yin owe doto he nọ penukundo apọ̀nmẹ-zọ̀n go lẹ tọn de, e ko gọalọna mẹsusu nado duto linlẹn lọ nado hù yede ji. Ayinamẹ dagbe he to e mẹ lẹ gán gọalọna hiẹ lọsu.

•  Ayinamẹ he sọgbe tẹlẹ wẹ Biblu na?

•  Be Biblu dọho gando mẹdelẹ he biọ okú na yede go ya?

•  Wefọ Biblu tọn tẹlẹ wẹ gán gọalọna we nado duto linlẹn lọ nado hù dewe ji?

•  Etẹwẹ a na wà eyin a sè bọ họntọn towe de dọ dọ, “N’jlo na hù dee”?

•  Etẹwẹ n’na wà eyin n’ko tẹnpọn nado hù dee to ojlẹ de mẹ wayi?

• ● Nọ dọ nue lẹn a te lẹ tọ́n na mẹde.

   Nuhe Biblu dọ: “Họntọn nugbo nọ yiwannamẹ to whelẹponu podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

   Zẹẹmẹ: Mí nọ do hudo godonọnamẹ mẹdevo lẹ tọn to whenue linlẹn he to ahunmẹduna mí lẹ hẹn mí jẹflumẹ.

   Eyin a ṣí linlẹn towe lẹ ji bo ma dọ tọ́n na mẹde, a na doagbàn kọ̀ji na dewe, bọ hinhẹn sọgan wá glo we. Amọ́, eyin a nọ dọ numọtolanmẹ towe lẹ tọ́n, yé ma na wá húagbọ́ we podọ a na penugo nado ze ayiha do nue sọgbe lẹ ji.

   Tẹ́n ehe pọ́n: Dọhona mẹde to egbé, vlavo hagbẹ whẹndo tọn kavi họntọn dejidego de. a A tlẹ sọgan sọ kàn nue lẹn a te lẹ do wema de mẹ.

• ● Biọ alọgọ doto azọ́nyọnẹntọ lẹ tọn.

   Nuhe Biblu dọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.”—Matiu 9:12.

   Zẹẹmẹ: Mí dona nọ yì dotowhé eyin mí to azọ̀njẹ.

   Eyin mẹde nọ tindo linlẹn nado hù ede, be ohia de wẹ dọ mẹlọ to azọ̀njẹ to apọ̀nmẹ kavi to numọtolanmẹ-liho. Azọ̀n wunmẹ ehelẹ ma yin winyannu de kẹdẹdile e nọ yindo na azọ̀n paa he pò lẹ. Podọ yé tindo pọngbọ.

   Tẹ́n ehe pọ́n: Dín alọgọ doto azọ́nyọnẹntọ de tọn dile e gán yawu yọnbasi do.

• ● Hẹn do ayiha mẹ dọ onú towe nọ duahunmẹna Jiwheyẹwhe.

   Nuhe Biblu dọ: “Oblẹnọ atọ́n wẹ nọ yin sisà yin abọgan-kuẹ pẹvi awe, kavi e ma yin mọ wẹ? Ṣogan, Jiwheyẹwhe ma nọ wọn depope to yé mẹ. . . . Mì dibu blo; mìwlẹ họakuẹ hú oblẹnọ susu.”—Luku 12:6, 7.

   Zẹẹmẹ: A họakuẹ to nukun Jiwheyẹwhe tọn mẹ.

   E gán nọ di na we dọ mẹde ma to towe dọ, amọ́ Jiwheyẹwhe mọnukunnujẹ nue pehẹ a te mẹ. Onú towe nọ duahunmẹna ẹn—etlẹ yin to whenue gbẹninọ ko ṣiapọ̀ na we. Salmu lẹ 51:17 dọmọ: “Jiwheyẹwhe E, hiẹ ma na gbẹ́ ahun he jẹflumẹ bo to awubla dai.” Na nugbo tọn, Jiwheyẹwhe yiwanna we bo jlo dọ a ni nọgbẹ̀.

   Tẹ́n ehe pọ́n: Gbadopọnna kunnudenu he Biblu na he dohia dọ Jiwheyẹwhe yiwanna we lẹ. Di apajlẹ, pọ́n weta 24tọ owe oplọn tọn lọ Dọnsẹpọ Jehovah tọn.

• ● Nọ hodẹ̀ hlan Jiwheyẹwhe.

   Nuhe Biblu dọ: “Mì to magbọjẹ mìtọn lẹpo bẹ dlan [Jiwheyẹwhe] ji, na e to mìtọn hòpọn wutu.”—1 Pita 5:7.

   Zẹẹmẹ: Jiwheyẹwhe biọ to asi we nado nọ dọ nue to ahun ji na we lẹ na ẹn po ahundopo po.

