Biblu dohia dọ Jiwheyẹwhe jlo dọ gbẹtọ lẹ ni nọ “nọla na fẹnnuwiwa zanhẹmẹ tọn.” (1 Tẹsalonikanu lẹ 4:3) To Biblu mẹ, hogbe lọ “fẹnnuwiwa zanhẹmẹ tọn” nọ bẹ ayọdide, zanhẹmẹ to mẹhe tindo vijinu dopolọ lẹ ṣẹnṣẹn gọna zanhẹmẹ to sunnu po yọnnu po he ma wlealọ hẹ yede lẹ ṣẹnṣẹn hẹn.

•  To nukun Jiwheyẹwhe tọn mẹ, be sunnu po yọnnu po de dona wlealọ wẹ ya kavi lala?

•  Be sunnu de po yọnnu de po gán jẹ pọnọ ji jẹnukọnna alọwle nado pọ́n eyin yé sọgbe hẹ yede ya?

•  Nawẹ sunnu po yọnnu po de gán wleawuna alọwle he lodo de gbọn?

•   Jiwheyẹwhe wẹ ze tito alọwle tọn dai. E wàmọ to whenue e kọ̀n sunnu po yọnnu po tintan lọ dopọ. (Jenẹsisi 2:22-24) E ma yin linlẹn etọn dọ sunnu de po yọnnu de po ni jẹ pọnọ ji matin opà alọwle tọn dido na ode awetọ.

•   Jiwheyẹwhe yọ́n nuhe na wà dagbe na gbẹtọvi lẹ hugan. E ze tito alọwle tọn dai nado yin pọninọ tẹgbẹ tọn to sunnu de po yọnnu de po ṣẹnṣẹn he na hẹn ale wá na hagbẹ whẹndo lọ tọn lẹpo bo basi hihọ́na yé. Pọ́n apajlẹ kleun ehe. Kẹdẹdile anademẹ he wá sọn azọ́nwhé he basi núzinzan họmẹ tọn de dè lẹ nọ do lehe yè sọgan ján nulọ ganji do hia, mọ wẹ anademẹ Jiwheyẹwhe tọn lẹ nọ do lehe mí sọgan wleawuna haṣinṣan dagbe to whẹndo mẹ do hia. Nujinọtedo Jiwheyẹwhe tọn lẹ nọ wà dagbe na mẹhe nọ setonuna yé lẹ janwẹ.—Isaia 48:17, 18.

•   Kọndopọ zanhẹmẹ tọn hẹ mẹhe ma yin alọwlemẹ mẹtọn gán hẹn kọdetọn ylankan lẹ wá. Di apajlẹ, e gán dekọtọn do ohò he yè ma jlo, azọ̀n he yè nọ bẹ gbọn zanhẹmẹ gblamẹ lẹ po flumẹjijẹ po mẹ. a

•   Jiwheyẹwhe na sunnu po yọnnu po nugopipe lọ nado jivi gbọn zanhẹmẹ gblamẹ. Jiwheyẹwhe nọ pọ́n ogbẹ̀ hlan di onú wiwe, podọ nugopipe lọ nado jivi yin nunina họakuẹ de. Ewọ jlo dọ mí ni nọ yí nukun nujọnu tọn do pọ́n nunina enẹ gbọn gbégbigbò na tito alọwle tọn he e zedai dali.—Heblu lẹ 13:4.

 Aṣli lọ nado tindo kọdetọn dagbe to alọwle mẹ ma yin nado nọpọ́ na ojlẹ de nado pọ́n eyin yè sọgbe hẹ ode awetọ mẹtọn kavi eyin yè na jo ode awetọ do gba. Kakatimọ, haṣinṣan lẹ nọ lodo dogọ to whenue omẹ awe lẹpo magbe sinsinyẹn nado tẹdo ode awetọ go bo nọ wazọ́n to pọmẹ nado nọ didẹ nuhahun lẹ. b Alọwiwle nọ yidogọna gbemima enẹ.—Matiu 19:6.

 Nuhahun ma dẹ́n to alọwle de mẹ. Amọ́, asu po asi po lẹ gán hẹn alọwle yetọn lodo eyin yé nọ setonuna ayinamẹ Biblu tọn lẹ. Delẹ to ayinamẹ lọ lẹ mẹ die:

•   Nọ ze ayiha do hudo awetọ towe tọn lẹ ji jẹnukọn.—1 Kọlintinu lẹ 7:3-5; Filipinu lẹ 2:3, 4.

•   Nọ yiwanna awetọ towe bo nọ na ẹn sisi.—Efesunu lẹ 5:25, 33.

•   Nọ yọ́n hodọ na awetọ towe.—Howhinwhẹn lẹ 12:18.

•   Nọ fahomẹ hẹ awetọ towe bo nọ yawu jona ẹn.—Kolosinu lẹ 3:13, 14.