LI CAGILI 2
O bakuli n da janbi o pua bi o calo
“U Tienu n taani yaala, o nisaalo n da paadi la.” —Marki 10:9
Jeova ki bua “oba kuli . . . n janbi o lielo.” (Malaki 2:16) Li tie tiladi, o bakuli n da janbi o lielo li ñiigili nni, kelima laa pugindi ti dugidi. Ti dugidi n kaa ye naani mi buama ki ye.
Dinli dinla, bi niba boncianla tama ke laa tie tiladi tin bua ti yaba, ki da janbi ti yaba li ñiigili nni. Yi yaa bua ki ŋanbi ki kubi li ñiigili, li tie bonŋanla yin ŋoadi tundi lie.
1 YI ÑIIGILI N TUA YAALA N MOANI YI NUNI
BIIBILI N YEDI YAALA: “Yin bandi ki gagidi ki gandi yaala n ŋani ki cie.” (Filipi Yaaba 1:10) Li ŋani, li ñiigili n tua yaala n ŋani ki cie yi yema nni. Moandi mani lan tua yaala n moani yi nuni.
Jeova bua ke yaala n kubi ti lielo n yaa paki ti, ke tin yaa ‘mangidi ti yaba pala’. (O Yanfuodaano 9:9) Waa bua tin tieni yaala n wangi ke ti baga ki ye leni ti lielo. O bua tin lingi tin baa tieni maanma kuli ki mangi ti lielo pali. (Korenti Yaaba Tikpiali 10:24) Moandi mani yi lielo n bandi ke yi faadi o kaanu leni o todima.
ŊAN BAA FIDI KI TIENI YAALA:
-
Lingi mani li lenli ki yaa boe leni yi pua bi leni yi calo yogunu kuli, ki yaa wangi ke yi yienu mani yi po.
-
Ŋan tiadi a tuada nni leni a yantiana nni, ke ŋaa go ye a bebe, ke yi di tie niba lie.
2 GUUDI A YULI LENI ŊAN KPAAGI YAALA A PALI NNI
BIIBILI N YEDI YAALA: “Ama mini n yedi yi, ke yua n noanli pua ke o yama kua o niinni, o conbi leni o o pali nni no yo.” (Matie 5:28) Yua ñiigi yama yaa ye mi conconma nni, li bua yedi ke o janbi o lielo o pali nni.
Jeova bua “ŋan fangi a yuli leni ŋan kpaagi yaala a pali nni.” (Mi Kpanjama 4:23; Jeremi 17:9) Ti yaa bua ki tieni la, li ŋani tin guudi ti yuli leni tin diidi yaala. (Matie 5:29,30) Tin ŋoadi o saawalipualo Jobi bontogidikaaŋanli, o den kuani o yuli yaa kuali n tie, ke o kan diidi jafaano o yama n kua o niinni. (Jobi 31:1) Tin paani maanma kuli, tin moandi ki da diidi filimi bi tili yaala n maadi mi conconma maama. Guudi yi yuli, yi yama n da kua nitoa po, li yaa li tie, yi calo bi yi pua po.
ŊAN BAA FIDI KI TIENI YAALA:
-
Bi niba kuli n yaa bani i moamoani po, ke yi kan janbi yi pua bi yi calo abada.
-
Tin tieni ania ki yaa tiadi ti lielo yantiana po. Ti yaa faadi nitoa kaanu, ke laa tie ti pua bi ti calo, tin moandi ki cie laa danlingu.
