Owe alọdlẹndonu tọn de dọ dọ: “Anọ́sin he yè wleawuna de ma gán yin yiyijlẹdo anọ́sin jọnun onọ̀ de tọn go pọ́n gbede.” Dopo to nuhe zọ́n bọ anọ́sin onọ̀ de tọn do yin nujọnu taun na viyẹyẹ etọn wẹ yindọ agbasa onọ̀ lọ tọn nọ diọ anọ́sin lọ sọgbe hẹ nuhudo viyẹyẹ lọ tọn lẹ.

 Lẹnnupọndo ehe ji: Anọ́sin onọ̀ de tọn nọ diọ to ojlẹ he gblamẹ ovi de nọ nọ́ anọ́ onọ̀ etọn tọn te de mẹ. To bẹjẹeji ojlẹ lọ tọn, anọ́sin lọ nọ bẹ protéine, vitamine, minéraux, po osin po hẹn, podọ to godo mẹ anọ́sin lọ nọ bẹ núdojó lẹ hẹn, ehe nọ zọ́n bọ ohò nọ gọ́ viyẹyẹ lọ. Anọ́sin onọ̀ lọ tọn tlẹ sọ nọ diọ sọgbe hẹ owhe viyẹyẹ lọ tọn po ninọmẹ aimẹ tọn lẹ po.

 To anọ́sin onọ̀ de tọn mẹ, osin agbasa mẹ tọn delẹ, yèdọ hormones taidi mélatonine nọ yiaga to zánmẹ podọ to whedelẹnu, devo lẹ nọ yiaga to okle. To ojlẹ voovo azán dopodopo tọn gblamẹ, didiọ osin agbasa mẹ tọn ehelẹ tọn nọ yinuwa do amlọn kavi nukleninọ viyẹyẹ lọ tọn ji, ehe nọ gọalọna viyẹyẹ lọ nado wleawuna aṣa lọ nado nọ damlọn bosọ fọ́n to ojlẹ tangan de mẹ.

 Azán kleun de whenue onọ̀ de jivi etọn godo, anọ́ onọ̀ lọ tọn nọ de anọ́sin sinmẹ koklojonọ de tọ́n he yè nọ ylọdọ colostrum. Colostrum lọ nọ sà gbọn adọ̀mẹ na viyẹyẹ lọ po awubibọ po bosọ nọ wà dagbe na agbasa etọn taun, sọmọ bọ eyin pẹvi de tlẹ biọ adọ̀go pẹvi viyẹyẹ de tọn mẹ, e nọ wà dagbe na ẹn to aliho vonọtaun delẹ mẹ. Colostrum lọ nọ na huhlọn agbasa lọ bo nọ basi hihọ́na viyẹyẹ lọ sọta nuvikun ylankan lẹ. Humọ, e nọ gọalọna viyẹyẹ lọ nado doafọai ganji bosọ nọ klọ awutugonu he nọ lì núdùdù viyẹyẹ lọ tọn lẹ.

 E ma biọ dọ onọ̀ lẹ ni hànu eyin anọ́sin na pé ovi yetọn lẹ eyin yé tlẹ ji ahoho, na to paa mẹ anọ́sin lọ nọ jideji sọgbe hẹ nuhudo ovi lọ lẹ tọn.

 Etẹ a lẹn? Be anọ́sin onọ̀ de tọn po nugopipe etọn lẹpo po wá aimẹ na ede wẹ ya? Kavi e yin didá?