Biblu ma dọ tlọlọ dọ “ylando ṣinawe he nọ hẹn okú wá” delẹ tin. Amọ́, e plọnmẹ dọ ylando sinsinyẹn lẹ wiwà gán glọnalinamẹ nado mọ whlẹngán. Di apajlẹ, Biblu dlẹnalọdo ylando sinsinyẹn delẹ taidi fẹnnuwiwa zanhẹmẹ tọn, boṣiọ-sinsẹ̀n, afinyọnnuwiwa, adánjijẹ whẹwhẹ po ahànnu-zẹjlẹgo po taidi “azọ́n agbasalan tọn lẹ.” E sọ dọ dọ: “Mẹhe nọ wà onú mọnkọtọn lẹ ma na dugu Ahọluduta Jiwheyẹwhe tọn.”​—Galatianu lẹ 5:19-21. a

Be Biblu ma slẹ onú ‘ṣinawe delẹ he yin osùnú na Oklunọ ya’?

 Mọwẹ. Sọgbe hẹ Biblu Wiwe lọ​—Gun Alada, Howhinwhẹn lẹ 6:16 dọ dọ: “Onú ṣidopo wẹ Oklunọ gbẹwanna, nugbo, ṣinawe wẹ yín osùnú de na ayiha etọn.” Amọ́, todohukanji ylando he yin sislẹ bọdego to Howhinwhẹn lẹ 6:17-19 mẹ lẹ tọn ma to didohia dọ ylando he tin lẹpo ján niyẹn. Kakatimọ, e to didohia dọ walọ ylankan he ji ylando wunmẹ lẹpo nọ saba sinai do niyẹn, ehe bẹ dehe nọ sọawuhia to linlẹn, ohó po walọ po mẹ lẹ hẹn. b

Etẹwẹ hogbe lọ “ylando he nọ hẹn okú wá” zẹẹmẹdo?

 Biblu dohia hezeheze dọ ylando lẹpo wẹ nọ hẹn okú wá. Ṣigba, mí gán yin whinwhlẹngán sọn ylando po okú po si gbọn avọ́sinsan ofligọ Jesu Klisti tọn gblamẹ. (Lomunu lẹ 5:12; 6:23) Enẹwutu, “ylando he nọ hẹn okú wá” yin ylando de he avọ́sinsan Klisti tọn ma gán basi ovẹsè na. (1 Johanu 5:16) Mẹhe nọ doalọ to ylando wunmẹ ehe mẹ wẹ mẹde he magbe nado hodo aliho ylanwiwa tọn de sọmọ bo ma sọgan diọ pọndohlan kavi walọyizan etọn ba. Biblu sọ dlẹnalọdo ylando mọnkọ taidi ylando de he “ma na yin jijonamẹ.”​—Matiu 12:31; Luku 12:10.