ˈˈJhu dhueˈ -ɔɔˈ ˈɲnɩn nɩan Dauda, -ɔ -ˈghlʋa ˈe Ɲʋnjhre- -bhlʋa- ɲɔn ɔn ˈdhaa Siera Leɔnɩn ˈdhi ɛ, -kɔ ˈdhaa ˈka ka: “ˈƖn ˈbhʋaa- ˈbho -glɔ -jhu ˈˈzaan dhueˈ ˈdhi. -Da ˈɩn nɩan ˈˈjhu ˈˈzaan -dhe ɛ, ˈkwladɩ- -nɩn ˈo ˈman ˈcɛ -e -glɔʋn- -ˈnʋʋn ˈɲnɩn. Ɛɛˈ dɩ ʋʋ ˈdha dhɩzii- dhueˈ. Ɔ ˈbhleɛ ˈˈjhenan- ɲɔɔn ŋmʋn ˈe ˈdhi. Ɔ ˈyea -dee ɛ, ɔ ˈˈduɛ ɔɔˈ ˈˈjhenan ˈdhe ɲɔn dhueˈ ˈkwa -wɛeˈ ɔ ˈˈjriɔ ˈfɛɛn ˈˈdhru. Ɛ ˈse ˈo -gwle ˈsʋ ˈˈjhu ɔ ˈˈjria dhɛ ˈˈdhru ɛ, ɔɔ trɛˈ -kpakpa-, zu a ˈˈpluu ɔ ˈˈdhru. Ɔ ˈˈghwɔɔˈ ɔ ˈnaan: ‘ˈMan ˈjheɛ gelaˈˈ dhueˈ ˈnɔn ˈˈjhenan ˈdhi. Ɔɔ ˈˈkwaan ˈmiin! Ɔɔˈ ˈmʋnpaadhɩ- ˈˈpluuˈ, ɛ gelaˈˈ -ɔ -tɛn jha, ɔɔˈ ˈˈmiin ˈˈpluuˈ, ɔɔ tbha tu i.’

“Ɲɔn ɔɔ poa ˈˈɩ ɛ, ɛ ˈman ˈˈnan -ɲmau-! ˈSʋ ɔɔ trɛˈ -kenɛnˈ, ɔɔ ˈˈghwɔɔɛ i. Ɔ ˈnaan: ‘-Bho ˈman sea sɩ ˈtmʋn ɛnˈ, aʋaˈ ˈˈjɛ jhi ˈnɔn dhɛ ˈzɔn!’ -Ɔ -ˈbhɛɛ- -ɔ -ˈye -ˈmɛn nʋn -ɛn? -Faʋn- an nʋn -aaˈ klɛɛ ˈmɛn. Dhɩzii- -za kwɛin- -nin ˈdhe -jhae- dhueˈ ˈdhi, ɔ ˈghwlɔ ˈmʋn, -wɛeˈ ˈdhe ɔ kuzɔnˈ nʋn ˈtɩɩn.

“Ɲɔn ˈˈjhu ˈjhea ˈdhe ˈˈjhenan ˈdhi -aa -ˈdhaa ˈman ‘ˈˈnan -ɲmau-’ ɛ, ɔmɔn- -ɔn ghlu bhla. Ɔ ˈnaan, ˈman ˈcɛ -ˈbhle ˈkwla -ˈnɔn. -Faʋn- ˈbhɔ ˈman ˈˈnan -ɲnɔnkpaoˈ nʋn- ɛn, ʋn ˈbhɛɛˈ ʋn ˈye ˈe ɔ ˈdhi mun ʋn ˈye ʋanˈ gle ˈdhbha. Ɲʋn -nɩn -aa jɛɛa ˈkwladɩ ˈmʋn ɛn, ʋʋ ˈŋwɔɔn- dɩ ɔ ˈtmʋan ˈmɛn. ˈKwladɩ -jraˈ.”

 Ɲʋn -gwle ɩanˈ dhɩ tu aˈ ˈjhea ˈmɛn ˈnɔn Ɲʋnjhre- -bhlʋaˈ. ˈBho ɲʋn -duuˈˈ -gwlɩˈˈ ɛ, -bho ɲɔn ˈmɛn ɛnˈ, ɔɔ muɛn ˈe ˈkmʋn -dhee -ˈnʋʋn ˈdhi, ɔ ˈbhɛɛˈ ɔ ˈye ˈe nɩn- -wɛeˈ dhɩ aˈ klɛɛ -ɩan- nʋʋan ˈdhe ɲʋn anˈ ˈkmʋn ˈdhi ɔ ˈyɩ ˈjhe, ˈˈdhe ɔ ˈye ˈo sʋn po. -ˈMɛn ˈbhɛɛˈ ɛ ˈye -nʋɛn- -ɛn? Ɲʋn -ˈmɛan an, ʋʋ nɩn- ˈkmʋn ˈmɛn ˈjɛɛn-? Dhɩ ɲʋn an ˈdhaa ˈˈkwiezriˈˈ ɛ, da ɩan ˈghlʋ -ɛ? Dɩ -ˈnɩn anˈ iˈŋwɔɛn- ɛnˈ dɩ -kmanˈ. -Bho -aa sa ˈbɔn -a -ˈye ˈpʋa ˈjhe ɛˈ, -a -ˈyɩ iˈŋwɔn -kajɔɔnka.