Jọja aflanmẹ delẹ nọ dovọ́na osẹ́n he yin didona yé gando ogàn he mẹ yé dona to whégbè te go. Mẹdevo lẹ nọ doyẹklọ mẹjitọ yetọn lẹ bo nọ dolalo na yé kavi tọ́n sọn whégbè gbọn nuglọ nado yì nọpọ́ hẹ họntọn lẹ. Etẹwẹ a gán wà eyin ovi towe masọ jẹ nado mọ jidedomẹgo towe ba?

•  Be ovi ṣie yin tasinyẹntọ wẹ ya?

•  Etẹ n’na wà eyin ovi ṣie doyẹklọ mi?

•  Etẹwẹ zọ́n e do wàmọ?

•  Etẹwẹ n’gán wà na ovi ṣie nido mọdọ n’gọjẹ jidedo emi go ji?

•  Nuhe mẹjitọ delẹ dọ

 E ma yinmọ dandan. Biblu dọmọ: “Nulú doadọ̀do to ahun jọja [de] tọn mẹ,” podọ nuyiwa jọja aflanmẹ lẹ tọn nọ saba do nugbo-yinyin whẹho enẹ tọn hia. (Howhinwhẹn lẹ 22:15, nudọnamẹ odò tọn) Weyọnẹntọ Laurence Steinberg wlan to owe de mẹ dọ “jọja aflanmẹ lẹ nọ wá basi nudide aplà podọ nulú tọn lẹ.” E yidogọ dọ, “yé na nọ wá ṣinuwa janwẹ.” a

 Ma wá tadona kọ̀n dọ ovi towe ko magbe nado nọ vẹtolina we blo. Dodinnanutọ lẹ dohia dọ jọja aflanmẹ lẹ nọ saba hò nuhe mẹjitọ yetọn lẹ nọ lẹn gando yé go lẹ pọ́n, eyin nuyiwa yetọn lẹ ma tlẹ nọ do enẹ hia. Dile etlẹ yindọ ovi towe sọgan nọma do enẹ hia, e yọnbasi dọ ewọ ni jẹflumẹ, bo sọgan nọ to nuhà dọ emi ko hẹn we jẹflumẹ.

•    Be ninọmẹ he lẹdo e lẹ wẹ zọ́n ya? Biblu dọmọ: “Gbẹdido ylankan lẹ nọ hẹn walọ dagbe lẹ gble.” (1 Kọlintinu lẹ 15:33) Na nugbo tọn, họntọn lẹ nọ yinuwa do jọja lẹ ji taun. Nudevo lẹ taidi, gbẹdido Intẹnẹt ji tọn po ajọjijla po sọ nọ yinuwado yé ji ga. Gbọnvona onú ehelẹ, jọja aflanmẹ lẹ ma tindo numimọ to gbẹ̀mẹ, enẹwutu yé na nọ basi nudide nulú tọn lẹ. Na nugbo tọn, yé dona plọn nado nọ kẹalọyi kọdetọn nudide yetọn lẹ tọn, eyin yé na whẹ́n bo wá lẹzun mẹho he whèwhín lẹ.

•    Be yẹn go wẹ e sọn ya? A gán nọ kanse dewe eyin hùnyinylan emitọn wẹ sisẹ́ ovi lọ nado ṣinuwa. Kavi to whedelẹnu, a gán nọ kanse dewe eyin hiẹ wẹ joalọdokọji na ovi lọ hugan bo gbọnmọ dali na ẹn mẹdekannujẹ zẹjlẹgo. Kakati a nido ze ayiha do adà he a gán ko yiwà bọ nuhahun lọ do wá ji, lẹnnupọndo adà he a gán yiwà nado didẹ ninọmẹ lọ ji.

•   Nọ duto dewe ji. E yọnbasi dọ ovi towe ni donukun dọ a na gblehomẹ. A gán yinuwa to aliho devo mẹ. Yí homẹfa do dọho hẹ ovi towe do nuhe hẹn nuhahun lọ wá ji. Be tlintlindo dindin wẹ zọ́n ya? Apọṣimẹ wẹ ya? Ṣokẹdẹninọ wẹ ya? Kavi be họntọn etọn lẹ wẹ hẹn ẹn jẹflumẹ ya? Depope to ninọmẹ ehelẹ mẹ ma suwhẹna nuṣiwa, amọ́ e gán gọalọna hiẹ—po ovi towe po—nado yọ́n nuhe hẹn nuhahun lọ wá.

   Nunọwhinnusẹ́n Biblu tọn: “Nọ yawu nado dotoai, whleawu nado dọho bo whleawu nado gblehomẹ.”—Jakọbu 1:19.

•   Gọalọna ovi towe nado vọ́ nulẹnpọn do nue jọ lọ ji. Kàn kanbiọ delẹ sè e taidi, Etẹwẹ a plọn sọn nujijọ ehe mẹ? Adà tẹ mẹ a mọdọ emi dona basi vọjlado te to ninọmẹ ehe nkọ mẹ to whedevonu? Kanbiọ mọnkọ lẹ gán gọalọna we nado hẹn nugopipe nulẹnpọn tọn jọja aflanmẹ towe tọn pọnte dogọ.

   Nunọwhinnusẹ́n Biblu tọn: “Nọ yí homẹfa po azọ́nyinyọnẹn mẹpinplọn tọn lẹpo po do wọhẹmẹ, do gbẹnunamẹ, do dotuhomẹnamẹ.”—2 Timoti 4:2.

•   Gọalọna ovi towe nado yọ́n kọdetọn nuṣiwa lọ tọn. E nọ wà dagbe taun eyin mẹplọnlọ sọgbe hẹ nuhe ovi lọ ṣiwà. Di apajlẹ, eyin jọja aflanmẹ towe ma biọgbè whẹpo do ylọ hagbẹ lẹ wá whégbè na nuwiwa pọmẹ tọn de to whenue a ma to whé, a gán de whenu he e do nọ nọpọ́ hẹ hagbẹ etọn lẹ pò, na ojlẹ de.

   Nunọwhinnusẹ́n Biblu tọn: “Nudepope he mẹde to dido, enẹ wẹ e na gbẹ̀n ga.”—Galatianu lẹ 6:7.

•   Ze ayidonugo do nue a gán wà na ovi towe nido mọdọ a gọjẹ jidedo emi go ji. Na nugbo tọn, enẹ ma gán jọ to zánto dopo mẹ. Etomọṣo, ovi towe dona yọnẹn dọ dile ojlẹ to yìyì, e gán basi vọjlado na a nido gọjẹ jidedo e go ji. Dike ovi towe ni mọdọ a gán gbẹ́ dejido emi go. Eyin jọja aflanmẹ towe mọdọ a ma gán dejido emi go gbede ba, e ma nasọ dovivẹnu.

   Nunọwhinnusẹ́n Biblu tọn: “Mì ma nọ hẹn homẹgble ovi mìtọn lẹ blo, na yé nikaa gbọjọ.”—Kolosinu lẹ 3:21.