Dodinnanu de dohia dọ, 97 to kanweko ji jọja aflanmẹ lẹ tọn wẹ yigbe dọ yé nọ zan nọtẹn gbẹdido Intẹnẹt ji tọn lẹ. Be e nọ jlo ovi towe lọsu wẹ ya? Eyin mọ wẹ, onú kleun delẹ die he ji a dona lẹnnupọndo.

To hosọ ehe mẹ, mí na dọhodo nuhe bọdego lẹ ji:

•  Lehe ovi towe na zan whenu etọn do

•  Nuhe ovi towe nọ lẹn gando họntọnjiji go

•  Lehe e na yinuwado ovi towe ji to numọtolanmẹ-liho do

•  Nuhe ovi towe na wà to Intẹnẹt ji

•  Be dandan wẹ nado zan nọtẹn gbẹdido Intẹnẹt ji tọn lẹ ya?

•  Nuhe mẹjitọ delẹ dọ

 Nọtẹn Intẹnẹt tọn de dọ dọ, “nọtẹn gbẹdido Intẹnẹt ji tọn lẹ yin awuwlena nado fìn ayidonugo towe bọ a na nọ gbọ do Intẹnẹt ji whelẹponu, bo nasọ nọ to nukun yìn pọ́n alokan towe ji nado yọnẹn eyin nuyọyọ de tọ́n.”—HelpGuide.

 “Nukunwhiwhe kleun de nọ wá lẹzun gànhiho susu to whenue n’to onú planplan he yin zizedo nọtẹn gbẹdido Intẹnẹt ji tọn lẹ pọ́n. E gán vẹawu taun nado ze alokan dai bo wà nue yin nujọnu hugan lẹ.”—Lynne he do owhe 20.

 Kanse dewe dọ: Be ovi ṣie na hodo dogbó he n’zedai gando nọtẹn gbẹdido Intẹnẹt ji tọn lẹ zinzan go ya? Be ovi ṣie ko pé ede ji nado ze dogbó de dai na ede bosọ hodo e ya?

 Ayinamẹ Biblu tọn: ‘Mì nọ payi tlala dọ lehe mì to zọnlinzin do ni yin taidi nuyọnẹntọ lẹ, mì nọ yí whenu mìtọn zan to aliho dagbe hugan mẹ.’—Efesunu lẹ 5:15, 16.

 Hogbe lọ “nọtẹn gbẹdido Intẹnẹt ji tọn” dohia dọ mẹhe nọ yí i zan lẹ nọ jihọntọn kavi nọ dogbẹ́ hẹ mẹhe yé yọnẹn lẹ. Amọ́, họntọnjiji nukunta tọn wẹ e nọ saba yin.

 “N’doayi e go dọ jọja susu nọ do linlẹn agọ̀ lọ dọ eyin mẹsusu nọ nọgodona na yé to nọtẹn lọ ji bosọ nọ yiwanna nuhe yé nọ kàn kavi zedo e ji lẹ, be mẹsusu to yetọn hòpọn nugbonugbo niyẹn, dile etlẹ yindọ yé ma yọ́n omẹ ehelẹ na taun tọn.”—Patricia he do owhe 17.

 Kanse dewe dọ: Be ovi ṣie ko pé ede ji nado yọnẹn dọ e ma yin yindidi to Intẹnẹt ji wẹ yin nujọnu lọ ya? Be e gán jihọntọn dagbe lẹ nukun sọ nukun bọ e ma na yin to Intẹnẹt ji ya?

 Ayinamẹ Biblu tọn: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

 Dodinnanutọ lẹ dohia dọ mẹhe nọ zan nọtẹn gbẹdido Intẹnẹt ji tọn lẹ zẹjlẹgo nọ wá mọ yede to ṣokẹdẹ, nọ hanú bọ apọ̀ tlẹ gán nọ ṣì yé.

 “E nọ ṣí de namẹ eyin yè mọ fọto he do nue wà họntọn mẹtọn lẹ te hia to Intẹnẹt ji bọ yè ma ka demẹ.”—Serena he do owhe 19.

 Kanse dewe dọ: Be ovi ṣie ko pé ede ji jẹ obá lọ mẹ bo ma na lẹzun ṣejannabinọ, whlẹnagbà hẹ mẹdevo lẹ kavi dike nue wà yé te to nọtẹn gbẹdido Intẹnẹt ji tọn ji lẹ ni yinuwado e ji zẹjlẹgo ya?

 Ayinamẹ Biblu tọn: “Mì dike mí dín gigo ovọ́, to agbàwhinwhlẹn finfọndote to ode awetọ mítọn ṣẹnṣẹn, to nuvẹun tintindo na ode awetọ mẹ blo.”—Galatianu lẹ 5:26.

 Nọtẹn gbẹdido Intẹnẹt ji tọn lẹ gán na tulimẹ nado nọ joawuna nukunvandomẹ to Intẹnẹt ji, wekanhlanmẹ kavi fọto gblewa tọn lẹ didohlan mẹlẹ gọna video kavi fọto gblewa tọn lẹ pinpọn. Eyin ovi towe ma tlẹ jlo na zan jijọ ehelẹ, e yọnbayi dọ ni nọ mọ yé to nọtẹn lọ ji.

 “N’doayi e go dọ eyin nue nọ yin zizedo nọtẹn gbẹdido Intẹnẹt ji tọn lẹ ji tlẹ taidi nue ma ylan sọmọ, yé gán bẹ nue ma sọgbe lẹ hẹn fẹẹ. Hogbe po ohàn he ma sọgbe lẹ po sù to e ji taun.”—Linda he do owhe 23.

 Kanse dewe dọ: Be ovi ṣie ko pé ede ji nado zan Intẹnẹt po nuyọnẹn po ya? Be ovi ṣie gán duto ede ji bo gbẹ́ nuylankan he to nọtẹn lọ ji lẹ dai ya?

 Ayinamẹ Biblu tọn: “Mì gbọ fẹnnuwiwa zanhẹmẹ tọn po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo, . . . mọdopolọ, walọ he huwinyan kavi hodidọ nulú tọn kavi aslan gblewa tọn.”—Efesunu lẹ 5:3, 4.

 E ma yin dandan nado zan nọtẹn gbẹdido Intẹnẹt ji tọn lẹ whẹpo do nọgbẹ̀, kavi do pekọ po ayajẹ po. Jọja susu wẹ ma nọ jlo na zan nọtẹn gbẹdido Intẹnẹt ji tọn lẹ—delẹ to yé mẹ tlẹ ko zan nọtẹn ehelẹ pọ́n bo wá de nado jodo.

 “N’magbe nado jo nọtẹn gbẹdido Intẹnẹt ji tọn lẹ zinzan do whenue n’mọ lehe e yinuwado mẹdaho ṣie yọnnu ji to aliho agọ̀ mẹ do. Sọn whenẹnu gbọ́n, n’ko do ayajẹ dogọ bosọ to numimọ dagbe lẹ do to gbẹ̀mẹ.”—Nathan he do owhe 17.

 Nuagokun lọ die: Whẹpo a nido dike ovi towe ni jẹ nọtẹn gbẹdido Intẹnẹt ji tọn lẹ zan ji, hẹn ẹn diun dọ e ko pé ede ji jẹ obá lọ mẹ ma nado nọ gú whenu to nọtẹn lọ ji, nado nọ jihọntọn dagbe lẹ bosọ dapana nue ma sọgbe lẹ.

 Ayinamẹ Biblu tọn: “Zinzintọ nọ lẹnnupọndo afọdide dopodopo ji.”—Howhinwhẹn lẹ 14:15.