Gbekanlin ota-ṣinawenọ he go Osọhia 13:1 donù lọ nọtena pipli tonudidọ tọn aihọn tọn lẹpo to pọmẹ.

•   E tindo aṣẹpipa, huhlọn, podọ ofìn de. Ehe dohia dọ huhlọn tonudidọ tọn de wẹ e yin.—Osọhia 13:2.

•   E dugán do “hẹnnu lẹ, gbẹtọ lẹ, ogbè lẹ po akọta lẹpo po” ji. Enẹwutu, gandudu etọn ma nọte do otò dopo poun ji.—Osọhia 13:7.

•   Ewọ kẹdẹ na ede tindo adà voovo he gbekanlin ẹnẹ he yin hodọdeji to dọdai he to Daniẹli 7:2-8 mẹ lẹ tindo lẹ, enẹ wẹ awusọhia opọ̀ de tọn, afọ beali de tọn, onù kinnikinni de tọn po azò ao po. Gbekanlin he go dọdai Daniẹli tọn donù lọ lẹ yin zẹẹmẹ-basina taidi ahọlu tangan delẹ kavi gandudu aihọn tọn delẹ he na paṣẹ do ahọluigba lẹ ji debọdo-dego. (Daniẹli 7:17, 23) Enẹwutu, gbekanlin Osọhia weta 13 tọn lọ nọtena bẹplidopọ pipli tonudidọ tọn lẹ tọn de.

•   E tọ́n “sọn ohù mẹ,” yèdọ sọn pipli gbẹtọvi he nọ to zingidi ji lẹ tọn mẹ, ehe nọ na huhlọn gandudu gbẹtọvi tọn lẹ.—Osọhia 13:1; Isaia 17:12, 13.

•   Biblu dọ dọ sọha kavi oyín gbekanlin lọ tọn—enẹ wẹ 666— yin “sọha gbẹtọ tọn.” (Osọhia 13:17, 18) Hodidọ enẹ dohia dọ gbekanlin he yin nùdego to Osọhia weta 13 mẹ lọ yin nuzedai gbẹtọvi tọn, e ma yin nuzedai mayinukundomọ kavi aovi tọn de gba.

 Dile etlẹ yindọ onú ṣinṣinyan delẹ ji wẹ akọta lẹ nọ saba kọngbedopọ do, ogbè yetọn topọ na nuhe dù gbemima yetọn nado hẹn aṣẹpipa yetọn go kakati nado litaina gandudu Ahọluduta Jiwheyẹwhe tọn. (Psalm 2:2) Yé nasọ kọ̀n huhlọn yetọn dopọ nado funawhàn sọta awhànpa Jiwheyẹwhe tọn he Jesu Klisti na deanana to awhàn Amagẹdọni tọn whenu lẹ, ṣigba awhàn ehe na dekọtọn do vasudo mẹ na yé.—Osọhia 16:14, 16; 19:19, 20.

“Azò ao podọ ota ṣinawe”

 To Biblu mẹ, sọha delẹ nọ yin yiyizan to yẹhiadonu-liho. Di apajlẹ, ao po ṣinawe po nọtena blebu-yinyin. Nuhe gọalọ nado yọ́n zẹẹmẹ tangan “azò ao podọ ota ṣinawe” gbekanlin he go Osọhia weta 13 donù lọ tọn wẹ “boṣiọ gbekanlin lọ tọn” he wá yin nùdego to nukọn mẹ to owe Osọhia tọn mẹ, enẹ wẹ gbekanlin vẹẹ ṣẹ́ṣẹ́ de he tindo ota ṣinawe po azò ao po. (Osọhia 13:1, 14, 15; 17:3) Biblu dọ dọ ota ṣinawe gbekanlin vẹẹ ṣẹ́ṣẹ́ ehe tọn lẹ nọtena “ahọlu [kavi gandudu] ṣinawe.”—Osọhia 17:9, 10.

 Mọdopolọ, ota ṣinawe gbekanlin he go Osọhia 13:1 donù lọ tọn lẹ nọtena gandudu ṣinawe. To whenuho gblamẹ, gandudu aihọn tọn enẹlẹ—yèdọ Egipti, Asilia, Babilọni, Medo-Pẹlsia, Grèce, Lomu, gọna Anglo-Amérique—wẹ tindo huhlọn hugan bo yin tọ́ntlọ́ngbọ́n to yasanamẹ hinhẹnwa omẹ Jiwheyẹwhe tọn lẹ ji mẹ. Eyin mí wá tadona lọ kọ̀n dọ azò ao lọ lẹ nọtena gandudu he to yedekannu lẹpo, vlavo pẹvi kavi daho, jẹgbakun he yin ṣinṣinyọn na azò dopodopo dohia dọ dopodopo gandudu enẹlẹ tọn wẹ nọ yí aṣẹpipa yetọn zan to ojlẹ dopolọ mẹ hẹ gandudu aihọn tọn he tindo huhlọn hugan to azán yetọn gbè.