-Jekplɩ aˈ kpɛ ˈsɔɔn -nɩn ˈo -aaˈ klɛɛ ˈˈjhibhaˈ. -Bho ɛ se Zoova -aa -ˈˈɲɩn nɩn- ɛnˈ, -ˈmɛn Satan -e ɔɔˈ -ziisaɩn- -aa -ˈˈɲɩn. -A se ˈbhɛɛˈ -a -ˈye dhɩ nɩan ˈsɔɔn nʋn -da dhueˈ. Ɲɔn za ˈo Zoova aˈ je ɛ, ɔ -nɩɛn- tɔˈ ˈdhi ˈjɛɛn-!

-Ka ɲʋn ˈsrɛ i-poɛ- -e ɲʋn dhɛsaʋn- ˈˈjhrii -nʋɛn- ɛn nʋan -ziisaɩn- ˈtʋn ɛn, -a -ˈjheɛˈ ˈnɔn ˈsɛɛ- nɛn ˈdhi. ˈKlaa Zoova -ˈmɔn se ˈan nɩn-. -Ka -ŋmaain kman ˈˈɲnuun dɩ ɛ, ˈkamɔn- Zoova -kman -aaˈ dɩ. Ɔmɔn- “nyʋ dhɛˈˈnyika -nmɔa ˈˈjriia- wwɛɛˈ e, ˈˈwɛɛˈˈwɛɛdhɩ klɛɛkpɛ -nɩa ˈkplakpla” a ˈghlʋ ˈe bho. (Zakɩ 1:17) Ɔɔˈ -ɲniin -aʋ dhɛ ˈˈoo dhɛ -glʋˈ, -kɛ ˈjhe ɛ nɩn- ɛnˈ.—Ɛfɛzɩ 2:4-7.

Dhɩ Ɲɔnsoa aˈ ˈˈJhu Zezi nʋan da ˈbhlʋa ˈˈkpe ɛ, -naan ɩn tɔˈ i. Ɔ nʋɛnˈ ɲʋn -anˈ ghlua ˈdhe- ɛ, ʋʋ ye -ghlu, ɲʋn -ˈˈdhɔa -ke ɛ, ʋa yea iˈjhe. Ɲʋn jhau ghwɛ ɛ nʋan -e ɲʋn -klɔa a, ɔ ˈpʋʋ- ʋbʋ ˈmɛn. Ɔ -za ɲʋn -ziisaɩn- ˈmʋn, ɔ ˈbhɔɔ- ˈghwɛ ɛˈ kpɛ ɛˈ klɛɛ ˈmɛn. ˈDhe Ɲɔnsoa aˈ ˈˈɩ-kmaan ˈmʋn ɛn, ɔ -jha ɲʋn -ˈmɛan ˈnɔn ˈkmʋn dhe.—Matie 9:32-35; 15:30, 31; Lukɩ 7:11-15.

Ɲɔnsoa aˈ ˈtmʋn sɩ. Ɔɔ ˈtmʋʋɛn -aʋ tɔˈdɩ- jheejhee. Ɔɔˈ -poo ɲʋn ˈsrɛ i.—Nombres 23:19.

-Ka saan anˈ -dɛnˈˈ ɛn kpʋan ˈdain -duuˈˈ ɛ, ˈkamɔn- ɲʋn -duuˈˈ a ˈkpa ˈe ˈˈbhlidhɩ -e ŋmandhɩ -e ˈtmʋʋndɩ- -ˈnɩɩn ˈdhi. Ʋʋ ˈnaan ɲɔn ɔnˈ -dhre ˈˈmaʋn nin, ɲɔn ɔnˈ ˈˈɲɩn ɲʋn sʋnˈˈ jhre. Ʋa pleeɛ ˈˈkwiezriˈˈ. -Ziisaɩn- anˈ -faʋn- -nɩɛn- ˈe ʋbʋ ˈdhi. Ʋa ˈˈduɛ puanˈ -e dhɩ ɲʋn an ˈtmʋan -ɩn -ˈyea -nʋɛn- ˈbho ɲan -e bhopodhɩ- -e kwɛin -saɩn- anˈ -zɔɔnˈ. Nʋʋndhɩ- -ˈnɩn, -ɩn tbha ˈo Ɲɔnsaʋn- Satan anˈ sɩ ˈˈkpe i ɛ, ɩmɩn- ʋʋ de -gwlɩˈˈ. ˈKlaa Ɲɔnsoa aˈ dhbhonʋʋn- se ˈe dhɩ -ˈnɩn anˈ -zɔɔnˈ ˈdhi nɩn-.

Zoova -kman ˈˈɩn ɔ ye Satan -zii. -Bho aʋa sa Zoova ˈˈɲɩn ɛnˈ, ɔɔ muɛn aʋ -ziisaɩn- bho -tɛɛn. (Zakɩ 4:7) -Bho ɲʋn -bhlaa aʋ zoo i, -bho ɲʋn ˈdɩn aʋ i ɛˈ, ɛ ˈse aʋ dhɛ -nʋʋn in. -Bo dhueˈ ka: ˈDhe Nizeria -bhlʋaˈ a, guiʋn- taan -an ˈbɔn Zoova aˈ -Bobhlai- dhueˈ ˈye ˈo -glɔˈ ˈghlʋ. ˈˈDhe ɔ ˈnaan ɔ se ˈo ˈŋwɔɔn-. Ʋʋ -pooɔ dhɛ, -ɛ -ˈse ˈˈsi. Dhɛ ˈsea -Bobhlai- -ˈnɔn nʋn ɛn, -faʋn- nʋn guiʋn anˈ klaaˈˈ ˈmɛn, ɔ ye dɩ ˈˈkpe izela- ˈdhe -Bobhlai- bho.

