To ojlẹ he mẹ alokan kavi nuyizan mọnkọ lẹ gbayipe te ehe, ogán towe, azọ́nwatọgbẹ́ kavi ahisinọ towe lẹ gán donukun dọ a ni nọ vò to whelẹponu bọ enẹ gán zọ́n bọ a ma na nọ yọ́n azọ́n whenu dovo, mọ a ma nasọ nọ mọ whenu na onú devo lẹ, kakajẹ alọwle towe ji.

•  Nuhe a dona yọnẹn

•  Ayinamẹ lẹ nado yọ́n whenu azọ́n tọn dovo na nudevo lẹ

•  Nuhe asu po asi po delẹ dọ

•  Kanbiọ delẹ he ji asu po asi po lẹ gán dọhodo

•   Alokan kavi nuyizan mọnkọ lẹ gán zọ́n bọ a na pò na azọ́n kẹdẹ bo ma na nọ mọ whenu na asu kavi asi towe. Eyin enẹ ka jọ, whedepopenu he yè ylọ kavi kannu hlan we whenue a ma to azọ́n mẹ, e gán taidi na we dọ ohọ̀ de wle miyọ́n bo dona yinyin ṣíṣí hadopo lọ wẹ nkọ.

   “To paa mẹ, eyin yè fó azọ́n yè nọ wá whégbè bo nọ nọpọ́ hẹ whẹndo mẹtọn wẹ, amọ́ na yè nọ to wekanhlan we bo nọ to yiylọ we na azọ́n wutu, e gán vẹawu nado mọ whenu na whẹndo towe.”—Jeanette.

•   Eyin a jlo na mọ whenu he jẹna azọ́n towe po whẹndo towe po, nudelẹ tin he a dona wà. Eyin a ma bayi tito de, azọ́n towe gán yitẹn to alọwle towe si.

   “Asu kavi asi mẹtọn wẹ nọ yin omẹ tintan he yè nọ dovọ́na, na yè nọ mọdọ, ‘asu ṣie na mọnukunnujẹemẹ. E ma na hia enẹ gọ́ nude. N’na mọ whenu nado nọpọ́ hẹ ẹ whedevonu.’”—Holly

•   Nọ dọ alọwle towe tọn jẹnukọn. Biblu dọ dọ: “Onú he Jiwheyẹwhe kọndopọ mì dike gbẹtọ klan ẹn blo.” (Matiu 19:6, Biblu Wiwe lọ—Gun Alada.) Eyin a ma jlo dọ mẹde ni “klan” we sọn asu kavi asi towe go, naegbọn a na dike bọ azọ́n towe na wàmọ?

   “Ahisinọ delẹ nọ lẹndọ na yé nọ suahọ we wutu, yé gán ylọ we na azọ́n whedepopenu. Na n’yọnẹn dọ alọwle ṣie tọn wẹ n’dona dọ jẹnukọn wutu, n’nọ dọna yé dọ ma nọ wazọ́n to gbọjẹzan ṣie lẹ gbè, amọ́ n’na gọ̀ yé ylọ madẹnmẹ.”—Mark

   Kanse dewe dọ, ‘Be walọ ṣie nọ dohia dọ n’nọ dọ alọwle ṣie tọn hugan azọ́n ṣie ya?’

•   Nọ gbẹ́ azọ́n he ma yin dandan tọn lẹ dai. Biblu dọ dọ: “Nuyọnẹn tin to whiwhẹnọ lẹ dè.” (Howhinwhẹn lẹ 11:2) Eyin a yọ́n dewe jlẹ, a na mọdọ emi dona gbẹ́ azọ́n delẹ kavi ylọ mẹdevo nado wazọ́n lọ.

   “Osin wẹ n’nọ dọ̀n gbọn họmẹ (plombier), bọ eyin mẹde ka jlo dọ ma yawu wá wazọ́n de na emi, mẹlọ ko nọ to nuhà. Amọ́, ’yin ma gán wà azọ́n lọ to whenue mẹlọ jlo, n’nọ dín mẹdevo na ẹn.”—Christopher

   Kanse dewe dọ: ‘Eyin azọ́n delẹ na zọ́n bọ asu kavi asi ṣie na mọdọ n’dovọ́na emi, be n’gán gbẹ́ azọ́n mọnkọ lẹ po awubibọ po ya? Be asu kavi asi ṣie na lẹndọ n’gán wàmọ ya?’

