To paa mẹ, hodidọ lọ “Samalianu Dagbe” nọ yin yiyizan nado dlẹnalọdo mẹde he gọalọna mẹhe to hudo mẹ lẹ. Otàn he Jesu pìn kavi oló he e do gando kọmẹnu dagbe de go mẹ wẹ hogbe lọ lẹ wá sọn, lẹblanu nọ whàn kọmẹnu dagbe de nado gọalọna mẹdevo lẹ mahopọnna otò kavi aṣa he mẹ mẹlọ lẹ wá sọn. a

To hosọ ehe mẹ

•  Etẹwẹ oló “Samalianu Dagbe” lọ tọn zẹẹmẹdo?

•  Naegbọn Jesu do dó oló ehe?

•  Etẹwẹ oló lọ plọnmẹ?

•  Mẹnu wẹ Samalianu lẹ?

•  Be otàn “Samalianu Dagbe” lọ tọn jọ nugbonugbo ya?

Bladopọ kleun otàn he Jesu pìn lọ tọn die: Ju de tọ́nwhẹ̀n sọn Jelusalẹm jei Jẹliko. Yè jẹajo do e to ali lọ ji bo hò e, bosọ jo e do kúdaa-gbẹ̀daa.

Yẹwhenọ de he yin Ju po nukọntọ sinsẹ̀n Ju tọn de po mọ dawe he to gbejizọnlinzin bọ yè gbleawuna lọ bo gbọn fidevo. Mahopọnna dọ otò dopolọ mẹ wẹ yé omẹ awe lẹ po dawe lọ po wá sọn, de to yé mẹ ma nọte bo gọalọna dawe lọ.

To godo mẹ, dawe he wá sọn otò devo mẹ de gbọn ali lọ ji wá jei. Samalianu de wẹ dawe lọ. (Luku 10:33; 17:16-18) Lẹblanu whàn Samalianu lọ bọ e penukundo dawe he gbleawu lọ go. Enẹgodo, e ze dawe he gbleawu lọ yì hotẹli pẹvi de. To finẹ, e penukundo dawe lọ go jẹ wunkẹngbe. To aihọngbè, e suahọ mẹhe nọ penukundo hotẹli pẹvi lọ go nado penukundo dawe lọ go, podọ e dopà nado sú akuẹ depope he e na wá biọ.—Luku 10:30-35.

Jesu pìntàn ehe na dawe de he nọ lẹndọ mẹhe wá sọn akọ̀ po sinsẹ̀n etọn mẹ lẹ po kẹdẹ wẹ yin kọmẹnu etọn. Jesu jlo na plọn onú titengbe de dawe lọ—e dona yọnẹn dọ “kọmẹnu” etọn ma nọte do Juvi hatọ etọn lẹ kẹdẹ ji. (Luku 10:36, 37) Otàn ehe yin kinkan do Biblu mẹ nado plọnnu mẹdepope he jlo na hẹn homẹ Jiwheyẹwhe tọn hùn.—2 Timoti 3:16, 17.

Otàn lọ plọnmẹ dọ kọmẹnu dagbe de nọ vẹawu mẹdevo lẹ, podọ nuyiwa etọn nọ do ehe hia. E nọ gọalọna mẹhe to yaji lẹ mahopọnna aṣa, akọ̀, kavi otò he mẹ mẹlọ lẹ wá sọn. Kọmẹnu dagbe de nọ yinuwa hẹ mẹdevo lẹ to aliho he mẹ e nọ jlo dọ yè ni yinuwa hẹ emi te.—Matiu 7:12.

Samalianu lẹ nọ nọ̀ agewaji Jude tọn. Ju he dà mẹhe ma yin Ju lẹ wẹ dokún yetọn.

To owhe kanweko tintan W.M. tọn, Samalianu lẹ ko do sinsẹ̀n yetọn titi ai. Yé nọ kẹalọyi owe atọ́n tintan he to Owe-wiwe Heblu tọn mẹ lẹ bo ma nọ kẹalọyi dehe pò lẹ.

To azán Jesu tọn gbè, Juvi susu wẹ gbẹwanna Samalianu lẹ bo ma nọ jlo na wà nude dopọ hẹ yé. (Johanu 4:9) Juvi delẹ nọ yí hogbe lọ “Samalianu” zan taidi zungbe de.—Johanu 8:48.

Owe-wiwe lẹ ma dohia eyin oló Samalianu lọ tọn jọ nugbo. Amọ́, Jesu nọ saba yí aṣa po lẹdo he hosetọ etọn lẹ jẹakọ hẹ ganji lẹ po zan to mẹpinplọn etọn mẹ, na nido bọawuna yé nado mọnukunnujẹ nuagokun lọ mẹ.

Nudọnamẹ he otàn lọ bẹhẹn lẹ sọgbe hẹ whenuho. Di apajlẹ:

• Ali he tọ́n sọn Jelusalẹm yì Jẹliko dite hugan kilomẹtlu 20 bosọ tindo pópló he dite na kilomẹtlu dopo. Otàn lọ dohia dọ mẹhe to gbejizọnlinzin jei Jẹliko lẹ nọ “jẹte sọn Jelusalẹm.”—Luku 10:30.

• Yẹwhenọ po Levinu he nọ nọ̀ Jẹliko lẹ po nọ gbọn ali enẹ ji whẹwhẹ yì Jelusalẹm.

• Jaguda lẹ nọ saba tọ̀pọwu do ali he ji mẹsusu ma nọ yawu gbọn enẹ ji, bo nọ tọ́n pé gbejizọnlinzintọ lẹ, titengbe mẹhe wá jei edeṣo.