-Bho -ziisaɩn- nɩn- ˈo- -ˈdhe ɛˈ, bhae- Zoova, -ˈˈsi ɔɔˈ ˈɲnɩn ˈdhe -manˈ bhaeghlu ˈdhi. Ɔɔ muɛn -ʋn ˈdhe i-fuo-. (Iiˈˈbhlaadhɩ- 18:10) ˈKlaa -bho -man sa ˈbɔn ɔ ˈye -ʋn ˈdhe i-fuo- ɛˈ, -ˈmɛn dhɩ aˈ klɛɛ -ɩn nɩan kwɛin -e gudhɩ -e dhɩ -ziisaɩn- nɩan ˈzɔn in ɛn, -ˈyɩ bho -tɛɛn. Ɲɔnsoa aˈ ˈcɛ -ʋʋ nɩan ˈo Efɛzɩ -glɔ -soa- ˈdhi ɛ, ˈkamɔn- ʋʋ nʋn. Ʋʋ ˈgbooɛ- ʋaˈ gu -sɛɩ- aˈ klɛɛ i -wɛeˈ ʋʋ pʋɩ ˈˈjhri. (Nʋʋdhɩ- 19:19, 20) Ɲɔnsoa aˈ ˈcɛ nɩan ˈzɩan -ke ɛ, -ka nɩan dhueˈ ˈka ʋʋ ˈye nʋn. Dhɩ aˈ klɛɛ -ɩn nɩan gu -sɛɩ- oo, -bii oo, jɛˈpodhɩ- oo, ˈghlʋ oo, kwɛin oo, -kwlan oo, gu kɔˈu- oo, siɛˈˈ oo, ˈŋmɛn ˈˈjha -poɛ- oo, ɩanˈ sʋnˈ -poɛ- oo, -za ɩanˈ klɛɛ kwaˈ i.

-Bho -ˈye ˈe Ɲɔnsoa ˈˈjhri ˈdhe i-nmɔn ɔnˈ, ɛ se -ˈye ˈˈɲɩnsʋn- -saʋn- ˈbhɔ ˈˈdhe -ˈye dhɩsaɩn- nʋn- dɩ ˈbhɔ ɔˈ ˈsʋ nɩn-. ˈBho ɛ ˈdhe ɛ, -ˈye ˈe ˈˈɲɩnsʋn- ˈjɛʋn ˈdhi ˈkpa. Biiblʋ ˈbhɛɛˈ ʋn ˈye -ʋn sʋn bho po ˈˈdhe -ka -ˈyea nʋn ɛn, -ˈyeɛ jhibho-:

Satan -e ɔɔˈ -ziisaɩn- ˈbhleɛ ʋaˈ ɲʋn da ˈbhlʋa ˈˈkpe -ʋa- nʋn ʋaˈ dhɩsaɩn- ˈˈdhe -ʋa- tɔɔn ɲʋn ɩanˈ nʋnka. Zoova ˈbhleɛ ɔɔˈ ɲʋn -ke. Ɲɔn ɔn ˈdhaa ʋbʋ Zoova aˈ -Bobhlaʋn-. (Isaïe 43:10) Ʋʋ ziɛ ɲʋn anˈ mliɔn -mɛoˈˈ- i da ˈbhlʋa ˈˈkpe. Ʋaˈ klɛɛ ɛ poɛ ˈe ˈkpɩ ʋa yea dhɛjɛɛn nʋn. Ʋa tɔɔn ɲʋn tɔˈdɩ da ˈbhlʋa aˈ klɛɛ ˈˈkpe. Ɲɔnsoagbi- ʋa ˈŋmʋʋan ˈe ˈdhi ɛ, ɲɔn ɔn ˈdhaɩ ˈBheɔglɔ ɔˈ ˈˈGbu. -Bho mun ˈe ɛˈ, ʋa muɛn -ʋn sɩn ˈsɔɔn -kpʋʋn.

Zoova aˈ -Bobhlaʋn- an poɛ ɲʋn sʋn bho -wɛeˈ ʋʋ ˈye Ɲɔnsoa aˈ dhbhonʋʋn- ˈkpa. Ɛmɛn- -nɩn ʋaˈ dhbho. Ʋʋ ˈbhɛɛˈ ʋʋ ˈye ˈdhee- bho ŋmɛinˈˈ jhi ʋʋ nɩn- -ˈye Biiblʋ ˈcɩan ˈˈdhe -ka -ˈyea nʋn -wɛeˈ -ˈyea Zoova ˈˈɲɩn -kajɔɔnka a, -ˈyeɛ jhibho-. -ˈSeɛ geiˈˈ -za i. Ɛ -nɩɛn- ˈˈjhai. Ʋʋ -kman ɲʋn anˈ dɩ, ʋn -kman Ɲɔnsoa Zoova aˈ dɩ. Ɛmɛn- dɩ ʋa tɔɔn ɲʋn tɔˈdɩ ˈdhe ˈmʋnan ˈdhi.