Dhɛɛdɩ- Satan -e ɔɔˈ -ziisaɩn- an poo ɲʋn ˈsrɛ i -ɛ? Dhɛ nɩan ˈo ɛ, ɛmɛn- -nɩn ɩn ˈse ˈbɔn -a -ˈye Ɲɔnsoa ŋwɔn ˈjhe. Ɩan ˈbɔn -a -ˈyɩ ˈˈɲɩn. Ɩan ˈbɔn -a -ˈye ɩanˈ sɩ -gwlɩˈˈ de ˈˈdhe dhɩ Zoova ˈsea ˈbɔn ɔn, -a -ˈyɩ nʋn. Ɩanˈ dhɩ tu aˈ -da -duuˈˈ mɩn- -bho ɲɔn ˈmɛn ɛnˈ, ɲɔn ɔn ˈjhe.

-Bho -aaˈ ɲɔn ˈmɛn ɛnˈ, ɛɛ poa -aʋ i. Ɛmɛn- dɩ -aa ˈˈvɩn. Zezi ɔˈ -jhbhɛɛi- Lazaa ˈmɛan an, ɔ ‘ˈˈvɩnˈ.’—Zan 11:35.

-Bho ɲɔn ˈmɛn ɛnˈ, ʋaˈ ˈˈbhlidhɩ- -duuˈˈ ɔɔˈ ˈcɛ ɛ nʋn. -Ka ɲʋn nʋan kpɛ -dee sʋn da ˈbhlʋa ˈˈkpe ɛ, ˈkamɔn- ɩanˈ dhɩ tu -dee kpɛ -ke. Ɛ se ˈˈbhlidhɩ- -ˈnɩn anˈ klɛɛ -nɩn dhɩsaɩn- nɩn-. ˈKlaa -ˈnɩɩn -nɩn ˈo -ɩn -nɩn Biiblʋ aˈ ˈtee aˈ kpa -je dhueˈ. Dhɛbhleɛ ɛ, dhɛ ɩanˈ dhɩ tu a toa a, ɛmɛn- -nɩn -bho ɲɔn ˈmɛn ɛnˈ, ɔ -nɩɛn- -da -dhee -ˈnɔɔn, ɔ ˈbhɛɛˈ ɔ ˈye dhɩ aˈ klɛɛ ɔɔˈ ˈcɛ ɛ nʋan ˈjhe. Ɛmɛn- dɩ ʋa ˈpɛɛn ˈzɔn, ʋa ˈˈdu gɔ ˈˈdhe ʋa zii ˈˈvɩan -jeˈˈ. ˈBho ʋbʋ -gwlɩˈˈ ɛ, -bho ʋa sa ɩanˈ dhɩ tu nʋn ɛnˈ, ʋa nmɔn ˈe ˈˈkwiezriˈˈ ˈˈjhri ˈdhe i. ˈKlaa ɲʋn -ˈmɛan sea “dhɛ ˈˈoo dhɛ ˈˈɩjhibho-” ˈdhee, -ˈmɛn ɲʋn -an nʋan dhɩ -ˈnɩn ɛn, ɛ sɩ Satan an ˈtmʋan mɩn- ʋa naan ˈe ˈdhi.—Ecclésiaste 9:5.

 ˈBho ɲʋn -duuˈˈ -gwlɩˈˈ ɛ, -bho ɲɔn ˈmɛn ɛnˈ, dhɩ -dhee -ˈnɩɩn ɲʋn ˈye nʋn -wɛeˈ ɲʋn ˈyeɔ ‘-deɩnˈ ˈkpa.’ -Bho ɩanˈ dhɩ tu se -nʋɛn- ɛnˈ, -ˈmɛn ɔ ˈse -ɲnin in. Ɔ ˈbhɛɛˈ ɔ ˈye dhejhi ɔ ˈye ɲʋn -seaa-. Ɛmɛn- -jha gɔ ˈˈdu sʋn -e ˈˈbhlidhɩ -ˈnɩɩn ˈnɔn ˈkmʋn. Ɛɛˈ dɩ ˈdhe ɲʋn -ˈnʋʋn ˈˈbhli ɛ, -bho ˈghwɩ aˈ 40 zi ɛˈ, ʋa ˈˈdu gɔ, ʋa za ˈsrae-. -Bho -zʋn dhueˈ zi -wɛeˈ -ˈnʋʋn an nʋɛn. -Kenɛnˈ ɛn, -ˈnʋʋn an piɛ ˈcran -zaan -ko. -ˈNʋʋn an ˈghwla nmɔn in ɲʋn -ˈmɛan anˈ dɩ.

Ɲʋn anˈ ˈˈbhlidhɩ- ʋa nʋan -ˈnɩn se ˈˈɩˈsrɛ. Dhɛ nɩa ˈo ɛ, sɩ Satan an ˈtmʋan mɩn- ɩn tbha ˈo ˈˈkpe. Dhɩ tbha ˈo -ziisaɩn- anˈ ˈtmʋʋndɩ ˈˈkpe ɛ, -bho -aa sɩ nʋn ɛnˈ, Zoova ˈbhɛɛˈ ɔ ˈye -aaˈ dɩ ˈŋwɔɔn- -ɔn? Ɔ ˈse -aaˈ dɩ ˈŋwɔɔn- dhi!—2 Kolɛntɩ 6:14-18.