   Jiwheyẹwhe sọgan na we jijọho ahun mẹ tọn gọna huhlọn he a nado to akọndona zọnmii. (Filipinu lẹ 4:6, 7, 13) Enẹ wẹ zọ́n bọ e nọ penukundo mẹhe nọ dawhá ylọ ẹ po ahundopo po lẹ go.—Salmu lẹ 55:22.

   Tẹ́n ehe pọ́n: Hodẹ̀ hlan Jiwheyẹwhe to egbé. Yí yinkọ etọn Jehovah zan, bo dọ numọtolanmẹ towe lẹ tọ́n na ẹn. (Salmu lẹ 83:18) Vẹ̀ ẹ dọ ni gọalọna we ma nado hònuplá.

• ● Nọ lẹnayihamẹpọn do todido he Biblu namẹ gando sọgodo go ji.

   Nuhe Biblu dọ: “Todido he mí tindo ehe tin taidi húnsingàn de na ogbẹ̀ mítọn, bo yin nujikudo tọn bosọ lodo.”—Heblu lẹ 6:19, po nudọnamẹ odò tọn po.

   Zẹẹmẹ: Numọtolanmẹ towe lẹ sọgan nọ diọ whẹwhẹ taidi tọjihun de he yujẹhọn nọ to yidọn-yide do na, bọ eyin a jaya zande, tlolo a gán sọ blawu, ṣigba todido he Biblu bẹhẹn lẹ sọgan na we huhlọn nado deanana numọtolanmẹ towe lẹ.

   Todido enẹ ma yin nukundido he ma do jide kavi odlọ nudagbe tọn kúkú poun gba, amọ́ e sinai do opagbe Jiwheyẹwhe tọn nado de awufiẹsa mítọn lẹpo sẹ̀ ji.—Osọhia 21:4.

   Tẹ́n ehe pọ́n: A na plọn nususu dogọ do todido he Biblu namẹ ji, eyin a gbadopọnna nupinplọn 5tọ alọnuwe lọ Wẹndagbe de sọn Jiwheyẹwhe Dè! tọn.

• ● Nọ doalọ to nuwiwa he a yiwanna de mẹ.

   Nuhe Biblu dọ: “Amasin dagbe de wẹ ahun he gọ́ na ayajẹ yin.”—Howhinwhẹn lẹ 17:22.

   Zẹẹmẹ: Eyin mí nọ wà nue nọ hẹn ayajẹ wá na mí lẹ, enẹ sọgan de lẹnpọn mítọn lẹ pò bosọ hẹn mí tindo numọtolanmẹ he sọgbe lẹ dogọ.

   Tẹ́n ehe pọ́n: Nọ wà nude he nọ saba hẹn awuvivi wá na we. Di apajlẹ, dotó nuhiho mẹjlọdote tọn lẹ, hia owe tulinamẹ tọn de, kavi daihun he a yiwanna de. A nasọ do ayajẹ dogọ eyin a nọ wà nude nado gọalọna mẹdevo lẹ, etlẹ gán nọma yin onú kaka de.—Owalọ lẹ 20:35.

• ● Penukundo agbasalilo towe go.

   Nuhe Biblu dọ: “Agbasa yiyizan yin alenu.”—1 Timoti 4:8.

   Zẹẹmẹ: Aihun lanmẹyiya tọn didà whẹwhẹ, amlọndidọ na ojlẹ he pé, gọna núdùdù hunsindagbe tọn lẹ nọ hẹn ale susu wá na agbasa mítọn.

   Tẹ́n ehe pọ́n: Nọ zinzọnlin po awuyiya po vudevude, etlẹ yin na nukunwhiwhe 15 poun, nado dlẹn afọ-kàn lẹ.

• ● Nọ flindọ numọtolanmẹ mẹtọn po ninọmẹ gbẹ̀mẹ tọn lẹ po nọ wá diọ.

   Nuhe Biblu dọ: “Mì ma yọ́n nuhe ogbẹ̀ mìtọn na yin to osọ.”—Jakọbu 4:14.

   Zẹẹmẹ: Nuhahun he hẹnmẹ jẹflumẹ de—bo tlẹ di nue húagbọ́mẹ pete—sọgan nọma dẹn-to-aimẹ.

   Mahopọnna depope he ninọmẹ towe sọgan di nuhe ylan sọ to egbehe, nulẹ gán gbẹ́ diọ to osọ. Enẹwutu, wà nuhe e biọ lẹpo nado doakọnnanu. (2 Kọlintinu lẹ 4:8) E yọnbasi taun dọ ninọmẹ he do lẹnpọn na we lọ ni wá mọ pọngbọ to gbèdopo, amọ́ eyin a hù dewe, enẹ ma do pọngbọ.

