-Naan dɩ nɩn tɔˈ i -ˈyeɛ ˈjhe: -Da Karɛnɩn anˈ bhao -ˈˈwe a zaa ˈplʋ ˈˈjhrii ɛ, ˈbho ʋn mun. Ʋan ˈˈsia ˈˈo i ɛ, ɛ ˈso ˈo -gwle ˈsʋ ʋn ˈŋwɔn ghlu ʋn jhibho- ˈˈɩ.

Karɛnɩn ˈˈbhila i ˈsʋ ʋn ˈjheɛ ʋanˈ bhao- Zesika, ʋn ˈbhleɛ nmɔn -zʋlɩ- ˈsɔɔn kwa. Ʋn zɩ ˈˈjun ˈˈŋwɛn. Ʋn -toɛ- Karɛnɩn -zolɛ- dhueˈ ˈˈɩ ˈˈdhe ʋn ˈnaan: “Aaˈ nmɔn -zolɛ- ka a ˈye ˈplʋ ˈˈjhrii -zaa, a sea ˈˈjhu ˈˈzaan nɩn- ˈdhee.”

Karɛnɩn ˈse ˈbɔn ʋn ˈye nmɔn ˈnan. ˈKlaa dɩ kpʋnˈ dhɛ ˈˈzaan. Ʋn ˈse ˈbɔn ʋanˈ ˈˈdhai Zesika ˈye ka nʋn ʋn ˈghlʋɛ ˈe -glɔˈ. ˈSʋ Karɛnɩn an naan tɔˈ i ka: ‘Zesika -ˈbhlea kplɩn ˈjɛɩn see ɛ, -bho -ˈmʋn an sa nmɔn ˈnan ˈzɩan anˈ, -ˈmɛn ɛgwɛ nmɔn ˈnaan se dhɛsaʋn- nɩn-. Ɛ nɩan nmɔn ɛ sea ˈˈgeji nɩn- ˈdhee.’

-Bho -nɩn Karɛnɩn -dhe ɛˈ, ka -ˈye nʋn -ɛn?

-Bho -ˈye dhɛ -ˈyea nʋn jhibho- ɛˈ, -ˈye -manˈ ˈˈjɛ jhibho- -kajɔɔnka. Ɛmɛn- -ɛn mun -ʋn tɔˈ ˈˈɲɩn- -wɛeˈ -ˈye nan- ka ˈˈdhe -ˈse -manˈ ˈˈjɛ iˈˈtai i ˈdhe ɲʋn -ˈnʋʋn ˈkwa.—1 Kolɛntɩ 9:26, 27.

Ka -ˈye nʋn -wɛeˈ -ˈye -manˈ ˈˈjɛ jhibho- bhla -a? Ideedɩ- nɩan da ˈzɔn ɔn, ɩan muɛn -ʋn sʋn bho -po.

Bho jhibho- dhɩ -ˈbhɛɛa ˈˈŋwɛn -e -manˈ ˈˈjɛ ɛˈ kplɩn nɩan ˈmʋn ɛnˈ, -manˈ -pɛɛ ɛ muɛn iku-.

ˈDHE BIIBLƲ ˈDHI: Dhbhoi- Pɔʋ ˈnaan: ‘-Bho ˈɩn se dhɛ jhibho- ˈdhe ghluaˈ aˈ, ˈɩn se ˈan nɩn- ˈdhe dhɛjhibhɛ- bho.’ (2 Kolɛntɩ 11:6) Ɲɔnsoaghlu- Pɔʋ jhibha -kajɔɔnka a, ʋmʋn- nʋɛn -wɛeˈ -bho ɲʋn an sɔ dɩ ˈˈbun tbha aˈ, ɔɔˈ ˈmɛn ˈkpɩ i. Ɔ ˈse ʋaˈ dhɩsaɩn- ʋa ˈtmʋan iˈˈtai- ɩn ˈseɔ ˈkpɩ iˈdhbha.—2 Kolɛntɩ 10:10; 11:5.

DHƐ -ˈYEA NƲN ƐN: Dhɩ -ˈbhɛɛa ˈˈŋwɛn -e dhɩ jhibha nʋanˈ an, -ˈcrɩɩ da ˈzɔn.

Kplɩn ˈjɛɩn anˈ kpɔ dhueˈ -ˈbhlea a, -ˈtmʋn ɩanˈ dɩ. (Ɛ nɩn ɲʋn anˈ dɩ ˈˈduɛ-? -baanˈ -nʋɛn-? -nɩɛn- -gwlɩˈˈ -de ka? -manˈ drɩn?)

Kplaunˈ anˈ bhɩ -diɛ ˈˈɩ ˈklaa -bho dhueˈ gbai -jra aˈ, ʋan ˈtooˈ. -Ka nɩan dhueˈ -ke ɛ, dhɛ sea ˈˈŋwɛn ˈbhɛɛ- ɛ, -bho -ˈˈtai- -manˈ ˈˈjɛ i ˈdhe ɛ ˈkwa aˈ, ɛɛ muɛn -ʋn -seaa-.

ˈDHE BIIBLƲ ˈDHI: Pɔʋ jhibho- dhɩ ɔ sea ˈˈŋwɛn ˈbhɛɛ- ˈmɛn. Dhɛ ɔ ˈcrea ɛ ka: ‘ˈDhe ˈman -glʋˈ bho ɛ, ˈɩn -nmɔn Ɲɔnsoa aˈ ˈtee i. ˈKlaa ˈman ˈjheɛ ˈtee -dhee -ˈnɛɛn ˈdhe ˈman ˈdhaɩ ˈdhi, -ɛɛ vɔn ˈtee ˈman -glʋˈ a ˈbɔan bho. Ɛmɛn- -ɛn nʋɛn -wɛeˈ dhɛsaʋn- nʋanˈ anˈ ˈtʋn ˈbhle ˈʋn -kʋɔnˈ ˈdhe ˈman ˈdhae ˈdhi.’—Wlɔm 7:22, 23.

