Be alọwlemẹ towe ko hànu gando aṣa ahàn nùnù tọn towe go pọ́n wẹ ya? Eyin mọ wẹ, nudelẹ tin he ji a dona lẹnnupọndo.

To hosọ ehe mẹ

•  Ahàn sinsinyẹn ṣiṣizan po alọwle po—nudelẹ he ma nọ jẹpọ

•  Be a ko lẹzun afanumẹ na ahàn sinsinyẹn nùnù wẹ ya?

•  Payi whẹjijọ dindin go

•  Nuhe a gán wà

 Ahàn sinsinyẹn ṣiṣizan gán hẹn nuhahun agbasamalo tọn delẹ wá taidi ahunzọ̀n, otù-zọ̀n sinsinyẹn po kansẹẹ po. Amọ́, ahàn sinsinyẹn ṣiṣizan ma nọ hẹn nuhahun agbasamalo tọn kẹdẹ wá; e sọ nọ fọ́n nuhahun delẹ dote to alọwle mẹ taidi danuwiwa to whẹndo mẹ, nuhahun akuẹ tọn lẹ, nugbonọ-mayin po gbẹdai po.

 Biblu dọ dọ eyin yè ṣì ahàn sinsinyẹn zan, “e nọ hẹ̀nadumẹ di odàn, bosọ nọ tún adí di amàpoe.” (Howhinwhẹn lẹ 23:32) Nawẹ a na yọnẹn gbọn eyin a ko lẹzun afanumẹ na ahàn sinsinyẹn nùnù?

 Kanbiọ he bọdego lẹ gán gọalọna we nado doayi ohia lọ lẹ go:

•   Be e nọ vẹawuna we nado nọ yọ́n obá he mẹ a dona nùahàn sinsinyẹn jẹ wẹ ya?

•   Be a nọ saba to nulẹnpọndo ojlẹ devo he mẹ a nasọ nùahàn te ji wẹ ya?

•   Be a nọ nùahàn mahopọnna nuhahun he e to hinhẹnwa gbẹzan towe, etlẹ yin alọwle towe mẹ wẹ ya?

•   Be e nọ taidi dọ azọ̀n jẹ wẹ a te eyin a tẹnpọn nado doalọte wẹ ya?

•   Be ahàn sinsinyẹn ṣiṣizan zọ́n bọ hiẹ po alọwlemẹ towe po nọ dọjlẹ wẹ ya?

•   Be a nọ nùahàn sinsinyẹn todin hugan dai wẹ ya?

•   Be a nọ nùahàn to nuglọ kavi nọ whlá ahàn sinsinyẹn do whégbè kavi do azọ́nmẹ wẹ ya?

 Eyin gblọndo towe yin mọwẹ na dopo kavi susu to kanbiọ enẹlẹ mẹ, be a gán ko lẹzun afanumẹ na ahàn sinsinyẹn nùnù. A gán ko tindo nuhahun ahànnunu zẹjlẹgo tọn.

 Be alọwlemẹ towe nọ hanú gando ahàn sinsinyẹn nùnù towe go wẹ ya? Eyin mọ wẹ, a gán ko tẹnpọn nado yí nukunpẹvi do pọ́n whẹho lọ kavi dín whẹjijọ gandego. A gán ko dowhẹ mẹdevo lẹ, etlẹ yin alọwlemẹ towe, gbọn nuhe bọdego ehelẹ didọ dali:

•   “Eyin a ko nọ jọmẹ hẹ mi wẹ, ma na ko nọ nùahàn sọmọ.”

•   “Eyin ogán ṣie nkọ wẹ a ko do dai wẹ, hiẹ lọsu na ko nọ nùahàn.”

•   “Mẹsusu lẹ wẹ n’yọnẹn he nọ nùahàn hugan mi.”

 Eyin a ko yí hogbe mọnkọ lẹ zan, be ojlo ahànnunu tọn towe ma to nukọn jẹna ojlo towe nado do ayajẹ to alọwle mẹ wá? Detẹ wẹ dona yin nujọnu hugan?

