ALỌGỌ NA WHẸNDO LẸ | ALỌWLE
Lehe Mì Gán Dapana Awuwhàn to Alọwle Mìtọn mẹ Do
Alọwle de ma gán do ayajẹ eyin alọwlemẹ lọ lẹ ma nọ dejido ode awetọ go. Enẹwutu, nawẹ mì gán dapana awuwhàn he ma sọgbe lẹ gbọn?
To hosọ ehe mẹ, mí na dọhodo nuhe bọdego lẹ ji:
Etẹwẹ awuwhàn yin?
Hogbe lọ “awuwhàn” gán tindo zẹẹmẹ devo. To hosọ ehe mẹ, e zẹẹmẹdo numọtolanmẹ he mì nọ tindo eyin mẹde to ojlo agọ̀ tindo na alọwlemẹ mìtọn kavi to whenue alọwlemẹ mìtọn to ojlo agọ̀ tindo na mẹdevo lao. Mì gán mọdọ alọwle mìtọn to owù mẹ. Eyin ninọmẹ mọnkọ mẹ wẹ mì whànwu te be owhẹ̀ mìtọn whẹ́n. Na nugbo tọn, alọwle yin kanṣiṣa pẹkipẹki de he nọ tin to omẹ awe ṣẹnṣẹn, podọ asu po asi po lẹ dona wà nuhe go yé pé lẹpo nado basi hihọ́na alọwle yetọn.
Ayinamẹ Biblu tọn: “Yé masọ yin agbasalan awe ba, adavo dopo. . . . Nuhe Jiwheyẹwhe ko kọndopọ, mì dike mẹde klan ẹn blo.”—Matiu 19:6.
“Awuwhàn he sọgbe na zọ́n bọ asu po asi po lẹ na nọ yawu mọ owù lẹ hlan nukọn bo ze afọdide he jẹ lẹ nado dapana yé.”—Benjamin.
Nuvẹdomẹ po obu po wẹ nọ hẹn Awuwhàn he ma sọgbe wá. Owanyi nugbo tintindo na alọwlemẹ mìtọn na zọ́n bọ mì ma na nọ whànwu i to aliho he ma sọgbe mẹ. (1 Kọlintinu lẹ 13:4, 7) Doto de he nọ yin Robert L. Leahy dọmọ: “Eyin mẹde nọ whànwu alọwlemẹ etọn to aliho he ma sọgbe mẹ, ehe nọ saba hẹn kanṣiṣa alọwle tọn yetọn gble.” a
Etẹwẹ nọ hẹn awuwhàn he ma sọgbe wá?
E yọnbasi dọ a ni wleawuna awuwhàn he ma sọgbe eyin alọwlemẹ de ko tafu we pọ́n. Kavi na alọwle mẹjitọ towe lẹ tọn gbà na yé ma yin nugbonọ na ode awetọ wutu, bọ hiẹ lọsu to budi dọ nudopolọ gán wá jọ do alọwle towe go.
“Whenue n’to ovu otọ́ ṣie ma yin nugbonọ na onọ̀ ṣie, enẹwutu, e nọ vẹawuna mi nado dejido mẹdevo lẹ go. Ehe hẹn awugble wá na mi to numọtolanmẹ-liho, podọ na ehe wutu e nọ vẹawuna mi nado dejido asu ṣie go to whedelẹnu.”—Melissa.
Nudevo wẹ yindọ: Eyin a ma nọ do numọtolanmẹ hihọ́ tọn, e gán bọawuna we nado nọ lẹndọ mẹdevo lẹ jlo na hẹn alọwle towe gble wẹ. A tlẹ gán jẹ linlẹn ji dọ eyin a ma yọ́n bayi, alọwlemẹ towe gán jo we do bo yì dà mẹdevo.
“Asu ṣie sin họntọn de biọ to asi etọn nado do avọ̀ dopolọ hẹ ẹ bo nọ apá etọn to alọwle-zan etọn gbe, ehe na biọ dọ asu ṣie po yọnnu devo po ni sinai dopọ bosọ dúwe dopọ. Na n’ma kẹalọyi wutu. E gbọ bo dọna họntọn etọn nado dín mẹdevo.”—Naomi.
Dile etlẹ yindọ aṣa alọwle tọn lẹ nọ gbọnvo sọn fide jẹ fide, nunọwhinnusẹ́n Biblu tọn lẹ wẹ dona na nọ deanana Klistiani lẹ. Be nugbo wẹ dọ nuhe Naomi wà lọ sọgbe ya? To whenue e wá lẹnnupọn ganji godo, e wá mọdọ awuwhàn emitọn ma sọgbe. E dọmọ: “To ojlẹ lọ mẹ, n’to budi bọ ayiha ṣie masọ jai. N’nọ lẹndọ asu ṣie nọ yí mi jlẹdo yọnnu devo lẹ go wẹ sin, amọ́ e ma yinmọ paali.”