   Tẹ́n ehe pọ́n: Hia otàn mẹdelẹ tọn to Biblu mẹ, he jẹflumẹ sọmọ bo biọ okú na yede, podọ doayi lehe gbẹzan yetọn wá diọ to nukọn mẹ do go, yèdọ to aliho he mẹ yelọsu ma tlẹ na ko lẹn pọ́n te. Pọ́n apajlẹ delẹ to yé mẹ tọn.

 Mọwẹ. Biblu dọhona mí gando mẹdelẹ go he ko dọ pọ́n dọ, “N’jlo na kú.” Jiwheyẹwhe ma gblewhẹdo yé, kakatimọ e gọalọna yé wẹ. E sọgan wà nudopolọ na hiẹ lọsu.

Elija

•  ● Mẹnu wẹ ewọ? Elija yin yẹwhegán adọgbotọ de. Etomọṣo, ninọmẹ delẹ wá hẹn ewọ lọsu jẹflumẹ. Jakọbu 5:17 dọmọ: “Gbẹtọ he tindo numọtolanmẹ taidi mítọn lẹ nkọ wẹ Elija.”

•  ● Naegbọn e do jlo na kú? To ojlẹ de mẹ, Elija mọ ede to ṣokẹdẹ, obu sọ di i bọ e mọdọ emi yin nuvọ́nọ. Enẹwutu e vẹ̀ Jiwheyẹwhe dọmọ: “Jehovah E, gbọ bo yí ogbẹ̀ ṣie.”—1 Ahọlu lẹ 19:4.

•  ● Etẹwẹ gọalọna ẹn? Elija dọ nue to ahun etọn mẹ taun na Jiwheyẹwhe. Nawẹ Jiwheyẹwhe na ẹn tuli gbọn? Jiwheyẹwhe vẹawu i bo do lee ewọ dohuhlọn sọ hia Elija gbọn numimọ de gblamẹ. E sọ hẹn Elija deji dọ emi gbẹ́ do hudo etọn bo na yẹwhegán lọ devizọnwatọ mẹtọnhopọntọ he pegan de.

•  ▸ Hianu gando Elija go: 1 Ahọlu lẹ 19:2-18.

Jobu

•  ● Mẹnu wẹ ewọ? Jobu yin dawe adọkunnọ he do whẹndo daho de, bosọ nọ sẹ̀n Jiwheyẹwhe nugbo lọ po ahundopo po.

•  ● Naegbọn e do jlo na kú? Ogbẹ̀ wá dózin do Jobu to ajiji mẹ. Nujijọ ylankan susu wẹ jọ do e go. Ovi etọn lẹpo kú to nugbajẹmẹji de whenu. Ewọ lọsu bẹ azọ̀n de he hẹn awufiẹsa sinsinyẹn wá na ẹn. To godo mẹ, yè yinuwa hẹ ẹ po kanyinylan po bosọ sawhẹ lalo dokọna ẹn dọ ewọ lọsu wẹ hẹn nuhahun lẹ wá ede ji. Jobu dọmọ: “Ogbẹ̀ ṣie hiọawu na mi; n’masọ jlo na nọgbẹ̀ ba.”—Jobu 7:16.

•  ● Etẹwẹ gọalọna ẹn? Jobu hodẹ̀ hlan Jiwheyẹwhe bosọ dọho hẹ mẹdevo lẹ. (Jobu 10:1-3) E mọ tuli yí sọn họntọn mẹtọnhopọntọ de he nọ yin Elihu dè, e gọalọna ẹn nado lẹnnupọndo ninọmẹ etọn ji to aliho he sọgbe mẹ. Hú popolẹpo, Jobu kẹalọyi ayinamẹ po alọgọ he wá sọn Jiwheyẹwhe dè lẹ po.

•  ▸ Hianu gando Jobu go: Jobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● Mẹnu wẹ ewọ? Mose yin nukọntọ akọta Islaeli tọn podọ yẹwhegán nugbonọ de.

•  ● Naegbọn e do jlo na kú? Nuhe go Mose dona penukundo lẹ ma daihun paali, bọ mẹlẹ ka sọ nọ to homọdọdego, podọ e wá jẹflumẹ pete. To whenẹnu, e dawhá hlan Jiwheyẹwhe dọmọ: “Jaale kúkú gbọ bo hù mi hadopo.”—Sọha lẹ 11:11, 15.

•  ● Etẹwẹ gọalọna ẹn? Mose dọ nue to ahun etọn mẹ taun na Jiwheyẹwhe. Podọ Jiwheyẹwhe yinuwa bo hẹn azọ́ndenamẹ lọ bọawuna ẹn, ehe zọ́n bọ ayimajai etọn depò.

•  ▸ Hianu gando Mose go: Sọha lẹ 11:4-6, 10-17.