DHƐ -ˈYEA NƲN: Dhɩwɛ- se ˈˈŋwɛn ˈbhɛɛ-, -ɩanˈ bhovɔɛn- -man ˈbɔn -ˈye ˈcɩan -an?

-ˈBhɛɛˈ -ˈye ˈe ˈkamiɔn ˈdhi ˈjha a, -da -man muan ˈso ˈo ˈɲnɩn ˈˈsiiˈ ˈsʋ -ˈye ka nʋn ˈkamiɔn -jhei- -nɩn bin glɔ, ɔɔˈ ˈkamiɔn ɔnˈ nɛnin ˈye -gwɛ? Ɲɔn sea ˈˈjhrii -cɛɛn mɔn- -ˈbhɛɛ -ɔ -ˈye ɛɛˈ dhɛ tu ɲɔn idee-.

ˈSrɩn -wɛ -man za ˈo -ɛ? -Bho jhibho- dhɛ -man ˈbɔan in, ˈˈdhe jhibho- -ka -ˈyea ɛɛˈ ˈjhe sʋn nʋn -ke ɛˈ, ɛɛ muɛn -manˈ ˈkmʋn je bho -po, -ˈse ˈmʋn zii i ˈˈjhai.

ˈDHE BIIBLƲ ˈDHI: Pɔʋ ˈnaan: ‘Ka ˈman ple ka, ɛ se dhɛ -ɛɛˈ dɩ ˈman plea a, ɩn seɛ jhibho- nɩn-.’ (1 Kolɛntɩ 9:26) ˈDhe ɔɔˈ ˈkmʋn ˈdhi ɛ, Pɔʋ ˈse ɔɔˈ ˈˈjɛ itoo-. Ɔ jhibho- dhɛ ɔɔ ˈbɔan in ˈmɛn, ɛmɛn- ɔ kpʋn ˈe ˈˈjhri -ke.—Filipi 3:12-14.

DHƐ -ˈYEA NƲN: Dhɩ aˈ kpɛ taan -man ˈbɔan -ˈyea nʋn zʋn -an jhi a, -ˈcrɩɩ da.

Bho -manˈ dhɛgwlɩdeɛ- so ˈo dhɛ ˈˈoo dhɛ ˈˈkpe tbha aˈ, -da -ˈyea kpʋn ɛn, -ˈso ˈo jhibho- i. Dhɛ ɲʋn -nɩn -ˈbhɛɛa ˈmʋn ʋa nʋan mɛn- -man mun nʋn-. -Ka -zeegʋˈ nɩan ˈka -man mun nɩn-. -ˈSe -manˈ ˈˈjɛ ɛˈ -nɩnsʋn ˈbhle- i.

-Bho jhibho- -manˈ ˈˈjɛ -kajɔɔnka aˈ, -ˈmɛn -ka tu poɔˈ sea ˈbhɛɛ- ɔ ˈyea -bhlua- nɩan an, ˈka -man mun nɩn-.

ˈDHE BIIBLƲ ˈDHI: Nɔnˈˈ ghlukwajhaai- Daniɛ nɩan ˈˈjhu ˈˈzaan an, ɔ -tɛɛn ɔɔˈ ˈcɛ bho. ˈKlaa ɔ “cɛn ghlu ˈdhe ɔɔˈ -pɛɛ bho” ɔ ˈye Ɲɔnsoa aˈ ˈtee ŋwɔn ˈjhe. (Daniel 1:8) Ɛmɛn- ɔ nʋn -wɛeˈ ɔ ˈse ɔɔˈ -nɩnsʋn- ˈˈɩzian-. Dhɩ Daniɛ ɛˈ dhɛgwlɩdeɛ- tbha ˈo ˈˈkpe ɛ, ɩmɩn- po ɔɔˈ -nansʋn je bho.

DHƐ -ˈYEA NƲN: Dhɩwɛ- -manˈ dhɛgwlɩdeɛ- tbha ˈo ˈˈkpe -ɛ? Dɩ aˈ kpɔ dhueˈ ka: ˈBho- -gwlɩˈˈ ˈdhee, Ɲɔnsoa nɩn- ˈkmʋn ˈmɛn? Dhɛ -manˈ ˈˈjɛˈkpa ˈjhe -wɛeˈ deɛ -gwlɩˈˈ -ka ɔ nɩan ˈkmʋn -ɛn?

-Ka ˈsrɩn Ɲɔnsoa a ˈˈdua -ʋn nɩan -manˈ dhɛjɛɛn ɛn, deɛ -gwlɩˈˈ ˈmɛn? Dhɛɛdɩ- deɛ -gwlɩˈˈ -ɛ?

-Bho poɔˈ ɔ sa jhi ɛˈ, tu aˈ ŋwɩn anˈ -gwle ˈo iˈgea- dɩ. -ˈMɛn ˈbho tu -e ʋanˈ ˈŋwɩn ˈɲnɩn ˈdhee, dhɛ -man ˈbɔn -ˈye gɔ -ɔ? -Bho jhibho- -manˈ ˈˈjɛ -kajɔɔnka aˈ, -man muɛn iku- -ka tu kua i ɛ. Ɛɛ muɛn -ʋn sʋn bho -po ˈˈdhe dɩ nɩn -man deea -manˈ ˈˈjɛ i ɛ, -ˈyɩ ˈe -za: Ka ˈɩn nɩn- -ɛn?