•   Mì nọ mọ whenu na mìdelẹ. Biblu dọ dọ: “Nulẹpo wẹ ojlẹ dide de tin na.” (Yẹwhehodọtọ 3:1) Ojlẹ he mẹ alọnu towe ján taun to azọ́nmẹ te wẹ a dona de whenu de dovo nado nọ nọpọ́ hẹ whẹndo towe.

   “To paa mẹ, eyin alọnu mítọn ján gbau, mí nọ de gànmẹ de dovo—e gán yin nado dùnú whèjai tọn dopọ kavi nado disa yì huto—enẹ wẹ ojlẹ he mẹ mí na vò nado nọpọ́ bọ nude ma na jẹ demẹ te.”—Deborah

   Kanse dewe dọ: ‘Be n’nọ de ojlẹ de dovo nado nọpọ́ hẹ asu kavi asi ṣie bọ nude ma na fẹayihasẹna mi ya? Etẹwẹ asu kavi asi ṣie na dọ?’

•   Nọ ṣí alokan kavi ọdinatẹẹ towe. Biblu dọ dọ: ‘Mì mọdona nuhe yin nujọnu hugan lẹ.’ (Filipinu lẹ 1:10) Be a sọgan nọ ṣí alokan towe to whedelẹnu bọ eyin yè kannu sẹ́ do we sọn azọ́nmẹ kavi ylọ we, e ma na fẹayihasẹna we ya?

   “N’ko de gànmẹ de bo to vivẹnudo ma nado nọ wazọ́n zẹ̀ gànmẹ lọ go. To ojlẹ enẹ mẹ, n’nọ bayi alokan ṣie do de bọ ma nọ mọ nuhe yè kàn hlan mi lẹ.”—Jeremy

   Kanse dewe dọ: ‘Be n’nọ mọdọ dandan wẹ dọ alokan ṣie kavi Intẹnẹt ni to titá na ogán ṣie kavi ahisinọ ṣie lẹ na do hudo ṣie wutu poun ya?’ Etẹwẹ asu kavi asi ṣie na dọ?

•    Nọ mọnukunnujẹnumẹ. Biblu dọ dọ: “Mì gbọ lẹnpọn dagbenọ-yinyin mìtọn ni yin yinyọnẹn.” (Filipinu lẹ 4:5) Nado dọ hójọhó, whedelẹnu e gán biọ dọ asu kavi asi towe ni wazọ́n to ojlẹ he mẹ mì nọ nọpọ́ de. Di apajlẹ, na agbasazọ́n wunmẹ he asu kavi asi towe nọ wà wutu, e gán biọ dọ yè ni mọ ẹn ylọ etlẹ yin to azọ́n gànmẹ godo. Eyin a mọnukunnujẹ ninọmẹ asu kavi asi towe tọn mẹ, enẹ na zọ́n bọ a ma na donukun nuhe go e ma pé sọn e si.

   “Ajọ́ kleun de wẹ asu ṣie nọ wà, podọ to azọ́n gànmẹ godo ninọmẹ madonukun lẹ nọ wá bọ e dona penukundego. To whedelẹnu, homẹ nọ gble mi, amọ́ na e gbẹ́ nọ mọ whenu na mi wutu, n’nọ gbọ bo johodo.”—Beverly

   Kanse dewe dọ: ‘Be n’nọ dohia asu kavi asi ṣie dọ n’mọnukunnujẹ lehe azọ́n etọn sù sọ mẹ bo ma nọ biọ dọ ni wà nuhe go e ma pé ya? Etẹwẹ asu kavi asi ṣie na dọ?’

 Dopodopo mìtọn gán kàn kanbiọ he to odò lẹ sè ede jẹnukọn. Enẹgodo, mì dọhodo gblọndo mìtọn lẹ ji hẹ ode awetọ.

•   Be asu kavi asi towe nọ wule dọ a nọ to azọ́nwa to azọ́n gànmẹ godo to whégbè wẹ ya? Eyin mọ wẹ, be a mọdọ nugbo wẹ e dọ ya?

•   Adà titengbe tẹlẹ mẹ wẹ a lẹndọ a gán bayi vọjlado te nado yọ́n whenu azọ́n tọn dovo na nudevo lẹ?

•   Be a ko lẹn pọ́n gbede dọ asu kavi asi towe ma gán gọ̀n azọ́n ma wà to azọ́n gànmẹ godo wẹ ya? Eyin mọ wẹ, be a gán flin ojlẹ tangan delẹ ya?

•   Diọdo tẹlẹ wẹ a jlo dọ asu kavi asi towe ni bayi nado yọ́n whenu azọ́n tọn dovo na nudevo lẹ?