 Nunọwhinnusẹ́n Biblu tọn: “Sunnu he wlealọ nọ jẹtukla na . . . lehe ewọ sọgan tindo alọkẹyi asi etọn tọn do.”—1 Kọlintinu lẹ 7:33.

•   Nọ ylọ ahunmẹdunamẹnu alọwlemẹ towe tọn lẹ dọ nujọnu. Eyin alọwlemẹ towe wẹ tlẹ to nuhà gando whẹho lọ go zẹjlẹgo, naegbọn a ma na basi vọjlado? Eyin a ma gán wàmọ—eyin a gbẹ́ zindonukọn nado nọ nùahàn mahopọnna magbọjẹ he e nọ do na alọwlemẹ towe—enẹlọ kẹdẹ na ede gán dohia dọ a do nuhahun ahànnu zẹjlẹgo tọn.

   Nunọwhinnusẹ́n Biblu tọn: “Mì gbọ mẹdopodopo ni nọ dín, e ma yin ale edetiti tọn gba, ṣigba dehe yin mẹdevo tọn.”—1 Kọlintinu lẹ 10:24.

•   Nọ dín nudọnamẹ lẹ. Nado gbawhàn, awhànfuntọ de dona yọ́n wlẹnwin kẹntọ etọn tọn lẹ. Nuhahun mọnkọ wẹ a pannukọn, nado duto kẹntọ towe ji, a dona yọ́n nuhe ahànnu zẹjlẹgo yin ganji gọna nuhewutu e nọ yin omọ̀ de na mẹsusu. A sọ dona plọn aliho yọ́n-na-yizan delẹ nado yí dewe sọn afanumẹ-yinyin na ahàn sinsinyẹn mẹ, podọ ehe na gọalọna we ma nado vọ́ jai jẹ omọ̀ dopolọ mẹ.

   Nunọwhinnusẹ́n Biblu tọn: Mì “nọ nọla na ojlo agbasalan tọn lẹ he nọ to avùnho sọta mì.”—1 Pita 2:11.

•   Nọ dín alọgọ. Awuwledainanu agbasalilo tọn delẹ tin he nọ penukundo nuhahun ahàn sinsinyẹn nùnù tọn lẹ go, ehe bẹ tito nado gọ̀ jẹgangan tọn lẹ, nọtẹn he nọ penukundo ahànnumunọ lẹ go, gọna dotowhé lẹ hẹn. A gán sọ dọnsẹpọ họntọn he whèwhín de he na gọalọna we nado doayi onú titengbe he nọ hẹnmẹ zun afanumẹ na ahàn sinsinyẹn lẹ go. Enẹgodo, nọ basi oylọna mẹlọ whenue a mọdọ emi jlo na gọ̀ jẹ ahànnu ji.

   Nunọwhinnusẹ́n Biblu tọn: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

 Whẹho he gẹdẹ taun de wẹ ahàn sinsinyẹn ṣiṣizan yin, ehe yè ma gán didẹ gbọn hosọ kleun de hihia dali, kavi duto e ji gbọn didọ dali poun dọ, “n’na tẹnpọn nado de ahànnunu pò.” Amọ́, a dona yọnẹn dọ lehe a to nukunpedo whẹho ehe go do ma na bẹpla agbasalilo towe kẹdẹ gba, e nasọ yinuwado alọwle towe ji ga.

 Na nudọnamẹ dogọ: Hia hosọ he bọdego lẹ nado pọ́n lehe mẹdevo lẹ ko duto ahànnunu zẹjlẹgo ji do.

 “N’masọ Nọ Ylanhùn Ba”

 “Winyan Dee Tọn Masọ Nọ Hù Mi Ba”

 “Alipá Wá Lẹzun Owhé Ṣie”

 Humọ, sọ pọ́n video lọ ‘Gbẹzan Ṣie Wá Ṣì Mi Pete’