Ɲʋn anˈ klɛɛ nɩan tɔˈdɩ- Ɲɔnsoa aˈ dhbhonʋʋn- ɛn, ʋaˈ -naan ˈdhe Satan anˈ sɩ -ˈnɩn ˈdhi. ˈBho ɛɛˈ ˈgɔ ˈˈɩ ɛ, ɲʋndɩkmaan- an ˈˈtun ʋbʋ ˈmɛn ʋa yea ɲʋn nɩan ˈkmʋn sʋn bho po, ʋa yʋbʋ dɩ -gwliˈi ˈˈdu. ˈKlaa -bho ɲɔn ɔnˈ dɩ ˈkpa aˈ, Zoova aˈ ˈsʋ -ˈbhɛɛ- -ɔ -ˈye ˈo dhɛ -nʋʋn. Ɛmɛn- ʋʋ jhibho-.—Job 14:14, 15.

Ɲʋn -dhee -ˈnʋʋn -nɩn -ziisaɩn- an poo ghlu bho. Ʋaˈ -ˈnʋʋn an jhiiɛ dhɩzii- dhi -wɛeˈ ʋʋ nɩn- ɩan ghlu. ˈDhe vodu -e, gupoɛ- -e, jhriˈ- -e, dhɩziɛ- -e, ˈdhe ˈmɛʋn bho -ghluɛ- -e -gle -e ˈˈku ˈɲnɔn -e kwɛin ˈbhleɛ ˈdhe ɛ, -ziisaɩn- -nɩn ˈe.

Biiblʋ ˈnaan ɩanˈ dhɩ tu se ˈˈjhrii -nmɔn. -Kɛ nʋan ˈcreɛ sʋn ˈka ka: “Ɲʋn ˈbhɔ ɲʋn nʋn anˈ dhueˈ gbai ˈjheɛˈ ˈbho- -ˈˈbhli [...] ɲɔn nɩan jhriiˈ- -poi- -e ɲɔn -ɔn zia dhɩ -e guiɔn -e ɲɔn -ɔn san ɲʋn in -e ɲɔn ˈˈoo ɲɔn -ɔn muan ˈˈkwiezriˈˈ ˈdhai- ˈˈjhibhaˈ -e ɲɔn -ɔn -ˈjheea dhɩ ɲan -e ɲɔn -ɔn ghlua ˈe ˈmɛʋn bho ɛ. Dhɛbhleɛ ɛ, ɲɔn ˈˈoo ɲɔn -ɔn nʋan ɩanˈ dhɩ tu ɛ, ɔɔ ɲaan Zoova i.”—Deutéronome 18:10-12.

Dhɛɛdɩ- Zoova ˈse ˈbɔn -a -ˈye ɩanˈ dhɩ tu ˈˈbun bhla -a?

 -Aaˈ ˈˈjɛ ɛˈ dhɛjɛɛn ɛnˈ dɩ Zoova a zela -abʋ -glʋˈ -a -ˈye -ziisaɩn- anˈ dhɩ aˈ klɛɛ bho -tɛɛn. Ɔɔ ˈˈduɛ ɲʋn anˈ dɩ. Ɔ jhibhiˈ, ɲʋn -nɩn -ziisaɩn- an nan an, ʋa ˈjheɛ ˈkle.

Ɲʋn -ˈnʋn -ʋa- -ˈjhea ˈkle ˈdhe -ziisaɩn- ˈkwa a, ʋaˈ dhueˈ mʋn- -nɩn Nida. Ʋan ziɛ dhɩ ˈdhe- ˈdhe Blezii -bhlʋaˈ. -Ziisaɩn- ˈkɔɔ ʋanˈ ˈkmʋn ˈmɛn. Dhɛ ˈghlʋa ˈe ʋanˈ ˈˈjɛ ŋwɔn ɛ ka: “-Ziisaɩn- [...] ˈbhleɛ ˈʋn -kʋɔnˈ. Dhɛ ˈˈoo dhɛ ɩan ˈbɔan mɛn- ˈman nʋn. Ɩn -seaa- ˈmʋn ˈmɛn ˈjɛɛn-. ˈMan nʋɛn -ˈkpa -glʋˈ -sɔn -glʋˈ, ɛ nʋɛnˈ ˈsʋ ˈman ˈˈdhru aˈ ˈmɛn ˈˈbheeɛ- ˈˈjhrii. -Ziisaɩn- -siɛ- ˈʋn kwa i bhla ˈsʋ ˈman -tain- anˈ klɛɛ ɛ poaˈ. ˈMan ˈnan ˈdhae aˈ poa- -kwɛin-, ˈman ˈnan nmɔn -e siklai -e. ˈƖn ˈjheɛ ˈman ˈˈjɛ ŋwɔn ˈdhe zɩɩn -zɩɩn ˈdhi.”

Nɔnˈˈ -ziia- ˈbho ɛ, Zoova -e ɔɔˈ -Bobhlaʋn- poɛ Nilda sʋn bho ʋn ye ˈe -ziisaɩn- anˈ -kʋɔn- kwlaˈ ˈghlʋ. ˈBhodhe ɛ, ʋanˈ ˈkmʋn -nɩɛn- ˈdhɔɛe ˈmʋn. Ʋn ˈnaan: “ˈMan bhaeɛ aʋaˈ klɛɛ i, aʋ -tɛɛn -ziisaɩn- bho, aʋaˈ dhee ɩn ˈˈbun -dhe kpɔ dhueˈ gbai mɔn.”