-Naan dɩ nɩn tɔˈ i -ˈyeɛ ˈjhe: Eve jhibha Makɩ ɛ, ɛɛ nʋɛn ˈcɩ ˈsɔɔn gbai. ˈKlaa -ka ɲʋn anˈ jhibha bha see ˈdhe- ɛ, ˈka ʋʋ nɩn- bhla. Ʋa kpa bha ghlu ˈbho ˈtmʋʋndheinˈˈ ˈˈkpe, ʋaˈ -mawa- a gwle ˈo ˈmɛn ˈbho ˈtmʋʋndheinˈˈ ˈŋwɔn. Ʋaˈ ˈtmʋʋndɩ a kpa -je dhueˈ. -Kaan bhla a, Makɩ ˈse -mawa- aˈ ˈsʋ ˈbɔn.

ˈDhe ˈcɩ nɩan ˈsɔɔn ˈdhi ɛ, ʋʋ kpʋʋɛn bha -jeˈˈ, ʋʋ ˈɲan bha aˈ ˈˈbhoɩ- dhɛ ˈˈzaan-. Eve ˈse ˈbɔn ʋn ˈye ˈo -ˈmɔn izi -kenɛnˈ. ˈKlaa ʋn ˈse ˈbɔn Makɩ ˈyʋ ˈbhɔ. -Bho ʋn nɩn- ɔɔ sa nan anˈ, ʋan nʋɛn ʋanˈ ˈˈjɛ ˈtʋn. ‘-Aa ˈbɔn bha ˈmɛn ˈjɛɛn-.’ ˈKa ʋn ˈdha.

-Bho -nɩn Eve -dhe ɛˈ, ka -ˈye nʋn -ɛn?

Dhɩ -ˈnɩɩn -nɩn ˈo -bho ɲɔn -bhlaa ŋwɔn ɔnˈ, -ɩan- jhɔ dɩ bho ˈˈkpɔkpɔ. Ɛmɛn- -nɩn Ɲɔnsoa aˈ ˈtee -ke. Biiblʋ ˈnaan: “[Aʋ] ˈye [ˈɲnɩnzanˈ] we i -tɛɛn.”—1 Tesalɔsɩ 4:3.

-Bho ɲɔn -bhlaa ˈtee -ˈnɛn ŋwɔn ˈdhee, dɩwɛ- ɔɔ ˈjhe -ɛ? Biiblʋ ˈnaan: “[ˈƝnɩnzanˈ -nʋin- ɔ] nʋe kplɩnzʋɩn ˈdho ɔɔ ˈdjɛkpaa ku we.” (1 Kolɛntɩ 6:18) -Kɛ nɩan tɔˈdɩ ɛ, -ɛɛ toɛ -ɛ?

 ˈƝnɩɩn -e -goaˈˈ nɩan ˈzɩan an, ˈkledɩ- nɩan da ˈzɔn mɩn- ʋa ˈjhe ˈdhe ˈɲnɩandhɛ -e -goaˈˈdhɛ ˈdhi:

• -KPLEƐ-. Ɲʋn -ˈnʋʋn, -ʋʋ -ˈsea ˈˈbhlitiɛ- -fuo- -wɛeˈ -ʋʋ -ˈjhea jhaiˈˈ ɛ, ʋa kpleeˈ.

• -FAƲN-. -Bho ɲʋn -ˈnʋʋn nɩn- ɲɔn ɔnˈ jhaiˈˈ -gba a, -wɛeˈ ʋa dee ʋaˈ ˈˈjɛ i: ‘Ɲɔn nɔn ˈdhee, ɔɔˈ jhaiˈˈ -ˈˈwe aˈ diɛ- nɔn- ˈmɔn nɩn- -kaan -an?’

• ˈKPƖIˈMƖƐN-. Ɲɔn -ɔ -ˈyʋbʋ bho ˈghlʋ -ka vɛin ɔn nʋan an, ɔmɔn- ˈɲnʋnkpaeˈ -ɲnun -duuˈˈ a ˈbɔn. Ɲɔn -ˈyea ʋaˈ kpa ˈˈjha poi nʋn ɛn, ɛ se ɔmɔn- ʋa ˈbɔn nɩn-. Ɲmai- -ke ɛ, ʋʋ ˈnaan ˈɲnɔnkpaoˈ -ʋn -ˈŋwɔɔan ʋaˈ dɩ ˈˈdoo- ɛ, ʋanˈ sʋbʋ ˈˈŋwɛn -ɲaan -ke.

• Dhɛ kɔan dɩ ɛ: -Bho -ˈŋwɔɔn ɲɔn ɔnˈ ˈˈjhai nɩn- dɩ ɛˈ, -ˈmɛn -ˈse -manˈ ˈˈjɛ dhɛ ˈdhaa-. (Wlɔm 1:24) Dhɛ -ɛˈ dɩ ɛ, -manˈ ku -nɩɛn- ˈˈghwliɛ-, ʋn se ˈbhlʋɔ i -bhlaadhɛ nɩn-!

Toɛ -ka -ˈbhɛa -ˈyea ˈɲnɩandhɛ -e -goaˈˈdhɛ bho -tɛɛn ɛn. (1 Tesalɔsɩ 4:3) -Bho mɔn -e ɲɔn ˈˈtii ˈˈbhli ˈdhe ˈkmʋn anˈ ɲan anˈ, dhɛ aʋa ˈbɔan an, aʋ ˈbhɛɛˈ aʋ ˈyeɛ nʋn. Aʋ ˈbhɛɛˈ aʋ ˈyeɛ nʋn ˈsʋ aʋaˈ -pɛɛ ˈye bhlu. Ɛ ˈse ˈpee ˈdhe nɩn- in. Dhɛ nɩan ˈo ɛ, -ˈmɛn se ˈˈjhai ˈjheɛ- nɩn-.—Iiˈˈbhlaadhɩ- 7:22, 23; 1 Kolɛntɩ 7:3.

• Ɲɔn -ɔn ˈbʋan -ʋn ˈjɛɛn- ɛn, ɔ ˈbhɛɛˈ ɔ ˈye dhɛ -ˈyea -ʋn -glʋˈ kpʋn ˈˈjhrii nʋn?

• Ɲɔn -ɔn naan -manˈ dɩ tɔˈ i ˈjɛɛn- ɛn, ɔ ˈbhɛɛˈ ɔ ˈyeɛ nʋn -manˈ ɲɔnsoadhɛ ˈye ˈkɔ?—Eble 13:4.