Depope he whẹho lọ yin, awuwhàn he ma sọgbe gán zọ́n bọ a na jẹ nuvẹdo alọwlemẹ towe ji bosọ sawhẹdokọna ẹn dọ e ma yin nugbonọ na emi. Numọtolanmẹ mọnkọ tintindo gán bẹpla alọwle towe po agbasalilo towe po.
Ayinamẹ Biblu tọn: “Awuwhàn nọ hẹn ohú lẹ yọ̀n.”—Howhinwhẹn lẹ 14:30.
Etẹwẹ a gán wà nado dava awuwhàn towe?
Nọ dejido alọwlemẹ towe go. Kakati nado nọ to ayiha zedo nuhe na zọ́n bọ a ma na dejido alọwlemẹ towe go lẹ ji, nọ lẹnnupọndo onú voovo he e to wiwà he zọ́n bọ a dona nọ dejidego lẹ ji.
“N’nọ lẹnnupọndo walọ dagbe asu ṣie tọn lẹ ji. Eyin e nọ yí sọwhiwhe do dotoaina mẹde, e do ojlo to mẹlọ mẹ podọ onú mẹlọ tọn to ahunmẹduna ẹn wẹ zọ́n. Podọ n’dona nọ flindọ alọwle mẹjitọ ṣie lẹ tọn gbọnvona ṣie.”—Melissa
Ayinamẹ Biblu tọn: “Owanyi . . . nọ yí nulẹpo sè.”—1 Kọlintinu lẹ 13:4, 7.
Ma nọ tẹkudo linlẹn towe lẹ go blo. Doto Leahy he go mí donù wayi dọmọ: “To whedelẹnu, mí nọ saba lẹndọ nuhe mí lẹn lẹpo wẹ yin nugbo sin. Na mí kudeji dọ linlẹn mítọn yin nugbo wutu, mí nọ yí i zan taidi whẹwhinwhẹ́n. Amọ́, na mí yise dọ nude yin nugbo ma dohia dọ mọ wẹ nulọ yido pẹpẹ gba, podọ mí ma gán yí i zán taidi whẹwhinwhẹ́n nujọnu tọn de.” b
“Eyin mì nọ vẹnudo alọwlemẹ mìtọn bo nọ lẹndọ e ko to nude dosin, ehe gán hẹn nuhahun wá alọwle mìtọn mẹ.”—Nadine.
Ayinamẹ Biblu tọn: “Mì gbọ lẹnpọn dagbenọ-yinyin mìtọn ni yin yinyọnẹn na gbẹtọ lẹpo.”—Filipinu lẹ 4:5.
Mì nọ dọ numọtolanmẹ mìtọn lẹ tọ́n. Nọ dọhodo nuhewutu a do to awuwhàn ji hẹ alọwlemẹ towe, bosọ dọhodopọ hẹ ẹ do numọtolanmẹ towe lẹ ji, ehe na zọ́n bọ ogbè mìtọn na topọ bọ mì nasọ ze dogbó he sọgbe hẹ lẹnpọn dagbe lẹ dai na mìde.
“Hodọdopọ ehe nkọ tintindo na dohia dọ alọwlemẹ towe ma jlo na hẹn homẹgble we, kakatimọ nudide dagbe wẹ e to titẹnpọn nado basi. Hẹn do ayiha mẹ dọ linlẹn dagbe wẹ alọwlemẹ towe tindo. E gán yindọ hiẹ wẹ to nukundo nususu sọn alọwlemẹ towe si hugan lehe e jẹ do. Kavi e gán yindọ alọwlemẹ towe ma yọnẹn dọ emi ma to ayidonugo he jẹ na we.”—Ciara
Ayinamẹ Biblu tọn: “Mì gbọ mẹdopodopo ni nọ dín, e ma yin ale edetiti tọn gba, ṣigba dehe yin mẹdevo tọn.”—1 Kọlintinu lẹ 10:24.
A Gán Sọ Pọ́n Hosọ Ehelẹ
WHẸNDO TOWE SỌGAN YIN AYAJẸNỌ
Dín Anademẹ Jiwheyẹwhe Tọn Nado Tindo Alọwle Ayajẹnọ
Kanbiọ kleunkleun awe delẹ kinkanse dewe sọgan gọalọna we nado hẹn alọwle towe pọnte dogọ.
ALỌWLE & WHẸNDO
Whenue Linlẹn Mìtọn lẹ Gbọnvo
Nawẹ asu po asi po lẹ gán nọ didẹ gbemanọpọ lẹ nado nọ jijọho mẹ hẹ ode awetọ gbọn?
ALỌWLE & WHẸNDO
Aṣli Alọwle Kọdetọn Dagbenọ de Tọn: Nọ Do Owanyi Hia
Azọ́n, apọṣimẹ, po nuhahun egbesọegbesọ tọn lẹ po gán zọ́n bọ alọwlemẹ lẹ ma nasọ nọ do owanyi hia ode awetọ sọmọ ba. Be e yọnbayi dọ alọwlemẹ lẹ ni gọjẹ owanyi nugbo dohia ode awetọ ji ya?