To hosọ ehe mẹ

•  Etẹwẹ yin azọngban otọ́ de tọn?

•  Naegbọn azọngban otọ́ de tọn do yin nujọnu sọmọ?

•  Otọ́ lẹ po viyọnnu yetọn lẹ po

•  Ayinamẹ na otọ́ lẹ

•   Whẹpo ovi towe nido yin jiji. Asu wunmẹ he a yin todin wẹ na magbe otọ́ wunmẹ he a na yin to sọgodo tọn. Owe de he dọhodo azọngban otọ́ lẹ tọn ji dọmọ:

   “Eyin otọ́ de nọ gọalọna asi etọn he to ohò nado nọ họ̀ nuhe sin hudo e do lẹ, nọ ze e yì dotowhé, nọ ze otó do adọgo asi etọn tọn go nado sè lehe ovi lọ to gòwhàn do, e yọnbasi dọ asu mọnkọ ni gọalọna asi etọn nado penukundo ovi lọ go to whenu e na ko yin jiji.”

   “Whenue asi ṣie to ohò, n’ma nọ jlo dọ ni mọdọ emi ṣo wẹ to agbàn lọ hẹn, enẹwutu n’nọ gọalọna ẹn dile n’penugo do. Mí tlẹ nọpọ do tò nulẹ do ohọ̀ he mẹ ovi lọ na wá nọ wẹ. Ojlẹ vonọtaun de wẹ mí yizan dopọ dile mí to nukundo viyẹyẹ mítọn he na yin jiji lọ.”—James.

   Nunọwhinnusẹ́n Biblu tọn: “Ma nọ ze ayidonugo do ale mẹdetiti tọn mìtọn lẹ kẹdẹ ji, ṣigba do ale mẹdevo lẹ tọn ji ga.”—Filipinu lẹ 2:4.

•   Whenue ovi towe ko yin jiji godo. Hiẹ po ovi towe po gán vẹ́ dogọ eyin a nọ ze e bọ mì nọ daihun dopọ. Nọ gọalọna asi towe nado penukundo ovi lọ go. Dile a to nukunpedo ovi towe go, ehe na wadagbe na ẹn taun dile e to whinwhẹ́n. Haṣinṣan dagbe he a wleawuna po e po na dohia dọ ovi towe họakuẹ na we taun.

   “Nọ daihun hẹ ovi towe ganji. Etlẹ yin aihun yọpọvu lẹ tọn. Nọ konu do e whẹwhẹ. Flindọ, mìwu mẹjitọ lẹ dè wẹ ovi mìtọn na plọn nuhe nọ yin owanyi sọn jẹnukọn.”—Richard.

   Nunọwhinnusẹ́n Biblu tọn: “Ogú de wẹ ovi lẹ yin sọn Jehovah dè; ale de wẹ sinsẹ́n adọ̀mẹ tọn yin sọn ewọ dè.”—Salmu lẹ 127:3, nudọnamẹ odò tọn.

•   Dile ovi towe to whinwhẹ́n. Dodinnanu lẹ dohia dọ ovi he vẹ́ hẹ otọ́ yetọn lẹ nọ saba wazọ́n ganji to wehọmẹ, ma nọ do nuhahun susu to numọtolanmẹ-liho, podọ yé ma nọ saba nù amasin adínọ, kavi dọalọ to walọ ylankan lẹ mẹ. Enẹwutu, nọ yí whenu he pé zan nado wleawuna haṣinṣan dagbe de hẹ ovi towe.

   “Visunnu ṣie dọna mi dọ eyin emi wá tọ́n sọn whégbè, nuhe emi na jẹdò etọn hugan wẹ hodọdopọ he mí nọ tindo eyin mí to mọto mẹ bo to yìyì kavi to núdùdù whèjai tọn whenu. Ohó vivẹ́ he mí nọ dọ dopọ lẹ nọ wá aimẹ whenue n’ma tlẹ donukun yetọn paali. Ehe lẹpo yọnbasi na mí nọ zan whenu susu dopọ wutu.”—Dennis.

