“Egbesọegbesọ wẹ nudelẹ nọ jọ to asu po asi po ṣẹnṣẹn he nọ hẹn ẹn vẹawuna yé nado fahomẹ. Homẹfa didohia sọgan taidi nuhe ma vẹawu sọmọ eyin yè yin tlẹnnọ, amọ́ dandan wẹ e yin nado nọ do e hia to alọwle mẹ nado tindo kọdetọn dagbe.”—John.

•  Naegbọn a dona nọ fahomẹ?

•  Nawẹ a gán nọ do homẹfa hia gbọn?

•  “Dandannu wẹ e yin nado nọ fahomẹ”

•   To alọwle mẹ, yè nọ yawu mọ awugbopo alọwlemẹ mẹtọn tọn.

   “Whenue jeje alọwle tọn họ́n namẹ godo, e nọ bọawu nado ze ayiha do jijọ alọwlemẹ mẹtọn tọn he ma yọ́n sọmọ lẹ ji. Eyin yè jẹ linlẹn agọ̀ enẹlẹ tindo ji, e nọ vẹawu nado nọ do homẹfa hia.”—Jessena.

•   Sọmawhe gán zọ́n bọ a na nọ dọho matin nulẹnpọn jẹnukọn.

   “N’nọ yawu dọ nuhe wá ayiha mẹ na mi—yèdọ tlolo he e sọ́ mi. Amọ́, eyin n’nọ fahomẹ pẹẹde wẹ, n’gán nọ lẹnnupọn do ninọmẹ lọ ji nado yọnẹn eyin n’na gbọ bo johodo.”—Carmen.

   Biblu dọmọ: “Owanyi nọ fahomẹ bo nọ yin homẹdagbenọ.” (1 Kọlintinu lẹ 13:4) Nuhe sọgbe wẹ e yin nado donukun dọ asu po asi po he yiwanna yedelẹ ni nọ do homẹfa hia. Amọ́, e ma nọ yin mọ to whelẹponu. John, he go mí donù wayi dọmọ: “Taidi jẹhẹnu dagbe depope, e nọ bọawu nado hẹn homẹfa bu hugan nado wleawuna ẹn. E nọ kàn dẹpẹ biọ nado to homẹfa dohia zọnmii.”

•   Eyin nude jọ to ajiji mẹ bo hẹn ẹn vẹawuna we nado fahomẹ.

   Di apajlẹ: Alọwlemẹ towe dọ nude he vẹna we. Ojlo towe wẹ nado dọ nuhe na vẹna ewọ lọsu.

   Nunọwhinnusẹ́n Biblu tọn: “A yawu nado gblehomẹ blo, na homẹgble wẹ ohia nulunọ tọn.”—Yẹwhehodọtọ 7:9, nudọnamẹ odò tọn.

   Lehe a gán nọ do homẹfa hia do: Nọ yiagbọji. Whẹpo a nado gblọn nudepope, mọdọ nude janwẹ zọ́n bọ alọwlemẹ towe do yinuwa domọ, e ma yindọ e desọn ojlo mẹ nado gbleawuna we. “Nuhe nọ saba sisẹ́ suhugan mítọn nado yinuwa wẹ lehe mí mọnukunnujẹ nuhe alọwlemẹ mítọn dọ mẹ do, e ma yin nuhe e to linlẹn kavi dọ na taun tọn,” wẹ owe lọ Fighting for Your Marriage dọ.

   Eyin a tlẹ mọdọ alọwlemẹ towe to tintẹnpọn nado hẹn homẹgble we, duduto dewe ji nado do homẹfa hia bo ma yiahọsu gán hẹn ninọmẹ lọ pọnte kakati nado hẹn ẹn vantan. “Fie nake ma tin te, miyọ́n nọ ṣí,” wẹ Biblu dọ.—Howhinwhẹn lẹ 26:20.

   “Eyin a jẹ asi towe pọnhlan ji taidi kẹntọ, yiagbọji bo lẹnnupọndo nuhewutu a do yiwanna ẹn ji bosọ tẹnpọn nado wà nudagbe de na ẹn to afọdopolọji.”—Ethan.

   Lẹnnupọndo ehe ji:

  •  Nawẹ a nọ yinuwa gbọn eyin alọwlemẹ towe dọ kavi wà nude he gblehomẹna we?

  •  Nawẹ a gán fahomẹ taun to whedevonu he nudopolọ nasọ jọ gbọn?

•   Eyin nudopolọ nọ jọ whẹwhẹ bo nọ hẹn ẹn vẹawuna we nado fahomẹ.

   Di apajlẹ: Alọwlemẹ towe ma nọ nọ̀ gànmẹ ji gbede, bọ a dona nọ nọtepọn ẹn—ehe ka nọ gblehomẹna we.

   Nunọwhinnusẹ́n Biblu tọn: “Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii.”—Kolosinu lẹ 3:13.

   Lehe a gán nọ do homẹfa hia do: Dike dagbemẹninọ alọwle towe tọn ni nọ jẹnukọnna ojlo towe titi. Kanse dewe dọ, ‘Eyin n’tẹdo whẹho ehe go majomajo, be e na wà dagbe na haṣinṣan mítọn wẹ ya kavi e na hẹn ẹn gble?’ Humọ, flindọ “mímẹpo wẹ nọ ṣinuwa whlasusu.” (Jakọbu 3:2) Ehe dohia dọ nudelẹ gbẹ́ pò he ji hiẹ lọsu dona wazọ́n do.

   “To whedelẹnu, n’nọ mọdọ n’nọ fahomẹ taun hẹ họntọn lẹ hugan asu ṣie. N’lẹndọ na n’topọ hẹ asu ṣie to whelẹponu bo ko yọ́n nuhe mẹ e jẹdò te lẹ wẹ zọ́n. Amọ́, homẹfa yin aliho de nado do owanyi hia—na nugbo tọn, ohia sisi tọn wẹ—enẹwutu dandannu wẹ e yin to alọwle ṣie mẹ.”—Nia.

   Lẹnnupọndo ehe ji:

  •  Obá tẹ mẹ wẹ a nọ fahomẹ hẹ alọwlemẹ towe jẹ, eyin e nọ gboawupo to nude mẹ?

  •  Nawẹ a gán fahomẹ taun to whedevonu gbọn?