Ti yaa bua ki kubi ti diegu, li ŋani tin yaa pia i ligi. (Mi Kpanjama 30:8) Li li wangi ke i ligi tie “gaapo”. (O Yanfuodaano 7:12) Li baa fidi ki yaa pa o ja leni o pua po, ban taani ki kali ki maadi i ligi maama. Ama bi yaa yie, ki naa tiendi la, i ligi baa fidi ki cuani a paka bi ñiigili nni. (Efesi Yaaba 4:32) Li ŋani o ja leni o pua n dugi biyaba po, ki go taani ki jagi ki le, ban baa kubi bi ligi maanma.

BIIBILI N YEDI YAALA: “Yi siiga ŋme n baa bua ki maa li diefoagili ki kan kpa kali ki bandi wan baa biani yaala, ki le o yaa pia yaa ligi n baa dagidi wan gbeni.” (Luki 14:28) Li ŋani yin taani ki taa li jagili, ki kpaagi ki le yin baa tieni yaala leni yi ligi. (Amosi 3:3) Yin bandi yaala n tie tiladi yipo leni yin baa kuani yaa ligi li niinni. (Mi Kpanjama 31:16) Baa yi yaa pia u fidu ki baa daa li bonla, laa tie tiladi yin li daa li ba. Yin foagidi yi yula leni a pana. Yin li moandi, yin di yaa ligi n da cie yin badi yaa ligi.—Mi Kpanjama 21:5; 22:7.

ŊAN BAA FIDI KI TIENI YAALA:

• O ŋmaalo yaa kpe ke yi ligi sieni, taani mani ki taa li jagili ki le yin baa kuani laa ligi naani.

• Yi ligi yaa poadi mo, bandi mani yin baa wadi yi bonbuadikaali maanma. Yi baa fidi ki tieni o fanu yenma bebe li yentunli nni.

BIIBILI N YEDI YAALA: “Yin cedi mani mi faama, yi siiga yuakuli n yaa maadi o lielo i moamoani.” (Efesi Yaaba 4:25) Pendi mani yi pali leni yi lielo, ki waani o yin baadi yaa ligi leni yin tiendi yaala leni la.

Yi yaa bua ki taa yaa jagili n baa cedi yin ñani i ligi boncianla, li ŋani yin boe leni yi pua bi leni yi calo. (Mi Kpanjama 13:10) I ligi maama yaa tie faala tipo li ñiigili nni, li pugindi mi yanduanma. Tin da nua tin baadi yaa ligi nani tinba bebe yaa ligi, li tie o diegu kuli ligi.—Timoti Tikpiali 5:8.

YIN BAA FIDI KI TIENI YAALA:

• Dagidi mani leni yaba, ki le yaa ligi ke yuakuli baa fidi ki ñani, ki kan waani o lielo.

• Tin da ŋa i ligi pakili n cua, ki di yuandi ki boe li booli.