   Nunọwhinnusẹ́n Biblu tọn: “Mì nọ payi tlala dọ lehe mì to zọnlinzin do ni ma yin taidi nulunọ blo ṣigba taidi nuyọnẹntọ lẹ, mì nọ yí whenu mìtọn zan to aliho dagbe hugan mẹ.”—Efesunu lẹ 5:15, 16.

 To paa mẹ, suhugan mẹlẹ tọn nọ dọ dọ azọngban otọ́ lẹ tọn wẹ nado penukundo whẹndo yetọn go to agbasa-liho bosọ basi hihọ́na yé, podọ azọngban onọ̀ lẹ tọn wẹ nado penukundo whẹndo yetọn go to numọtolanmẹ-liho. (Deutelonomi 1:31; Isaia 49:15) Amọ́ azọngban otọ́ po onọ̀ po tọn ehelẹ sọgan gbọnvo sọn whẹndo de ji jẹ devo ji. Depope he whẹho lọ yin, dodinnanutọ lẹ dọ dọ otọ́ po onọ̀ po nọ yí adà titengbe de wà na nuhe dù ovi lẹ pinplọn. a

 Judith Wallerstein he nọ na ayinamẹ do whẹndo ji dọ numimọ mẹdetiti tọn de he zinnudo nuagokun titengbe ehe ji. E wlan dọmọ: “Whenue mọto gbá viyọnnu mítọn he do owhe wiawe, e jlo dọ otọ́ etọn ni topọ hẹ to mọto he ze e jei dotowhé lọ mẹ, na e kudeji mlẹnmlẹn dọ otọ́ emitọn do nugopipe lọ nado whlẹn emi sọn ninọmẹ lọ mẹ wutu. Enẹgodo whenue e to dotowhé, e nọ jlo dọ ma sinai do apá etọn to whelẹponu bo nọ to homẹmiọnna ẹn.” b

 “Otọ́ de sọgan nọ basi hihọ́na whẹndo etọn bosọ hẹn ẹn diun dọ nulẹpo to yìyì ganji, ehe gán ko vẹawu na onọ̀ de nado wà. To ojlẹ dopolọ mẹ, onọ̀ de gán hẹn ovi etọn lẹ voawu, gbọn todidoai na yé po awuvẹmẹ po dali. Yé omẹ awe lẹ wẹ nọ wazọ́n dopọ.”—Daniel.

 Nunọwhinnusẹ́n Biblu tọn: “Visunnu ṣie, nọ dotoaina mẹplọnlọ otọ́ towe tọn, a sọ gbẹ́ anademẹ onọ̀ towe tọn dai blo.”—Howhinwhẹn lẹ 1:8.

 Taidi otọ́ de, a dona plọn viyọnnu towe lehe sunnu lẹ dona nọ yinuwa hẹ ẹ do. E na plọn ehe to aliho awe he bọdego lẹ mẹ:

•   Gbọn lehe a nọ yinuwa hẹ onọ̀ etọn do dali. Eyin a nọ yiwanna asi towe bosọ nọ na ẹn sisi, ehe na gọalọna viyọnnu towe nado yọ́n jẹhẹnu titengbe he e na donukun sọn alọwlemẹ sọgodo tọn etọn si lẹ.—1 Pita 3:7.

•   Gbọn lehe a nọ yinuwa hẹ ewọ lọsu do dali. Eyin a nọ na sisi viyọnnu towe, a to pinplọn ẹn nado nọ na sisi ede niyẹn. Podọ ehe na zọ́n bọ e na nọ donukun dọ sunnu devo lẹ ni nọ yinuwa hẹ emi to aliho dopolọ mẹ.

   Amọ́, eyin a nọ to homọdọdo viyọnnu towe go mapote, ehe gán zọ́n bọ e na nọ mọ ovọ́ mẹ na ede bo na nọ dín dọ sunnu devo lẹ ni yọ́n pinpẹn emitọn, podọ sunnu ehe lẹ ma to dagbe etọn dín na taun tọn.

   “Viyọnnu he otọ́ yetọn lẹ nọ do owanyi hia bosọ nọ nọgodona lẹ ma nọ saba yigbe nado biọ họntọn mẹ hẹ sunnu depope poun, eyin yé mọdọ sunnu lọ ma do jẹhẹnu dagbe lẹ bo ma nasọ yin asu dagbe de na emi.”—Wayne.